🔯বঙাইগাঁৱত অসম গণিত শিক্ষায়তনৰ ৩৭ সংখ্যক প্ৰতিষ্ঠা দিৱস পালন🔯

🔯বঙাইগাঁৱত অসম গণিত শিক্ষায়তনৰ ৩৭ সংখ্যক প্ৰতিষ্ঠা দিৱস পালন🔯

📝বঙাইগাঁওঃ ১৮ জুলাইঃ অসম গণিত শিক্ষায়তনৰ বঙাইগাঁও শাখাই সোমবাৰে বীৰঝৰা ছোৱালী উচ্চতৰ মাধ্যমিক বিদ্যালয়ত অসম গণিত শিক্ষায়তনৰ ৩৭ সংখ্যক প্ৰতিষ্ঠা দিৱস পালন কৰে। এই উপলক্ষে বীৰঝৰা মহাবিদ্যালয়ৰ অৱসৰপ্ৰাপ্ত অধ্যাপক তথা অসম গণিত শিক্ষায়তনৰ বঙাইগাঁও শাখাৰ সভাপতি মানবেন্দ্ৰ দাসে গণিত শিক্ষায়তনৰ পতাকা উত্তোলন কৰি প্ৰতিষ্ঠা দিৱসৰ কাৰ্যসূচীৰ শুভাৰম্ভ কৰে। ইয়াৰ পিচতে শাখা সম্পাদক অৰূপজ্যোতি মজুমদাৰে আঁত ধৰা সভাত বঙাইগাঁও অঞ্চলত গণিত শিক্ষাৰ প্ৰসাৰত  উল্লেখনীয় অবদান আগবঢ়োৱা বীৰঝৰা উচ্চতৰ মাধ্যমিক বিদ্যালয়ৰ অৱসৰপ্ৰাপ্ত গণিত বিষয়ৰ বিষয় শিক্ষক আৰু শিক্ষায়তনৰ বঙাইগাঁও শাখাৰ প্ৰতিষ্ঠাপক সভাপতি জীতেন্দ্ৰ চন্দ্ৰ মিশ্ৰ ভাগৱতীক শাখাৰ তৰফৰ পৰা প্ৰশস্তিপত্ৰ আৰু শিক্ষায়তনে প্ৰকাশ কৰা  কিতাপৰ টোপোলাৰে সম্বৰ্ধনা জ্ঞাপন কৰা হয়। ভাগৱতীয়ে ভাষণ প্ৰসংগত গণিতৰ শিক্ষক হিচাপে নিজৰ কৰ্মজীৱনৰ চমু বিৱৰন দাঙি ধৰে।

একেখন সভাতেই শিক্ষক শিক্ষয়িত্ৰী সকলৰ বাবে আয়োজিত অসম গণিত অলিম্পিয়াদ ২০২২ সম্পৰ্কীয় প্ৰশিক্ষণ কৰ্মশালাত  অসম গণিত শিক্ষায়তনৰ কেন্দ্ৰীয় সমিতিৰ কাৰ্যকৰী সভাপতি বীৰব্ৰত দাস চৌধুৰীয়ে শিক্ষায়তনৰ জন্মকাহিনীৰ লগতে বিভিন্ন স্তৰত অনুষ্ঠিত গণিত অলিম্পিয়াদ আৰু অলিম্পিয়াদৰ সম্ভাব্য প্ৰশ্নৰ বিভিন্ন দিশ সামৰি প্ৰশিক্ষণ দিয়াৰ  লগতে ছাত্ৰ-ছাত্ৰীৰ বাবে আয়োজিত অনুষ্ঠান সমূহত শিক্ষক শিক্ষয়িত্ৰী সকলৰ সহায় সহযোগ বিচাৰি আবেদন জনায়।🔯