🔯বীৰ লাচিতৰ ৪০০ সংখ্যক জয়ন্তী🔯

🔯বীৰ লাচিতৰ ৪০০ সংখ্যক জন্মজয়ন্তী🔯

🔯বঙাইগাঁও জিলা আৰক্ষী প্ৰশাসনৰ উদ্যোগত কুচকাৱাজ🔯 

📝বঙাইগাঁওঃ ১৮ নবেম্বৰঃ আজিৰে পৰা সমগ্ৰ ৰাজ্যতেই সপ্তাহজোৰা কাৰ্যসূচীৰে লাচিত বৰফুকনৰ ৪০০ বছৰীয়া জয়ন্তী উদযাপনৰ শুআৰম্ভ হৈছে। অসমৰ মহান বীৰজনাৰ জন্ম দিনটো বিশেষভাৱে আয়োজন কৰিবলৈ অসম চৰকাৰে বিভিন্ন কাৰ্যসূচী হাতত লৈছে। ইয়াৰ লগত সংগতি ৰাখি আজি বঙাইগাঁও জিলা আৰক্ষীৰ উদ্যোগত এক কুচকাৱাজ উলিওৱা হয়। বঙাইগাঁও চহৰৰ বীৰঝৰা উচ্চতৰ মাধ্যমিক বিদ্যালয় খেল পথাৰৰ পৰা উলিওৱা কুচকাৱাজ উত্তৰ বঙাইগাঁৱৰ বিসৰ্জন ঘাটত সামৰণী পৰে ৷ কাৰ্যসূচীৰ আৰম্ভণিতে জিলা উপায়ুক্ত নবদ্বীপ পাঠক, পশ্চিম অসম সংমণ্ডলৰ আই জি পি দিলীপ কুমাৰ দে ,  চি আৰ পি এফৰ নামনি অসমৰ ডি আই জি জয়দেৱ কেশৰী,  জিলাৰ আৰক্ষী অধীক্ষক স্বপ্ননীল ডেকাকে ধৰি আৰক্ষীৰ বিষয়াসকলে বীৰ লাচিত বৰফুকনৰ প্ৰতিচ্ছবিত শ্ৰদ্ধাঞ্জলি জ্ঞাপন কৰে ৷ 

শ্ৰদ্ধাঞ্জলি জ্ঞাপন কৰি জিলা উপায়ুক্তগৰাকীয়ে কয় যে আমি সৰুৰে পৰা যেতিয়াই অসম বুৰঞ্জী পঢ়িছো তেতিয়াই যিকেইজন বীৰৰ নাম আছে তাৰ প্ৰথমতেই আছে বীৰ লাচিত বৰফুকনৰ নাম ৷ তাৰপিচত বীৰ চিলাৰায় আদিৰ কথা অসম বুৰঞ্জীত সদায় অমৰ হৈ আছে ৷ যাক মহা নায়ক হিচাপে নামাকৰণ কৰা হয় ৷ এইগৰাকী বীৰৰ সন্মানাৰ্থে উদযাপন কৰিবলীয়া চাৰিশ বছৰীয়া জন্মজয়ন্তীৰ সপ্তাহজোৰা কাৰ্যসূচীৰ এই কুচকাৱাজৰ জৰিয়তে দিলাখনত শুভাৰম্ভ কৰা হৈছে ৷ আনহাতে আই জি পি দিলীপ কুমাৰ দেই কয় যে লাচিত বৰফুকন নোহোৱাহেতেন অসমৰ মানচিত্ৰ বেলেগ হলেহেতেন, লাচিত বৰফুকন নোহোৱাহেতেন অসমৰ কলা, কৃষ্টি,সংস্কৃতি সকলো বেলেগ ধৰণৰ হলেহেতেন আৰু এইদৰে হয়তো এইগৰাকী সেনাধিনায়কক আমি শ্ৰদ্ধাঞ্জলি জনাই সপ্তাহজোৰা কাৰ্যসূচীত অংশ ল'ব নোৱাৰিলোহেতেন ৷ এইগৰাকী  সেনাধিনায়কৰ বীৰত্ব আৰু সাহসৰ বাবেই  পৰাক্ৰমী বিশাল মোগল সেনাই যুদ্ধত পৰাস্ত হৈছিল ৷ দেশৰ সাৰ্বভৌমত্ব ৰক্ষাৰ বাবে নিজৰ মোমাইয়েকক বলিদান দিছিল ৷  

ইপিনে চি আৰ পি এফৰ ডি আই জি জয়দেৱ কেশৰীয়ে কয় যে সেনাধিনায়ক লাচিত বৰফুকনৰ যি চাৰিশ বছৰীয়া জন্মজয়ন্তী উদযাপনৰ কাৰ্যসূচী গ্ৰহণ কৰিছে সেয়া সঁচাকৈ এক প্ৰশংসনীয় ৷ কাৰণ আমি আমাৰ বুৰঞ্জীৰ বীৰক পাহৰি পেলাইছো ৷ তেনে এক সময়তে আমি জন্মভূমিৰ এগৰাকী বীৰক সোঁৱৰি জন্মদিসৱ পালন কৰিবলৈ লৈছো ৷ উল্লেখ্য যে এই কুচকাৱাজত জিলা উপায়ুক্ত, আই জি পি , চি আৰ পি এফৰ ডি আই জি , জিলা আৰক্ষী অধীক্ষকৰ লগতে আৰক্ষীৰ অন্যান্য বিষয়াসকল, জোৱানসকল, বেটেলিয়নৰ জোৱান, মহিলা আৰক্ষী, স্কাউড এণ্ড গাইড আৰু বেণ্ডৰ দলে অংশ লয় ৷  উল্লেখ্য যে ২৩ নৱেম্বৰৰ পৰা ২৫ নৱেম্বৰলৈ তিনিদিনীয়া কাৰ্যসূচীৰে দেশৰ ৰাজধানী দিল্লীত বীৰ লাচিত বৰফুকনৰ জন্মজয়ন্তী উদযাপনৰ কেন্দ্ৰীয় কাৰ্যসূচীৰ আয়োজন কৰা হৈছে। ইপিনে জিলা প্ৰশাসনৰ তৰফৰ পৰা সপ্তাহজোৰা বিভিন্ন  কাৰ্যসূচী গ্ৰহণ কৰিছে ৷🔯