🔯বঙাইগাঁৱৰ বিদ্যাপুৰত টুলুঙা নাওৰে বিপদ সংকুল যাতায়ত ছাত্ৰ- ছাত্ৰীৰ🔯

🔯চম্পাৱতী নদীৰ ওপৰত দলং নির্মাণৰ দাবী🔯 

📝News4Bongaigaon:২২ ছেপ্টেম্বৰঃ বঙাইগাঁও জিলাৰ বিদ্যাপুৰ আৰু চিকিবিকিৰ মাজৰ চম্পাৱতী নদীৰ ওপৰত পকী দলং নির্মাণৰ দাবীত ৰাইজ সোচ্চাৰ হৈ পৰিছে ৷ দেশ স্বাধীন হোৱাৰ পিছত ৭৬  বছৰীয়া অমৃত মহোৎসৱ পাতি দেশৰ উন্নয়নৰ ছবি দাঙি ধৰিছে, যদিও বঙাইগাঁও জিলাৰ পচ্ছাদপদ এই অঞ্চলত আজিলৈ উন্নয়নৰ এচপৰা মাটিও নপৰাত ৰাইজ ক্ষোভিত হৈ পৰিছে ৷ উল্লেখ্য যে বিদ্যাপুৰ আৰু চিকিবিকি পঞ্চায়তৰ মাজৰ চম্পাৱতী নদীৰ ওপৰত এখন দলং নির্মাণৰ প্রয়োজন ৷ কিন্তু কাৰ অৱহেলাত চিৰাং, ধুবুৰী আৰু বঙাইগাঁও জিলাৰ  সীমামুৰীয়া অঞ্চলবাসীৰ মৌলিক দাবী সমাধান হোৱা নাই  সেয়া ৰহস্যজনক ৷ যাৰ ফলস্বৰূপে বাৰিষাৰ সময়ত এখন টুলুঙা নাওৰে ইপাৰ সিপাৰ হ’ব লগাত পৰে ৰাইজে ৷ একাংশই লাইফ জেকেট পিন্ধি যাতায়ত তথা বিদ্যালয়ত অহা যোৱা কৰে যদিও কোনো বিপদমুক্ত নহয় এই যাত্ৰা ৷ খৰালি কালত অঞ্চলবাসীয়ে বাহৰ দলং নির্মাণ কৰি যাতায়াত ব্যৱস্থা অব্যাহত ৰাখে ৷ 

কিন্তু বাৰিষা কালত সমস্যাত পৰে ছাত্র -ছাত্রী সকল তথা ৰাইজে ৷ জিলাখনৰ বিদ্যাপুৰ সংযোগী চম্পাৱতী নৈৰ ওপৰত কোনো দলং নথকাত এইদৰে বিদ্যালয়ত অহা - যোৱা কৰিব লাগে ছাত্ৰ- ছাত্ৰীসকলে ৷ লগতে বঙাইগাঁও চহৰলৈ বিভিন্ন কাম কাজৰ বাবে ৰাইজৰ উপৰিও বেহা -বেপাৰ আদি কামৰ বাবেও এনেদৰে এখন নাওৰে পাৰাপাৰ হ’ব লগা হৈ থকাত ৰাইজ অতিষ্ঠ হৈ পৰিছে ৷ স্বাধীনোত্তৰ কালৰে পৰা জিলাখনৰ চিকিবিকি পঞ্চায়তৰ অধীনৰ ছাত্ৰ- ছাত্ৰী আৰু সাধাৰণ ৰাইজে এনেদৰে যাতায়ত কৰি আহিছে ৷ বিপদ সংকুল যাত্ৰা কৰি যাতাযাত কৰিবলগীয়া হৈছে শ শ ছাত্ৰ ছাত্ৰীৰ লগতে বৃহৎ অঞ্চলৰ ৰাইজ ৷ বৃহত্তৰ অঞ্চলটোৰ স্থানীয় ৰাইজে কেইবাবাৰো সমষ্টিটোৰ বিধায়ক ফণীভূষণ চৌধুৰীক লিখিত ভাবে জনাই আহিছে যদিও আজিলৈকে চম্পাৱতী নদীৰ ওপৰত এখন পকী দলং নিৰ্মাণৰ বাবে কোনো ব্যৱস্থা গ্ৰহণ নকৰাত ৰহস্য সৃষ্টি হৈছে ৷ একেদৰে জিলা উপায়ুক্ত, সাংসদ সকলকো উক্ত বিষয়ৰ ওপৰত লিখিত পত্ৰ প্ৰদান কৰাৰ পিছতো আজিলৈ নদীৰ ওপৰত দলং নিৰ্মাণ হৈ নুঠাত ৰাইজে ক্ষোভ প্ৰকাশ কৰাৰ লগতে শুকুৰবাৰে জিলা উপায়ুক্তক এখন স্মাৰক পত্ৰ প্ৰদান কৰে ৷ 🔯