NEWS 4 BONGAIGAON

বঙাইগাঁৱত ডাম্পাৰৰ খুন্দাত থিতাতে নিহত মটৰ চাইকেল আৰোহী 

বঙাইগাঁওঃ ১৩ জুনঃ বঙাইগাঁও সদৰ থানাৰ অন্তৰ্গত গাৰুগাঁৱত আজি পুৱা সংঘটিত এক শোকাৱহ পথ দুৰ্ঘটনাত এজন মটৰ চাইকেল আৰোহী থিতাতে নিহত হয় ৷ নিহত মটৰ চাইকেল আৰোহীজন তিন নং নাচনগুৰি গাঁওৰ আলী আহমেদ(৪২) বুলি চিনাক্ত কৰা হয় ৷ দুৰ্ঘটনা সন্দৰ্ভত বঙাইগাঁৱৰ যান-বাহন শাখাৰ আৰক্ষীয়ে জানিবলৈ দিয়া মতে তিন নং নাচনগুৰি নিবাসী আলী আহমেদে পুৱা ঘৰৰ পৰা নিজৰ এ এছ ১৯ এল-৬৩২২ নম্বৰৰ টি ভি এচ ভিক্টৰ মটৰ চাইকেলখনেৰে ৰাষ্ট্ৰীয় ঘাই পথেৰে বঙাইগাঁৱৰ ৰাখালডুবি অভিমুখে আহি থকা অৱস্থাত গাৰুগাঁৱত একে দিশে আহি থকা এ এছ ২৬ চি-৫৮৯২ নম্বৰৰ ডাম্পাৰখনে পিছ ফালৰ পৰা খুন্দিওৱাত ঘটনাস্থলীতে আলী আহমেদৰ মৃত্যু হয় ৷ ইপিনে দুৰ্ঘটনাটো সংঘটিত কৰিয়ে ডাম্পাৰখন পলায়‌ন কৰে ৷ পিছত দুৰ্ঘটাটোক কেন্দ্ৰ কৰি ঘটনাস্থলীত এক উত্তপ্ত পৰিস্থিতিৰ সৃষ্টি হয় যদিও যান-বাহন শাখাৰ আৰক্ষী উপস্থিত হৈ ৰাইজক বুজাই-বঢ়াই শান্ত কৰে ৷ লগতে মৃতদেহটো উদ্ধাৰ কৰি মৰণোত্ততৰ পৰীক্ষাৰ বাবে বঙাইগাঁও অসামৰিক চিকিৎসালয়লৈ প্ৰেৰণ কৰে ৷ মৰণোত্তৰ পৰীক্ষাৰ পিছত মৃতদেহটো পৰিয়ালৰ লোকক গতাই দিয়ে ৷ আৰক্ষীয়ে ইতিমধ্যে চাপৰাকাটাৰ পৰা  দুৰ্ঘটনাটো সংঘটিত কৰি পলায়ন কৰা ডাম্পাৰখন জব্দ কৰাৰ লগতে চালকজনকো আটক কৰিছে ৷ পথ দুৰ্ঘটনাটো পুৱা ৬ মান বজাত সংঘটিত হয় বুলি আৰক্ষীয়ে জানিবলৈ দিছে ৷