🔯আৰ্থিক সংকটঃ বঙাইগাঁৱত আনক গতাই দিলে নৱজাতক শিশুকঃ উদ্ধাৰ🔯

🔯আৰ্থিক সংকটঃ বঙাইগাঁৱত আনক গতাই দিলে নৱজাতক শিশুকঃ উদ্ধাৰ🔯

📝বঙাইগাঁওঃ ৫ আগষ্ট : আৰ্থিক অৱস্থা একেবাৰে দুৰ্বল হোৱাৰ বাবেই নিজৰ নৱজাতক সন্তানক গতাই দিলে আনক ৷ এই কৰুণ ঘটনা সংঘটিত হৈছে বঙাইগাঁৱত ৷ প্ৰাপ্ত বাতৰি মতে বঙাইগাঁও চহৰৰ নিউ ক’লনীৰ এগৰাকী মহিলাই যোৱা ২৮ জুলাইত বৰপেটাৰ ড° ফকৰুদ্দিন আলী আহমেদ চিকিৎসা মহাবিদ্যালয় হাস্পতালত দুটি যমজ পুত্ৰ সন্তান জন্ম দিছিল ৷ মহিলা গৰাকীয়ে যমজ সন্তান দুটি জন্ম দিয়াৰ পাছতে মাতৃ আৰু শিশু দুটি অসুস্থ হৈ পৰে ৷ পৰিয়ালৰ কোনো নিৰ্দিষ্ট উপাৰ্জন নথকাত সংকটজনক হৈ পৰা মাতৃ আৰু শিশু দুটিৰ চিকিৎসাৰ ক্ষেত্ৰত ব্যয় কৰিবলগীয়া ধনৰ অভাৱ হয় ৷ পৰিয়ালটিৰ হাতত নাছিল প্ৰয়োজনীয় ধন ৷ দুবেলা দুমুঠি খাদ্য যোগাৰ কৰাৰ বাবে কষ্ট হোৱা দৰিদ্ৰ পৰিয়ালটিৰ নৱজাতক শিশু দুটিৰ লগতে মাতৃৰ সংকটজন অবস্থা হোৱাত অসহায় তথা দিশহাৰা হৈ পৰে পৰিয়ালটো ৷ ইয়াৰ মাজতে বঙাইগাঁও চহৰৰ পালপাৰাৰ বাসিন্দা তথা সন্তানহীন দম্পতি এহালৰ সৈতে পৰিয়ালটোৰ যোগাযোগ হয় ৷ নিসন্তান পৰিয়ালটোৱে তেওঁলোকৰ পৰা এটি সন্তান তুলি লোৱাৰ কথা কয় আৰু ইয়াৰ বিনিময়ত তেওঁলোকৰ সমস্ত চিকিৎসাৰ বহন কৰিব বুলি জনায় ৷ সেই অনুসৰি সন্তোষ সাহা নামৰ ব্যক্তিজনে চিকিৎসাৰ সমস্ত খৰচ বহন কৰে ৷ চিকিৎসাৰ অন্তত সুস্থ হৈ উঠে শিশু আৰু মাতৃগৰাকী  ৷ দুই আগষ্টত বৰপেটা চিকিৎসা মহাবিদ্যালয় হাস্পতালৰ পৰা মহিলা গৰাকীক ছুটি দিয়া হয় আৰু নৱজাতক শিশুসহ মহিলা গৰাকীয়ে বঙাইগাঁৱৰ নিজ বাসস্থানত উপস্থিত হৈছিল ৷ 

ইপিনে পৰিয়ালটিয়ে এটি শিশুক নিঃসন্তান দম্পত্তিহালক গতাই দিব বুলি গোপন সূত্ৰে খবৰ লাভ কৰিছিল জিলা শিশু সুৰক্ষা বিভাগে ৷ তাৰ পিছতে শনিবাৰে পৰিয়ালটিৰ গৃহত বিভাগৰ বিষয়া উপস্থিত হৈ আইনী প্ৰক্ৰিয়া অবিহনে শিশুক আনৰ হাতত গতাই দিলে জগৰীয়া হ'ব পাৰে বুলি বুজনি দিয়ে ৷ কিন্তু সোমবাৰে পৰিয়ালটিয়ে এটি শিশুক সন্তোষ সাহাৰ হাতত গতাই দিয়া বুলি জানিব পাৰে শিশু সুৰক্ষা বিভাগে ৷ এই খবৰ লাভ কৰাৰ পিতে শিশু সুৰক্ষা বিভাগৰ বিষয়া দুলুমনি সূত্ৰধৰৰ নেতৃত্বত আৰু আৰক্ষীৰ সহযোগত বিয়লিৰ ভাগত নৱজাতক শিশুটিক ৯ নং ৱাৰ্ডত থকা নেতাজী নগৰৰ সন্তোষ সাহাৰ বাসগৃহৰ পৰা উদ্ধাৰ কৰে ৷ উদ্ধাৰ কৰা শিশুটিক বৰ্তমান শিশু গৃহ ৰখা হৈছে বুলি জানিব পৰা গৈছে ৷