NEWS 4 BONGAIGAON

🔯বঙাইগাঁও জিলা আদালতৰ জ্যেষ্ঠ অধিবক্তা অৰূপ কুমাৰ নাথৰ বিয়োগ 

🔯উকীল সন্থাৰ শোক প্ৰকাশ 

                   
                   বঙাইগাঁওঃ ৮ মেঃ 

🔯#বঙাইগাঁও জিলা আদালতৰ অন্যতম জ্যেষ্ঠ অধিবক্তা তথা বঙাইগাঁও বৰপাৰা নিবাসী অৰূপ কুমাৰ নাথৰ আজি পুৱতি নিশা গুৱাহাটীৰ আয়ুৰচন্দ্ৰা বেচৰকাৰী চিকিৎসালয়ত চিকিৎসাধীন অৱস্থাত বিয়োগ ঘটে ৷ অধিবক্তাগৰাকী গুৰুতৰ যকৃতৰ (লিভাৰ )ৰোগত আক্ৰান্ত হৈ আছিল ৷ মৃত্যুৰ সময়ত তেওঁৰ বয়স আছিল ৭৬ বছৰ ৷ উল্লেখ্য যে গোপীনাথ বৰদলৈ নেতৃত্বাধীন অসমৰ প্ৰথমখন মন্ত্ৰীসভাত ৰাজহমন্ত্ৰী হিচাপে স্থান লাভ কৰা গোৱালপাৰাৰ বিধায়ক তথা নামনি অসমৰ প্ৰধান গান্ধীবাদী নেতা প্ৰয়াত যোগেন্দ্ৰনাথ নাথ আৰু গোৱালপাৰা চেট্ৰেল গাৰ্লচ হাইস্কুলৰ শিক্ষয়িত্ৰী প্ৰয়াত ৰত্না দেৱীৰ একমাত্ৰ পুত্ৰ সন্তান আছিল অৰূপ কুমাৰ নাথ ৷ তেওঁ হাইস্কুলীয়া শিক্ষা গোৱালপাৰাৰ পি আৰ চৰকাৰী বিদ্যালয়ত সমাপ্ত কৰি চিলঙৰ এডমাণ্ডচ্ কলেজত শিক্ষা গ্ৰহণ কৰে ৷ তাৰপিচত গুৱাহাটী বিশ্ববিদ্যালয়ৰ পৰা ৰাজনীতি বিজ্ঞানত স্নাতকোত্তৰ আৰু আইনৰ উপাধি লৈ বহুদিনলৈকে অশোক কাগজ কলৰ জন সম্পৰ্কৰক্ষী বিষয়া হিচাপে কৰ্মৰত আছিল ৷ 

পিচত কাগজ কলটো বন্ধ হোৱাত আশীৰ দশকত বঙাইগাঁও ন্যায়িক আদালতত অধিবক্তা হিচাপে দ্বিতীয়বাৰ কৰ্মজীৱন আৰম্ভ কৰে ৷ মাজতে তেওঁ কেইবা বছৰ চৰকাৰী অধিবক্তা হিচাপেও  কাৰ্যনিৰ্বাহ কৰিছিল ৷ এবাৰ তেওঁ বঙাইগাঁও বিধানসভা সমষ্টিত জনতা দলৰ পৰা নিৰ্বাচনতো প্ৰতিদ্বন্দ্বিতা কৰিছিল ৷ অমায়িক ব্যৱহাৰেৰে তেওঁ কম সময়ৰ ভিতৰতে বৃত্তিগত কামত সাফল্য অৰ্জন কৰিছিল ৷ তেওঁ কেইবাবাৰো বাৰ এচোচিয়েচন তথা ৰ'টাৰী ক্লাৱৰ দায়িত্বশীল পদত অধিস্থিত হৈ কাৰ্যনিৰ্বাহ কৰিছিল ৷ সেইদৰে নামনি অসমত সদৌ অসম উকীল সন্থাৰ সাংগঠনিক বিস্তৃতি ঘটোৱাত তেওঁৰ অৱদান আছিল অপৰিসীম ৷ মৃত্যুৰ সময়ত তেওঁ শিক্ষয়িত্ৰী পত্নী জ্যোৎস্না ৰাণী নাথ, অভিযন্তা পুত্ৰদ্বয় অভিষেক নাথ আৰু তন্ময় নাথ আৰু অবিবাহিতা বায়েক এগৰাকীক ইহ সংসাৰত এৰি থৈ যায় ৷ ইপিনে অধিবক্তাগৰাকীৰ মৃত্যুত বঙাইগাঁও জিলা উকীল সন্থাই গভীৰ শোক প্ৰকাশ কৰিছে ৷ উকীল সন্থাৰ সভাপতি হৰেশ্বৰ দাসে এক প্ৰেছ টোকাত জানিবলৈ দিয়া মতে সন্ধিয়া ৭ঃ৩০ বজাত সকলো অধিবক্তাই নিজ নিজ ঘৰৰ পৰাই একে সময়তে মৌনতা অৱলম্বন কৰি মৃতকৰ প্ৰতি তথা আত্মাৰ সদগতি কামনা কৰি শ্ৰদ্ধা জ্ঞাপন কৰে ৷ লগতে শোক সন্তপ্ত পৰিয়ালবৰ্গলৈ সমবেদনা জ্ঞাপন কৰে ৷ ইপিনে জ্যেষ্ঠ অধিবক্তা অৰূপ কুমাৰ নাথৰ বিয়োগত বাৰ কাউন্সিল অৱ ইণ্ডিয়াৰ চেয়াৰমেন ( ই চি) তথা জ্যেষ্ঠ অধিবক্তা অপূৰ্ব কুমাৰ শৰ্মাই গভীৰ শোক প্ৰকাশ কৰাৰ লগতে তেওঁৰ পৰিয়ালবৰ্গলৈ সমবেদনা জ্ঞাপন কৰিছে ৷
                     News4Bongaigaon