🔯অৱশেষত জীৱন সিংহৰ সৈতে আলোচনাত চামিল হ'ল কেএলঅ (কেএন) গোট🔯

🔯অৱশেষত জীৱন সিংহৰ সৈতে আলোচনাত চামিল হ'ল কেএলঅ (কেএন) গোট🔯

১৮ জুনত ভাৰতত প্ৰৱেশ কৰিছিল বিভাজিত গোটটো

🔯আলোচনা প্রক্রিয়া চূড়ান্ত পর্যায়ত উপনীত হৈছে ,কেৱল বাকী আছে আনুষ্ঠানিক ঘোষণাহে মন্তব্য সংগঠনটোৰ অধ্যক্ষৰ🔯

📝News4Bongaigaon: ২৪ জুলাইঃ কমতাপুৰ লিবাৰেচন অৰ্গেনাইজেচন চমুকৈ কেএলঅ আৰু ভাৰত চৰকাৰৰ মাজত চলি থকা শান্তি আলোচনাৰ প্ৰক্ৰিয়াত শেহতীয়াকৈ বিভাজিত কেএলঅ (কেএন) গোটেও চামিল হৈছে ৷ ইতিমধ্যে সংগঠনটোৰ অধ্যক্ষ জীৱন সিংহৰ নেতৃত্বত চলি থকা আলোচনাত যোগ দিয়া বুলিও বিভাজিত গোটটোৰ ফালৰ পৰা জনোৱা হৈছে ৷ এই সন্দৰ্ভত কেএলঅৰ (কেএন) তৰফৰ পৰা সংবাদ মাধ্যমলৈ প্ৰেৰণ কৰা বিবৃতিত অধ্যক্ষ দাওছাৰ লংকাম কোচে উল্লেখ কৰা মতে সুদীর্ঘ ৩০ বছৰে নানা উত্থান পতন, ঘাত-প্রতিঘাতৰ মাজিদি সংগঠনটোৱে সশস্ত্ৰ সংগ্ৰাম চলাই অহাৰ সময়তে ভাৰত চৰকাৰৰ আহ্বানৰ প্ৰতি সঁহাৰি জনাই শান্তিপূর্ণ দ্বিপাক্ষিক ৰাজনৈতিক আলাপ আলোচনাৰ জৰিয়তে কামতাপুৰ অথবা কোচবিহাৰ ৰাজ্য পুনৰ গঠনৰ বিষয়ে মীমাংসা কৰাৰ বাবে ২০২৩ চনৰ ১৭ জানুৱাৰীত সংগঠনটোৰ অধ্যক্ষ জীৱন সিংহ কোচ ভাৰতত প্রৱেশ কৰে। ইয়াৰ কিছু দিন পিছতে ১৫ মাৰ্চত বৈদেশিক সচিব পাভেল কোচেও ভাৰতত প্রৱেশ কৰে। জীৱন সিংহ ভাৰতত প্রত্যাৱর্তন কৰাৰ লগে লগে প্রিয় নেতাজনৰ সমর্থনত কোচ কামতাপুৰী বুদ্ধিজীৱী মহল, কমতাপুৰ সুৰক্ষা সমিতি (কেএচএচ) আৰু কমতাপুৰ ৰাজ্য দাবী সমিতি (কেএচডিচি) নামৰ ২৮ টা বিভিন্ন সংগঠন ঐক্যবদ্ধ হৈ অতি শীঘ্ৰে সভাপতি জীৱন সিংহৰ লগত শান্তি  চুক্তি স্বাক্ষৰ কৰাৰ বাবে ভাৰত চৰকাৰক সজোৰে দাবী জনায় ৷ ইয়াৰ পিচতে  কামতাপুৰ বা কোচবিহাৰ ৰাজ্য পুনৰ গঠন, কামতাপুৰী বা ৰাজবংশী ভাষাক ভাৰতীয় সংবিধানেৰ অষ্টম অনুসূচীত অন্তর্ভুক্তি, অসম,বংগ আৰু বিহাৰৰ কোচ-ৰাজবংশীক ভৈয়াম জনজাতি বা এছটি (পি)ৰ মৰ্যাদা প্রদান, কেএলঅৰ সমস্ত নেতা,কর্মী, সদস্য তথা এই সংক্রান্তত বিভিন্ন গোচৰত ভুগি থকা সকলোক ৰাষ্ট্ৰপতিৰ দ্বাৰা সাধাৰণ ক্ষমাদান আৰু কেএলঅ নেতা- কেডাৰক পুনস্থাপন এই পাঁচটা দাবীৰ ভিত্তিত ভাৰত চৰকাৰৰ উচ্চস্তৰীয় প্ৰতিনিধিৰ লগত কেইবালানি আলোচনা অনুষ্ঠিত হয় ৷ এই আলোচনাৰ পিচত বিষয়টো চূড়ান্ত পৰ্যায়ত উপনীত হৈছে আৰু বৰ্তমান কেৱল আনুষ্ঠানিক ঘোষণাহে বাকী আছে ৷ ওপৰত উল্লেখ কৰা পাঁচটা দাবীৰ ভিত্তিত আলোচনা প্ৰক্ৰিয়া যিহেতু চূড়ান্ত পৰ্যায়ত উপনীত হৈছে, গতিকে ইমান দিনে আলোচনা প্ৰক্ৰিয়াৰ পৰা দূৰত থকা কেএলঅ( কেএন) গোটেও ভাৰত চৰকাৰৰ আহ্বানত তথা জীৱন সিংহৰ আমন্ত্ৰণত শেহতীয়াভাবে যোৱা ১৮ জুনত ভাৰতত প্ৰৱেশ কৰে আৰু সভাপতি জীৱন সিংহৰ নেতৃত্বত চলি থকা আলোচনা প্ৰক্ৰিয়া অংশ গ্ৰহণ কৰে ৷ বিবৃতিটোত উল্লেখ কৰা মতে বৰ্তমান এএলঅ আৰু কেএলঅ ( কেএন) এক আৰু ঐক্যবদ্ধ ৷ লগতে কেএলঅ (কেএন) তৰফৰ পৰা ইতিমধ্যে কেএলঅৰ অধ্যক্ষ জীৱন সিংহৰ নেতৃত্বত পূৰ্বৰ আলোচনাত উত্থাপন কৰা পাঁচটা দাবীত সহমত ব্যক্ত কৰি সেই দাবীসমূহ পূৰণ কৰাৰ বাবে ভাৰতৰ প্ৰধানমন্ত্ৰী আৰু গৃহমন্ত্ৰীক সংগঠনটোৰ তৰফৰ পৰা আনানুষ্ঠানিক পত্ৰ প্ৰেৰণ কৰিছে ৷ বিবৃতিটোত বিভাজিত গোটৰ অধ্যক্ষগৰাকীয়ে লগতে উল্লেখ কৰে যে জীৱন সিংহ কোচ কেৱল কেএলঅ বা কেএলঅ(কেএন) ৰে নহয় ,বৰঞ্চ সমগ্ৰ কোচ কামতাপুৰী মানুহৰ আবেগ, অহংকাৰ, গৌৰৱ তথা সর্বোচ্চ নেতা। কামতাপুৰ বা কোচবিহাৰ ৰাজ্য পুনর্গঠনৰ জৰিয়তে কোচ কামতাপুৰী মানুুহৰ আত্মনিয়ন্ত্রণৰ অধিকাৰ প্ৰতিষ্ঠাৰ ক্ষেত্ৰত তেওঁ দৃঢ় প্রতিজ্ঞ, আপোচহীন আৰু অদ্বিতীয়।গতিকে কেএলঅৰ অধ্যক্ষ জীৱন সিংহ কোচৰ লগত ভাৰত সৰকাৰৰ আলোচনা প্রক্রিয়া যিহেতু চূড়ান্ত পর্যায়ত উপনীত হৈছে আৰু একমাত্র আনুষ্ঠানিক ঘোষণাহে বাকী আছে,  গতিকে এই মুহুর্তত কোচ কামতাপুৰী জনগণ তথা দল- সংগঠনসমূহক ভাগ ভাগ হৈ নাথাকি কোচ ৰাজবংশী জনগোষ্ঠীৰ বৃহত্তৰ স্বাৰ্থত বৰ্তমান সময়ত  সকলোকে জীৱন সিংহৰ নেতৃত্বত ঐক্যৱদ্ধ হোৱাৰ বাবেও  কেএলঅৰ (কেএন) তৰফৰ পৰা আহ্বান জনায় ৷ উল্লেখ্য যে কেএলঅৰ অধ্যক্ষ জীৱন সিংহৰ নেতৃত্বত একাংশ নেতা - সদস্যই ম্যানমাৰ ত্যাগ কৰি ভাৰতত আহি আলোচনা প্ৰক্ৰিয়া আৰম্ভ কৰাৰ পিছত সংগঠনটো বিভাজিত হৈ কেএলঅ (কেএন) গঠন হৈছিল আৰু আলোচনাৰ বিৰোধিতা কৰিছিল ৷