NEWS 4 BONGAIGAON

👉অসম চৰকাৰৰ নিৰ্দেশ অনুসৰি লকডাউনৰ সময়ত বঙাইগাঁও জিলাত আৱদ্ধ আন জিলাৰ ব্যক্তিক নিজ নিজ গৃহ জিলালৈ প্ৰেৰণ ব্যৱস্থা গ্ৰহণ  

👉প্ৰথমদিনা চিৰাং ,বৰপেটা , বাক্সা , গোৱালপাৰা আৰু ধুবুৰী জিলাৰ লোকসকলক প্ৰেৰণ 

বঙাইগাঁওঃ ২৫ এপ্ৰিলঃ

🔯অসম চৰকাৰৰ নিৰ্দেশ অনুসৰি লকডাউনৰ সময়ত আন জিলাৰ যিসকল ব্যক্তি বঙাইগাঁও জিলাত আৱদ্ধ হৈ আছে সেইসকল ব্যক্তিক আজিৰে পৰা নিজ গৃহ জিলালৈ যোৱাৰ বাবে বঙাইগাঁও জিলা  প্ৰশাসনেও ব্যৱস্থা গ্ৰহণ কৰিছে ৷ জিলা প্ৰশাসনে লকডাউনৰ বাবে আন জিলাৰ পৰা আহি বঙাইগাঁও জিলাত আৱদ্ধ হৈ থকা লোকসকলক অসম ৰাজ্যিক পৰিবহণ নিগমৰ বাছেৰে বঙাইগাঁও গান্ধী ময়দানৰ পৰা নিজ নিজ জিলালৈ পঠোৱাৰ ব্যৱস্থা কৰিছে ৷ প্ৰথম দিনটোত বঙাইগাঁও জিলাৰ পৰা চিৰাং ,বৰপেটা , বাক্সা , গোৱালপাৰা আৰু ধুবুৰী এই পাঁচখন জিলাৰ যিসকল লোক বঙাইগাঁও জিলাত অহাৰ পিছত লকডাউনৰ বাবে আৱদ্ধ হৈ পৰিছিল সেইসকল লোকক নিজ নিজ জিলালৈ যোৱাৰ বাবে সুবিধা প্ৰদান কৰে ৷ 

জিলা প্ৰশাসনৰ তৰফৰ পৰা জানিবলৈ দিয়া মতে এই জিলাকেইখনলৈ যোৱাৰ বাবে ২০৩ জন ব্যক্তিয়ে ১০৪ নম্বৰৰ লগতে অনলাইনযোগে আবেদন কৰিছিল ৷ লোকসকলক উক্ত জিলা কেইখনলৈ কঢ়িয়াই নিয়া বাছসমূহ চেনিটাইজেচন কৰা হৈছে ৷ ইপিনে জিলা উপায়ুক্ত ডাঃ এম এছ লক্ষ্মীপ্ৰিয়াই সংবাদ মাধ্যমৰ আগত কয় যে যিসকল লোকক নিজ নিজ জিলালৈ পঠোৱা হৈছে সেইসকল লোকৰ দুবাৰকৈ স্বাস্থ্য পৰীক্ষা কৰা হৈছে ৷ প্ৰথমে যিজন ব্যক্তি নিজ জিলালৈ যাবলৈ আবেদন কৰিছে তেওঁক প্ৰথমে বৰ্তমান য'ত আছে সেই অঞ্চলৰ ওচৰতে থকা আৰক্ষী থানা বা আৰক্ষী চকীৰ সৈতে যোগাযোগ কৰিবলৈ কোৱা হৈছে ৷ 

সেই ব্যক্তিসকলক আৰক্ষী থানা বা চকীত প্ৰথমে স্বাস্থ্য পৰীক্ষা কৰাৰ পিছত তাৰ পৰা লঘু বাহনেৰে বঙাইগাঁও গান্ধী ময়দানলৈ অনা হৈছে ৷ ইয়াতো পুনৰ তেওঁলোকৰ ক্ৰীণিং তথা স্বাস্থ্য পৰীক্ষা কৰাৰ পিছতহে নিজ জিলালৈ যাবলৈ দিয়া হৈছে ৷ প্ৰশাসনৰ তৰফৰ পৰা এই লোকসকলক খোৱা পানী,বিস্কুট,জুচ যোগান ধৰাৰ লগতে একোটাকৈ মাস্ক দিয়া হৈছে ৷ লগতে প্ৰতিজন ব্যক্তিৰ নাম- ঠিকনা আদি আৰক্ষী থানাৰ লগতে বঙাইগাঁও গান্ধী ময়দানত থকা প্ৰশাসনৰ লোকে পঞ্জীয়ণ কৰি ৰাখিছে ৷ অহা ২৬ আৰু ২৭ এপ্ৰিলতো এইদৰে আন জিলাৰ লোকসকলক প্ৰেৰণ কৰা হ'ব ৷ ইয়াৰ বাবে প্ৰয়োজনীয় বাছ অধিগ্ৰহণ তথা আন যাৱতীয় সকলো ব্যৱস্থা জিলা প্ৰশাসনে গ্ৰহণ কৰিছে ৷  

                                News4Bongaigaon