NEWS 4 BONGAIGAON

👉বঙাইগাঁও জিলাৰ ৩ নং জামদহাত কাৰ্ড নথকা হিতাধিকাৰীক এহেজাৰ টকা বিতৰণৰ নামত দুৰ্নীতিৰ অভিযোগ👈

                    🔯বঙাইগাঁওঃ ৯ এপ্ৰিলঃ 

     🔯কোভিড-১৯ ৰ ভয়াৱহতাৰ প্ৰতি লক্ষ্য ৰাখি সমগ্ৰ দেশত চলি থকা লকডাউনৰ ফলত সাধাৰণ শ্ৰেণীৰ কৃষক, শ্ৰমিক, ক্ষুদ্ৰ ব্যৱসায়ী আদিৰ পানীত হাঁহ নচৰা অৱস্থাৰ দৰে এক অচলাৱস্থাই বিৰাজ কৰা পৰিলক্ষিত হৈছে গ্ৰাম্যাঞ্চল সমূহত। এনে অৱস্থাত চৰকাৰে ৰেচন কাৰ্ড নথকা হিতাধিকাৰীক এহেজাৰ টকাকৈ প্ৰদান কৰাত কিছু সকাহ অনুভৱ কৰিছিল গ্ৰাম্যাঞ্চলৰ সাধাৰণ লোকে। কিন্তু চৰকাৰে আগবঢ়োৱা এই অনুদানৰ ওপৰতো ৰাইজে নিৰ্বাচন কৰি পঠোৱা জনপ্ৰতিনিধিয়ে ভূতৰ ওপৰত দানৱ পৰাদি দুৰ্নীতি কৰিবলৈ লোৱাত  প্ৰতিক্ৰিয়াৰ সৃষ্টি হৈছে। বঙাইগাঁও জিলাৰ ভাণ্ডাৰা গাঁও পঞ্চায়তত হিতাধিকাৰীৰ পৰা ১০০ টকাকৈ উৎকোচ লোৱাৰ অভিযোগ উত্থাপিত হৈছে  ৷ জিলাখনৰ ৩ নং জামদহাত এই ঘটনা সংঘটিত হৈছে । ৮ নং ভাণ্ডাৰা গাওঁ পঞ্চায়তৰ অন্তৰ্গত ৩ নং জামদহা গাঁৱৰ সদস্যা পদ্মাৱতী বৰুৱাই কাৰ্ড নথকা লোক সকলক চৰকাৰে প্ৰদান কৰা এহেজাৰ টকা বিতৰণৰ নামত দুৰ্নীতি কৰা বুলি এক গুৰুতৰ অভিযোগ উত্থাপন হৈছে। পদ্মাৱতী বৰুৱাই প্ৰতিজন হিতাধিকাৰীৰ পৰা এহেজাৰ টকা দিয়াৰ নামত এশ টকাকৈ উৎকোচ লোৱা বুলি অভিযোগ উত্থাপন কৰিছে খোদ হিতাধিকাৰীয়ে। ইয়াৰোপৰি সদস্যাগৰাকীৰ বিৰুদ্ধে কাৰ্ড নথকা ব্যক্তিক বঞ্চিত কৰি কাৰ্ড থকা ব্যক্তিক উক্ত ধন প্ৰদান কৰা বুলিও অভিযোগ উত্থাপন কৰিছে স্থানীয় লোকে। আনফালে একে সময়তে সদস্যাগৰাকীৰ বিৰুদ্ধে গাওঁখনৰ বিধৱা মহিলা সকলক বিধৱা পেঞ্চন পোৱাৰ ব্যৱস্থা কৰি দিয়াৰ নামতো ২০০, ৩০০ টকাকৈ উৎকোচ লোৱা বুলি আন এক গুৰুতৰ অভিযোগ উত্থাপিত হৈছে। ইফালে উত্থাপিত উক্ত দুৰ্নীতিৰ অভিযোগ সন্দৰ্ভত সদস্যা পদ্মাৱতী বৰুৱাৰ পৰা প্ৰতিক্ৰিয়া জানিব বিচৰাত হিতাধিকাৰী তথা মহিলাসকৰ অভিযোগ পোনচাতেই নাকচ কৰি এয়া মিছা অভিযোগ বুলি মন্তব্য কৰে।এইক্ষেত্ৰত বিভাগীয় কৰ্তৃপক্ষই সদস্যা গৰাকীৰ বিৰুদ্ধে কি ব্যৱস্থা গ্ৰহণ কৰে সেয়া সময়তহে লক্ষণীয় হ'ব।🔯