NEWS 4 BONGAIGAON

👉বহিঃৰাজ্যৰ পৰা বঙাইগাঁৱত উপস্থিত ৮৬৩ জন লোক

👉সাজু ৭৫০ ৰো অধিক পৃথকীকৰণ কেন্দ্ৰ 

                                     বঙাইগাঁওঃ৩০ মেঃ

🔯বহিঃৰাজ্যৰ পৰা ৰে'ল আৰু বাছ চলাচলকলৈ আশংকা বৃদ্ধি হৈ থকা সময়তে এই পৰিস্থিতিৰ সৈতে মোকাবিলা কৰাৰ বাবে বিস্তৃত ব্যৱস্থা গ্ৰহণ কৰিছে বঙাইগাঁও জিলা প্ৰশাসন আৰু স্বাস্থ্য বিভাগে৷ উল্লেখ্য যে যোৱা ৪ মে’ত আন্তঃৰাজ্যিক যাতায়ত আৰু ১২ মে’ৰ পৰা বিশেষ শ্ৰমিক ৰে'লৰ চলাচল আৰম্ভ হোৱাৰ পাছত জিলাখনলৈ এতিয়ালৈকে ৮৬৩ জন লোকৰ আগমণ ঘটিছে৷ এতিয়ালৈকে বহিঃৰাজ্যৰ পৰা ৰে'লযোগে ১৬৫ জন লোক আৰু বাছেৰে ৬৯৮ জন লোক আহি জিলাখনত উপস্থিত হৈছে৷ এই সকলো লোককে ইতিমধ্যে পৃথকীকৰণ কেন্দ্ৰলৈ প্ৰেৰণো কৰা হৈছে৷ জিলাখনত আনুষ্ঠানিক পৃথকীকৰণৰ বাবে ৭৫০ টাৰো অধিক অনুষ্ঠানৰ ব্যৱস্থা আছে৷ ইয়াত বৰ্তমান  ১,৪০২  জন লোক আনুষ্ঠানিক পৃথকীকৰণত আছে৷

জিলাখনৰ ৩৫২ জনক আনুষ্ঠানিক পৃথকীকৰণ সম্পূৰ্ণ হোৱাত গৃহ পৃথকীকৰণৰ বাবে যাবলৈ দিয়া হৈছে৷ সৰ্বমুঠ ৭,৭৬৪ জন লোক গৃহ পৃথকীকৰণত আছিল৷ জিলাখনত মুঠ ৩,২৭৩ জনৰ কোৰোনাৰ নমুণা পৰীক্ষা সম্পন্ন হৈছে৷ আনহাতে অসম সামূহিক নিৰীক্ষণ আঁচনিৰ অধীনত বঙাইগাঁৱত ১০ জন লোকৰ  ক’ভিডৰ নমুণা সংগ্ৰহ কৰা হয়৷ জিলাখনৰ ৪৬৭ খন গাঁৱৰ ৫ লাখ লোকক সামৰি লোৱা এই আঁচনিৰ দ্বাৰা ১৩,৭২৩ জনৰ স্বাস্থ্য পৰীক্ষা কৰা হয়৷ এই নিৰীক্ষণত ১০ জন লোকৰ দেহত ইনফ্লুৱেঞ্জা-সদৃশ ৰোগ আৰু ১২৯ জনৰ জ্বৰ ধৰা পৰে৷ জিলাখনত এজনো  শ্বাস-প্ৰশ্বাসজনিত সমস্যাৰ ৰোগী ধৰা নপৰাৰ বিপৰীতে  আৰু ১২৫ জনৰ মেলেৰিয়াৰ বাবে ৰেপিড্ ডায়েগ্ন'ষ্টিক কিট (Rapid Diagnistic Kit) ৰ সহায়ত পৰীক্ষা কৰা হয়৷ উল্লেখ্য যে জিলাখনৰ নিউ বঙাইগাঁও ৰে’লৱে জংচন, উত্তৰ বঙাইগাঁও উচ্চ বিদ্যালয়, বঙাইগাঁও অসামৰিক চিকিৎসালয় স্থিত জিলা জনস্বাস্থ্য পৰীক্ষাগাৰ, অভয়েশ্বৰী মহাবিদ্যালয় আৰু উঃ মাঃ বিদ্যালয় আৰু পাৰ্শ্বৱৰ্তী অঞ্চলত থকা পৃথকীকৰণ কেন্দ্ৰ সমূহত ক’ভিডৰ নমুণা সংগ্ৰহ কেন্দ্ৰ স্থাপন কৰা হৈছে বুলি স্বাস্থ্য বিভাগৰ এক প্ৰেছ টোকাত উল্লেখ কৰিছে ৷