NEWS 4 BONGAIGAON

👉বঙাইগাঁও জিলাৰ পঞ্চগাঁওৰ যুৱকৰ দেহত ধৰা পৰিল কভিড-১৯ পজিটিভ 

👉উন্নত চিকিৎসাৰ বাবে বৰপেটা চিকিৎসা মহাবিদ্যালয়লৈ প্ৰেৰণ

                      বঙাইগাঁওঃ ৩০ মেঃ 

🔯কোৰোনা মহামাৰীয়ে ৰাজ্যখনত ক্ৰমাৎ ভয়াৱহ ৰূপ ধাৰণ কৰাৰ সময়তে আজি পুনৰ বঙাইগাঁও জিলাৰ এজন ওঠৰ বছৰীয়া যুৱকৰ দেহত কোভিড- ১৯ পজিটিভ ধৰা পৰিছে ৷ বহিঃ ৰাজ্যৰ পৰা অহা যুৱকজন প্ৰতিষ্ঠানিক কোৱাৰেণ্টাইনত আছিল ৷ জানিব পৰা মতে জিলাখনৰ বইটামাৰী ব্লক প্ৰাথমিক স্বাস্থ্য কেন্দ্রৰ অন্তৰ্গত 'ধনতোলা এম ভি স্কুল'ৰ কোৱাৰেণ্টাইন চেণ্টাৰত থকা কোভিড-১৯ ত আক্ৰান্ত যুৱকজন নোৱাজ উদ্দিনৰ পুত্ৰ আব্দুল লতিফ আহমেদ। যুৱকজন হায়দৰাবাদৰ পৰা আহিছিল ৷ উল্লেখ্য যে ঈদৰ আগদিনা অৰ্থাৎ ২৪ মে'ত যুৱকজন বঙাইগাঁও জিলাৰ বইটামাৰীৰ সমীপৰ পঞ্চগাঁওৰ নিজ ঘৰলৈ ঘুৰি আহিছিল ৷ এদিন নিজ ঘৰত কটোৱাৰ পিচত ২৫ মেৰ পৰা  যুৱকজনক ধনতোলা এম ভি স্কুল'ৰ কোৱাৰেণ্টাইন কেন্দ্ৰত ৰখা হৈছিল। এনে অৱস্থাতে আজি নমুনা পৰীক্ষাৰ ফলাফলত যুৱকজনৰ দেহত কোভিড- ১৯ পজিটিভ ধৰা পৰে ৷ 

যুৱকজন কোভিড- ১৯ ত আক্ৰান্ত বুলি জিলা স্বাস্থ্য বিভাগে তথ্য লাভ কৰাৰ পিচতে স্বাস্থ্য বিভাগৰ এটা দল কোৱাৰেণ্টাইন কেন্দ্ৰত উপস্থিত হয় আৰু উন্নত চিকিৎসাৰ বাবে যুৱকজনক ১০৮ ৰে বৰপেটা চিকিৎসা মহাবিদ্যালয়লৈ লৈ যায় ৷ ইপিনে জিলা প্ৰশাসনৰ পৰা জানিব পৰা মতে যুৱকজনৰ নমুনা ধুবুৰী জিলাত লৈছিল ৷ জানিব পৰা মতে আব্দুল লতিফ আহমেদৰ নমুনা ধুবুৰী জিলাৰ বিলাসীপাৰাত লৈছিল আৰু তাতে সাতদিন কোৱাৰেণ্টাইনত আছিল ৷ তাৰ পিছতহে বঙাইগাঁও জিলালৈ আহিছিল ৷ যুৱকজনসহ মুঠ ৪৭ জন বিভিন্ন জিলাৰ শ্ৰমিকে হায়দৰাবাদৰ পৰা বাছ ভাড়া কৰি আহিছিল বুলিও জানিব পৰা গৈছে ৷ উল্লেখ্য যে ইতিপূৰ্বে কোভিড-১৯ ত আক্ৰান্ত হোৱা বঙাইগাঁও জিলাৰ পাঁচজনকৈ ব্যক্তি ইতিমধ্যে চিকিৎসা লাভ কৰি সুস্থ হৈছে ৷ আগৰ পাঁচজন আক্ৰান্তকে ধৰি জিলাখনত বৰ্তমানলৈকে কোভিড- ১৯ ত আক্ৰান্তৰ সংখ্যা ছয় জনলৈ বৃদ্ধি পালে ৷🔯