NEWS 4 BONGAIGAON

👉বঙাইগাঁও জিলা অগপৰ সম্পাদক, শিক্ষক তথা সাংস্কৃতিক কৰ্মীৰ অকাল বিয়োগ

👉বঙাইগাঁৱত শোকৰ ছাঁ 

                        বঙাইগাঁওঃ১৩ মেঃ

🔯অসম গণ পৰিষদ দলৰ বঙাইগাঁও জিলা সমিতিৰ সম্পাদক, শিক্ষক, সমাজকৰ্মী তথা বিশিষ্ট সাংস্কৃতিক কৰ্মী বিশ্বজিত ঘোষ দস্তিদাৰ (৫৩ ) ওৰফে শংকু ঘোষ দস্তিদাৰৰ বুধবাৰে পুৱতি নিশা বিয়োগ ঘটে ৷ উল্লেখ্য যে বিশিষ্ট ব্যক্তিগৰাকীৰ অকাল বিয়োগত গভীৰ শোকৰ ছাঁ পৰে ৷ বঙাইগাঁও চহৰখনত শংকু ছাৰ হিচাপে পৰিচিত আছিল বিশ্বজিৎ ঘোষ দস্তিদাৰ ৷ তেওঁ বঙাইগাঁৱৰ সামাজিক, ৰাজনৈতিক আৰু সাংস্কৃতিক জগতৰ সৈতে আছিল জড়িত ৷ বঙাইগাঁও ৰে'লৱে স্কুলত শিক্ষা জীৱনৰ পাতনি মেলা বিশ্বজিৎ ঘোষে পাছত শিক্ষকতাৰ বৃত্তি বাছি লয় ৷ প্ৰথমতে তেওঁ বঙাইগাঁও উচ্চতৰ মাধ্যমিক বিদ্যালয় (ইংৰাজী মাধ্যম) ত শিক্ষকতাত যোগদান কৰে ৷ পৰৱৰ্তী সময়ত তেওঁ নিউ বঙাইগাঁওস্থিত বিবেকানন্দ বিদ্যাপীঠ উচ্চতৰ মাধ্যমিক বিদ্যালয়ত শিক্ষকতাত যোগদান কৰে ৷ মৃত্যুৰ আগলৈ তেওঁ  উক্ত বিদ্যালয়তে শিক্ষক হিচাপে কৰ্মৰত আছিল ৷ 

ৰাজনৈতিক জীৱনতো তেওঁৰ ভূমিকা আছিল অপৰিসীম ৷বিশেষকৈ বঙাইগাঁও চহৰৰ উত্তৰ অংশত অগপ দলৰ গণভিত্তি ধৰি ৰাখিবলৈ তেওঁৰ ভূমিকা আছিল সকলোৰে উৰ্দ্ধত ৷ প্ৰতিটো পৌৰসভা নিৰ্বাচনতে বঙাইগাঁৱত একক সংখ্যা গৰিষ্ঠতা লাভ কৰি অগপ দলে পৌৰসভা গঠন কৰাৰ ক্ষেত্ৰতো তেওঁৰ ভূমিকা আছিল অন্যতম ৷ স্বচ্ছ আৰু নিকা ভাবমূৰ্তীৰ বাবে তেওঁৰ গণভিত্তি আছিল প্ৰবল ৷ বঙাইগাঁৱৰ স্থানীয় বিধায়ক তথা খাদ্য আৰু অসামৰিক  যোগান বিভাগৰ মন্ত্ৰী ফণীভূষণ চৌধুৰী দীৰ্ঘদিন ধৰি বঙাইগাঁও বিধান সভাৰ পৰা জয়ী হৈ অহাৰ আঁৰতো এইজন ব্যক্তিৰ আছিল অন্যতম  ভূমিকা ৷ বিশেষকৈ চহৰ খনৰ বঙালী প্ৰধান অঞ্চলত অগপ দলৰ গণভিত্তি দীৰ্ঘদিন ধৰি অটুত ৰাখিবলৈ সক্ষম হৈছিল ৷ যাৰ বাবে ফনীভূষন চৌধুৰীৰো সোহাঁতস্বৰূপ আছিল তেওঁ ৷ চহৰ খনৰ অতি পিছপৰা ৱাৰ্ড পালপাৰাত ৰবীন্দ্ৰ ভৱন স্থাপন কৰাৰ ক্ষেত্ৰতো তেওঁ লৈছিল আগভাগ

সাংস্কৃতিক জগতৰ ক্ষেত্ৰতো তেওঁৰ ভূমিকা আছিল অপৰিসীম ৷ বঙাইগাঁৱত প্ৰতি বছৰে অনুষ্ঠিত হোৱা সদৌ ভাৰত ভিত্তিত নাট প্ৰতিযোগিতা তেওঁৰ নেতৃত্বতে হৈছিল ৷ অল ইন্ডিয়া ড্ৰামা ফেষ্টিভেল কমিটিৰ সভাপতি পদতো কাৰ্যনিৰ্বাহ কৰিছিল ৷ পৰৱৰ্তী পৰ্যায়ত তেওঁৰ নেতৃত্বতে আন্তৰ্জাতিক ভিত্তিত অনুষ্ঠিত হয় এই প্ৰতিযোগিতা ৷ তেওঁৰ পিতৃ আছিল ৰে'ল বিভাগৰ কৰ্মচাৰী প্ৰয়াত বাদল ঘোষ দস্তিদাৰ আৰু মাতৃ  প্ৰয়াত প্ৰতিমা ঘোষ দস্তিদাৰ ৷ জানিব পৰা মতে  এই বিশিষ্ট ব্যক্তি গৰাকীয়ে বিগত প্ৰায় এবছৰ ধৰি যকৃতৰ বেমাৰত ভুগি আছিল ৷ শেহতীয়াকৈ বঙাইগাঁও এছ এম হস্পিতাল এন্ড ৰিছাৰ্ছ চেন্টাৰ নামৰ ব্যক্তিগত খন্ডৰ  নাৰ্ছিংহোমত চিকিৎসাধীন হৈ আছিল ৷ চিকিৎসাধীন অবস্থাতে আজি পুৱতি নিশা উক্ত নাৰ্ছিংহোমতে  মৃত্যু ঘটে তেওঁৰ ৷ মৃতদেহটো প্ৰথমে তেওঁৰ শালবাগানস্থিত  নিজ বাসভৱনত লৈ যোৱাৰ পাছত পালপাৰাস্থিত ৰবীন্দ্ৰ ভৱনত লৈ যোৱা হয় ৷ ইয়াৰ পাছতে বঙাইগাঁও জিলা অগপ দলৰ কাৰ্যালয়লত লৈ যোৱা হয় ৷ জিলা অগপ দলৰ  কাৰ্যালয়তে অন্তিম শ্ৰদ্ধা নিবেদন কৰাৰ পিছত তেওঁৰ শেষকৃত্য কাৰ্য সম্পন্ন কৰা হয় বঙাইগাঁও শ্মশানত ৷ উল্লেখ্য যে তেওঁৰ মৃত্যুৰ খবৰ পোৱাৰ  লগে লগে মন্ত্ৰী ফণীভূষণ চৌধুৰী তেওঁৰ বাসভৱনত উপস্থিত হোৱাৰ লগতে প্ৰতিটো কাৰ্যতে অংশগ্ৰহণ কৰে মন্ত্ৰী গৰাকীয়ে ৷ মৃত্যুৰ সময়ছোৱাত তেওঁ পত্নী প্ৰতিমা ঘোষ দস্তিদাৰ আৰু একমাত্ৰ পুত্ৰ বাদলৰ লগতে অগণন গুনমুগ্ধক এৰি থৈ যায় ৷ উল্লেখ্য যে এই বিশিষ্ট ব্যক্তিগৰাকীৰ মৃত্যুত  বঙাইগাঁও উত্তৰ অংশত অগপ দল হৈ পৰিল অভিভাৱকহীন স্বৰূপ ৷