NEWS 4 BONGAIGAON

👉বঙাইগাঁও জিলাৰ  বইটামাৰী মডেল হাস্পতালৰ সহকাৰী মেট্ৰনৰ বিৰুদ্ধে দীৰ্ঘদিন ধৰি নিজ কৰ্তব্যস্থলীত উপস্থিত নথকাৰ অভিযোগ 

👉চিকিৎসালয়ত অনুপস্থিত থাকিও আদায় কৰিছে নিয়মিত দৰমহা 

                              বঙাইগাঁওঃ ১৪ মেঃ 

🔯বঙাইগাঁও জিলাৰ বইটামাৰী মডেল হাস্পতালৰ সহকাৰী মেট্ৰনগৰাকী দীর্ঘদিন ধৰি চিকিৎসালয়খনত অকৰ্তৃত্বশীল ভাৱে অনুপস্থিত থকাৰ গুৰুতৰ অভিযোগ উত্থাপিত হৈছে। প্ৰাপ্ত অভিযোগ মতে কোৰোনা ভাইৰাছৰ সংক্ৰমণ প্ৰতিৰোধকল্পে কেন্দ্রীয় চৰকাৰে ঘোষণা কৰা জনতা কাৰ্ফিউ আৰু লকডাউনৰ পূৰ্বৰে পৰা অৰ্থাৎ ২০ মাৰ্চৰ পৰাই বইটামাৰী মডেল হাস্পতালৰ সহকাৰী মেট্ৰন পুষ্পা দত্তই চিকিৎসালয়খনত অনুপস্থিত হৈ আছে ৷ আশ্চৰ্যজনক কথা এয়ে যে চিকিৎসালয়খনৰ সহকাৰী মেট্ৰন পুষ্পা দত্তই হাস্পতালখনত দীর্ঘদিন ধৰি অকৰ্তৃত্বশীল ভাৱে অনুপস্থিত থকাৰ  পিছতো কিন্তু তেওঁ মাৰ্চ আৰু এপ্রিল মাহৰ দৰমহা গ্ৰহণ কৰিবলৈ সক্ষম হৈছে ৷ এয়া কেনেকৈ সম্ভৱ হ'ল ,তাকে লৈ এতিয়া প্ৰশ্ন উত্থাপিত হৈছে। কাৰণ এগৰাকী চৰকাৰী কৰ্মচাৰীয়ে তেওঁৰ কৰ্মস্থলীত দহদিনতকৈ অধিক দিন অনুপস্থিত থাকিলে কৰ্মচাৰী গৰাকীয়ে আৰ্ণ লিভ( Earn leave) ল'ব লাগিব। কিন্তু প্ৰাপ্ত অভিযোগ মতে  চিকিৎসালয়খনৰ সহকাৰী মেট্ৰন পুষ্পা দত্তই কৰ্মস্থলীত অনুপস্থিত থাকিলেও উৰ্ধতম কৰ্তৃপক্ষৰ ফালৰ পৰা ছুটি লোৱা নাই। তাৰোপৰি বৰ্তমান কোৰোনা ভাইৰাছৰ সংক্ৰমণৰ ভয়াৱহতাৰ প্ৰতি লক্ষ্য ৰাখি  অতি জৰুৰী নহ'লে স্বাস্থ্য সেৱা বিভাগৰ কৰ্মচাৰী সকলৰ ছুটি গ্ৰাহ্য নহয়। সেইদৰে সহকাৰী মেট্ৰন পুষ্পা দত্তই চাকৰিৰ পৰা স্বেচ্ছাই অৱসৰ বিচাৰি আবেদনো কৰা নাই। তাৰ পিছতো কিদৰে নিজৰ কৰ্মস্থলীত অনুপস্থিত আছে সেয়াহে প্ৰশ্নৰ বিষয় হৈ পৰিছে ৷ ইপিনে উত্থাপিত অভিযোগ মতে হাস্পতালখনৰ সহকাৰী মেট্ৰন পুষ্পা দত্ত হেনো বইটামাৰী মডেল হাস্পতালখনৰেই অধীক্ষক তথা বইটামাৰী ব্লক প্ৰাথমিক স্বাস্থ্য কেন্দ্রৰ ভাৰপ্ৰাপ্ত মহকুমা স্বাস্থ্য আৰু চিকিৎসা বিষয়া ডাঃ গোপাল চন্দ্র ৰয়ৰ সহধৰ্মিনী। সেয়ে হয়তো তাৰেই সুবাদতে চিকিৎসালয়খনৰ সহকাৰী মেট্ৰন দত্তই জিলা স্বাস্থ্য সেৱা বিভাগ তথা চৰকাৰক ফাঁকি দি অনৈতিক পন্থা গ্রহণ কৰি কৰ্মস্থলীত অনুপস্থিত থাকিবলৈ সক্ষম হোৱাৰো অভিযোগ উঠিছে ৷ অনহাতে চিকিৎসালয়খনৰ সহকাৰী মেট্ৰনগৰাকী ইয়াৰ পূর্বেও দীর্ঘদিন অনুপস্থিত থকাৰ বাবে তেওঁক বিভাগীয় উৰ্ধতম কৰ্তৃপক্ষই মাহিলী দৰমহা বন্ধ ৰাখি জবাবদিহিও কৰিছিল। ইপিনে আন এক অভিযোগ অনুসৰি হাস্পতালৰ সহকাৰী মেট্ৰন পুস্পা দত্তই যিদিনাৰ পৰা কৰ্মস্থলীত অনুপস্থিত হৈ আছে , সিদিনাৰ পৰাই বইটামাৰী মডেল হাস্পতালখনৰ কৰ্মচাৰীসকলৰ দৈনিক উপস্থিতিৰ যিখন বহীত স্বাক্ষৰ কৰে সেই বহীখনো অন্তৰ্ধ্যান হৈ আছে ৷ উপস্থিতিৰ বহীখন বিচাৰি পোৱা নাই কৰ্মচাৰীসকলে। যাৰ বাবে চিকিৎসালয়ত নিতৌ উপস্থিত হৈ কৰ্তব্য পালন কৰিও কৰ্মচাৰী সকলে উপস্থিতিৰ বহীত স্বাক্ষৰ নকৰাকৈয়ে উভতি যাবলগীয়া হৈছে । উল্লেখ্য যে হাস্পতালৰ আন কৰ্মচাৰীসকলে দৈনিক উপস্থিতিৰ স্বাক্ষৰ কৰা বহীখন কলৈ গ'ল বুলি প্ৰশ্ন কৰাৰ বিপৰীতে হাস্পতালখনৰ অধীক্ষক ডাঃ গোপাল চন্দ্ৰ ৰয়ে উপস্থিতিৰ বহীখন নাথাকিলেও কৰ্মচাৰীসকলে নিয়মিত মাহিলী দৰমহা পাইয়ে থাকিব বুলি কৰ্মচাৰীক সান্তনা দি অহা বুলিহে অভিযোগ উত্থাপিত হৈছে ৷ সেইদৰে হাস্পতালখনৰ কৰ্মচাৰীসকলৰ দৈনিক উপস্থিতিৰ বহীত উপস্থিতিৰ স্বাক্ষৰ নোহোৱাকৈ বৰ্তমানৰ কোৰোনা ভাইৰাছৰ ভয়াৱহতাৰ সময়য়তো প্ৰত্যেক মাহৰ ২১ তাৰিখে জিলাৰ যুটীয়া স্বাস্থ্য সেৱা সঞ্চালকৰ কাৰ্যালয়লৈ স্বাস্থ্য সেৱা প্ৰতিষ্ঠানখনৰ কৰ্মচাৰী সকলৰ দৰমহা আদায়ৰ বাবে কিদৰে প্ৰতিবেদন পঠিয়াই আছে, তাকে লৈ প্ৰশ্ন উত্থাপিত হৈছে। একেদৰে স্বাস্থ্য সেৱা প্ৰতিষ্ঠানখনৰ কৰ্মচাৰী সকলৰ উপস্থিতিৰ স্বাক্ষৰ কৰা বহীখন নোহোৱা হোৱাৰ পিছতো কিন্তু তাকলৈ অধীক্ষকগৰাকীৰ কোনো ভ্ৰূক্ষেপ নাই বুলিহে অভিযোগ উঠিছে ৷ এই ক্ষেত্রত হাস্পতালখনৰ একাংশ কৰ্মচাৰীয়ে সমগ্ৰ বিষয়টো সন্দৰ্ভত জিলাৰ যুটীয়া স্বাস্থ্য সেৱা সঞ্চালক আৰু বঙাইগাঁও জিলাৰ উপায়ুক্তৰ হস্তক্ষেপ দাবী কৰিছে।🔯