NEWS 4 BONGAIGAON

👉বঙাইগাঁৱৰ চাপৰাকাটা কোৱাৰেণ্টাইন কেন্দ্ৰৰ ১৩ ব্যক্তিক যাবলৈ দিয়া হ'ল ঘৰলৈ 

👉গছপুলি ৰোপন কৰিলে কেন্দ্ৰটোৰ চৌহদত

👉উপস্থিত থাকিল মন্ত্ৰী ফণীভূষণ চৌধুৰী- জিলা উপায়ুক্ত

বঙাইগাঁওঃ ২৯ মেঃ

🔯 বঙাইগাঁৱৰ চাপৰাকাটা এম ভি স্কুলৰ প্ৰতিষ্ঠানিক কোৱাৰেণ্টাইনত থকা ১৩ জন ব্যক্তিক আজি তেওঁলোকৰ প্ৰতিষ্ঠানিক কোৱাৰেণ্টাইনৰ ম্যাদ শেষ হোৱাত তথা তেওঁলোকৰ নমুনাৰ ফলাফল নিগেটিভ অহাত নিজ নিজ ঘৰলৈ যাবলৈ দিয়া হয় ৷ ব্যক্তিসকলে ঘৰলৈ যোৱাৰ পূৰ্বে বিদ্যালয়ৰ চৌহদত একোডালকৈ গছ পুলিও ৰোপন কৰে ৷ ব্যক্তিসকলক কোৱাৰেণ্টাইন কেন্দ্ৰৰ পৰা আনুষ্ঠানিকভাৱে বিদায় জনোৱাৰ সময়ত স্থানীয় বিধায়ক তথা মন্ত্ৰী ফণীভূষণ চৌধুৰী, জিলা উপায়ুক্ত ডাঃ এম এচ লক্ষ্মীপ্ৰিয়া, অতিৰিক্ত উপায়ুক্ত ৰিণ্টু বড়ো আদি উপস্থিত থাকে ৷ লগতে তেওঁলোকেও গছ পুলি ৰোপন কৰে ৷ মন্ত্ৰী চৌধুৰীয়ে এই পদক্ষেপক প্ৰশংসা কৰি কয় যে ইয়াৰ পৰা ঘৰলৈ যোৱাৰ পিচতো যিসকলে গছ পুলি ৰোপন কৰিলে তেওঁলোকৰ এটা চিন ৰৈ যাব ৷ লগতে বিদ্যালয়খনৰ প্ৰতি তেওঁলোকৰ এটা আন্তৰিকতাও বৃদ্ধি পাব ৷ সেইদৰে ভৱিষ্যতলৈ এই বিদ্যালয়খনত সামাজিক পৰিৱেশ সৃষ্টি হ'ব আৰু সমাজখন কিছুহলেও উপকৃত হ'ব ৷ 

আনহাতে জিলা প্ৰশাসনে গ্ৰহণ কৰা 'মিলিজুলি' প্ৰকল্প সন্দৰ্ভত মন্ত্ৰীগৰাকীয়ে কয় যে কোৰোনা ভাইৰাছৰ বিৰুদ্ধে চলি থকা যুঁজখনত বিজয়ী হ'ব লাগিলে সকলোৰে সহযোগিতা লাগিব ৷ আমি বেলেগে বেলেগে যুঁজখনত অৱতীৰ্ণ হ'লে কেতিয়াও জয়ী হ'ব নোৱাৰিম ৷ গতিকে আমি সকলোৱে মিলিজুলি এই কোৰোনা ভাইৰাছ প্ৰতিৰোধী যুঁজখন চলাই যাব লাগিব আৰু যেতিয়া আমি সকলোৱে মিলিজুলি এই কোৰোনা বিৰোধী যুঁজখন চলাই যাম তেতিয়া এটা সময়ত আমি জয়ী হ'ম ৷ এই প্ৰচেষ্টাৰ অংশ হিচাপেই 'মিলিজুলি'প্ৰকল্পটো প্ৰৱৰ্তন কৰা হৈছে ৷ 

ইপিনে কেন্দ্ৰটোৰ ব্যক্তিসকলক বিদায় দিয়াৰ পূৰ্বে বঙাইগাঁও জিলাৰ উপায়ুক্তই আনুষ্ঠানিকভাবে তেওঁঁ লোকক প্ৰতিষ্ঠানিক কোৱাৰেণ্টাইন সম্পূৰ্ণ কৰাৰ  প্ৰমাণ পত্র প্ৰদান কৰে আৰু প্ৰতিৰোধমূলক পদক্ষেপসমূহ মানি চলি থকাৰ বাবে আহ্বান জনায় । উল্লেখ্য যে 'মিলিজুলি' প্ৰকল্পৰ অধীনত যিসকল প্ৰতিষ্ঠানিক কোৱাৰেণ্টাইনত থকা লোকৰ নমুনাৰ পৰীক্ষাৰ ফল নিগেটিভ পোৱাৰ পিচত কোৱাৰেণ্টাইন কেন্দ্ৰৰ পৰা মুকলি কৰি ঘৰলৈ যাবলৈ দিয়া হ'ব, সেইসকলক কোৱাৰেন্টাইন কেন্দ্ৰটোৰ চৌহদত গছ পুলি ৰোপণ কৰিবলৈ বঙাইগাঁও জিলা উপায়ুক্তই সকলোকে অনুৰোধ জনায়। মিলিজুলি প্ৰকল্পৰ অধীনত বঙাইগাঁও জিলা প্ৰশাসনৰ উদ্যোগত স্থানীয় লোকসকলে কোৱাৰেণ্টাইন কেন্দ্ৰসমূহৰ পৰিচালনাৰ স্বেচ্ছাসেৱক হিচাপে কাম কৰি আছে। নিশাৰ ভাগত লোকসকলে কেন্দ্ৰসমূহক সুৰক্ষা প্ৰদান কৰি জিলা প্ৰশাসনক সহায় কৰি আহিছে আৰু অন্যান্য ৰাজ্যৰ পৰা নতুনকৈ গাঁৱত প্ৰৱেশকাৰী সকলৰ তথ্য যোগান ধৰি প্ৰথম সাত দিনৰ প্ৰতিষ্ঠানিক কোৱাৰেণ্টাইনত থকাৰ পৰা যাতে কোনেও বাদ পৰি নেযায় সেই দিশটো চোৱা- চিতা কৰি আছে।