NEWS 4 BONGAIGAON

👉চিৰাঙত সেনা-আৰক্ষীৰ যৌথ অভিযানত বৃহৎ পৰিমাণৰ অস্ত্ৰ ভাণ্ডাৰ উদ্ধাৰ 

              বঙাইগাঁওঃ ১৫ জুনঃ 

🔯সোমবাৰে চিৰাঙত অসম আৰক্ষী ,ভাৰতীয় সেনাৰ ১৫ নং গাৰোৱাল ৰাইফলছ, এছ এছ বিৰ ৬ নং বেটেলিয়ন আৰু চি আৰ পি এফৰ ২১০ নং কোব্ৰা কমাণ্ডো বাহিনীৰ যৌথ অভিযানত বৃহৎ পৰিমাণৰ অস্ত্ৰ ভাণ্ডাৰ উদ্ধাৰ হয়। জিলাখনৰ ৰুণীখাতা আৰক্ষী থানাৰ অন্তৰ্গত ভাৰত-ভূটান সীমান্তৰ খুুংগ্ৰীং বনাঞ্চলৰ ঘন অৰণ‍্যৰ মাজত মাটিত পুতি থোৱা অৱস্থাত এই অস্ত্ৰ - শস্ত্ৰখিনি অভিযানকাৰী দলে উদ্ধাৰ কৰে ৷ উল্লেখ্য যে কিছু দিনৰ পৰা সেনা বাহিনীৰ চোৰাং চোৱা সূত্ৰই তথ‍্য লাভ কৰি আছিল আৰু তাৰ পিছৰে পৰা অভিযান অব্যাহত ৰাখিছিল অভিযানকাৰী দলে ৷ অৱশেষত ঘন অৰণ‍্যত বিগত ১২ দিনৰ পৰাই অভিযান চলাই এই সফলতা লাভ কৰে ।

মেটেল ডিটেক্টৰৰ সহায়ত মাটিত পুতি থোৱা অৱস্থাত উদ্ধাৰ কৰিবলৈ সক্ষম হোৱা অস্ত্ৰ- শস্ত্ৰখিনিৰ ভিতৰত আছে ৭ টা পিষ্টল, ৩ টা ৰাইফল, ১৯২ টা গ্ৰেণেড, ১৪ টা ৰকেট প্ৰপেলড গ্ৰেনেড( আৰফিজি), ১টা বেৰেল, ২৮ টা পিষ্টলৰ মেগজিন, ১ টা এ কে ৪৭ ৰাইফলৰ মেগজিন, ২ টা এচ এল আৰৰ মেগজিন, ১১৭ জাঁই ৭.৬২ এম এম একে ৪৭ ছিৰিজৰ গুলী ,২০০ জাঁই ৭.৬২ এম এম এচ এল আৰৰ গুলী, ৮৫ জাঁই ৫.৫৬ এম এম ইনছাছ ৰাইফলৰ গুলীকে ধৰি বৃহৎ পৰিমাণৰ গুলী, ৯ টা গুলীৰ খোলা, ৪ টা বুলেট হেড আদি আছে । উক্ত বনাঞ্চলত কিছু দিন পুৰ্বে এনডিএফবিয়ে বাহৰ পাতি আছিল  আৰু সেয়ে সেনা-আৰক্ষীয়ে সন্দেহ কৰিছে যে এনডিএফবিয়েই এই মাৰনাস্ত্ৰখিনি পুতি থৈছিল। উল্লেখ্য যে বিটিআৰ গঠনেৰে মাৰণাস্ত্ৰ মুক্ত অঞ্চল গঠনৰ কুচকাৱাজ চলি থকাৰ লগতে বিটিচি নিৰ্বাচনৰ আগমুহুৰ্তত এইদৰে বৃহৎ পৰিমাণৰ অস্ত্ৰ উদ্ধাৰ হোৱা ঘটনাই নিৰ্বাচন শান্তিপূৰ্ণভাৱে অনুষ্ঠিত হ'ব নে বুলি বিটিএডিৰ জনসাধাৰণৰ মনত শংকা ঘনীভূত হৈছে ৷ 🔯