NEWS 4 BONGAIGAON

👉বঙাইগাঁৱৰ বইটামাৰীৰ শিলঘাগিৰি পাহাৰৰ কুঁৱেৰীত পুনৰ ভয়ংকৰ বিস্ফোৰণ 

👉বিদ্যালয়গৃহৰ টিনপাত ফুটি ভিতৰত পৰিল শিল

                বঙাইগাঁওঃ ১৮ জুনঃ

🔯বঙাইগাওঁ জিলাৰ বইটামাৰীৰ শিলঘাগিৰি পাহাৰৰ শিলৰ কুঁৱেৰীত আজি মহলদাৰে পুনৰ উচ্চ প্ৰাবল্যৰ বিস্ফোৰণ  ঘটোৱাত নিকটৱৰ্তী এখন বিদ্যায়লৰ গৃহৰ ক্ষতি সাধন হয় ৷ এই উচ্চ প্ৰাবল্যৰ বিস্ফোৰণৰ ফলত সমগ্ৰ অঞ্চলটোত এক আতংকৰ পৰিৱেশ সৃষ্টি হয় । উল্লেখ্য যে বিস্ফোৰণৰ ফলত বৃহৎ শিলৰ টুকুৰা আহি ওচৰৰে জনবসতি প্ৰধান এলেকাত থকা ৩৩ নং চি শালবাৰী আদৰ্শ প্ৰাথমিক বিদ্যালয়ৰ গৃহৰ ওপৰত ছিটিকি আহি টিনপাত ফুটি বিদ্যালয়ৰ ভিতৰত পৰে । ফলত বিদ্যালয়খনৰ বিস্তৰ ক্ষতি সাধন হয় । অৱশ্যে বৰ্তমান বিদ্যালয় বন্ধ হৈ থকা বাবে  শিলৰ টুকুৰা পৰাৰ পিছত কোনো লোকৰ ক্ষয়- ক্ষতি নহ'ল । 

আনহাতে ওচৰৰ আন এঘৰ লোকৰ ঘৰতো শিলৰ টুকুৰা ছিটিকি পৰে । ইপিনে জানিব পৰা মতে এই বিদ্যালয় গৃহটো ইতিমধ্যে কোৱাৰেণ্টাইন কেন্দ্ৰলৈ ৰূপান্তৰিত কৰা হৈছিল আৰু আজি কেন্দ্ৰটোত কিছু ব্যক্তি অহাৰ কথাও আছিল ৷ কিন্তু সৌভাগ্যৰ কথা এয়ে যে সেই সময়লৈ বিদ্যালয় গৃহত কোনো এজন ব্যক্তি  নাছিল ৷ নহলে টিনপাত ফুটি বিদ্যালয় গৃহৰ ভিতৰত পৰা শিলৰ টুকুৰাই বিপদ ঘটালেহেতেন বুলি স্থানীয় লোকে প্ৰকাশ কৰে ৷ উল্লেখ্য যে দীৰ্ঘদিনৰে পৰা এই পাহাৰৰ শিলৰ কুঁৱেৰীত কোনো নীতি-নিয়ম নামানি মহলদাৰে অতি উচ্চ প্ৰাবল্যৰ বিস্ফোৰণ ঘটাই আহিছে । ফলত ওচৰৰ শালবাৰী, তালগুৰী, পঞ্চগাওঁ, বেছিমাৰী, ৰঘুনন্দনপুৰ আদি বহু গাৱঁৰ লোকৰ বহু পকী ঘৰ-দুৱাৰ, কুঁৱা আদি ভাগি গৈছে । আজি  বিদ্যালয়খনতে তেনেদৰে প্ৰকাণ্ড শিলৰ টুকুৰা ছিটিকি আহি পৰিল । প্ৰকাণ্ড প্ৰকাণ্ড শিলৰ টুকুৰা জনবসতিপূৰ্ণ অঞ্চললৈ ছিটিকি অহাত লোকসকল আতংকিত হয় । ক'বলৈ গ'লে মানুহৰ জীৱন তথা পাৰিপাৰ্শ্চিকতাৰ প্ৰতি শিলঘাগিৰি পাহাৰৰ কুঁৱেৰীয়ে আনিছে প্ৰৱল ভাবুকি । ৰাইজে এই কুঁৱেৰী বন্ধ কৰাৰ বাবে বছৰ বছৰ ধৰি দাবী জনাই আহিছে যদিও চৰকাৰে ৰাজহ সংগ্ৰহকে অধিক গুৰুত্ব দি ৰাইজৰ দাবীক আওকান কৰা পৰিলক্ষিত হৈছে ।🔯