NEWS 4 BONGAIGAON

👉বঙাইগাঁও জিলাৰ অষ্টম অসম আৰক্ষী বেটেলিয়নৰ  কমাণ্ডেণ্টৰ দেহত ধৰা পৰিল কোভিড-১৯ পজিটিভ

👉আৱকাৰী অধীক্ষকৰো পজিটিভ পোৱাত জিলা প্ৰশাসনত শংকা 

👉জিলা উপায়ুক্ত কাৰ্যালয়ত চেনিটাইজেচন 

👉আৱৰ্ত ভৱনলৈ স্থানান্তৰ জিলা উপায়ুক্তৰ কাম কাজ 

 👉 শংকা নাইঃ মন্ত্ৰী ফণীভূষণ চৌধুৰী 

👉৮৪ লৈ বৃদ্ধি আক্ৰান্তৰ সংখ্যা

                                         বঙাইগাঁওঃ ২৮ জুন :                                

🔯বঙাইগাঁও জিলাৰ উত্তৰ শালমাৰা মহকুমাৰ অভয়াপুৰীস্থিত অষ্টম অসম সশস্ত্ৰ আৰক্ষী বেটেলিয়নৰ কমাণ্ডেন্টজন কোভিড- ১৯ ৰোগত আক্ৰান্ত বুলি নিশ্চিত হোৱাত বঙাইগাঁও জিলাৰ প্ৰশাসনিক বিষয়াসকলৰ মাজত বিৰাজ কৰিছে শংকা ৷ উল্লেখ যোগ্য যে পৰহি জিলা উপায়ুক্তৰ কাৰ্যালয়ৰ সভা কক্ষত অসম আৰক্ষীৰ ডি জি পিৰ এক ভিডিঅ কনফাৰেন্স আছিল ৷ এই ভিডিঅ কনফাৰেন্সত  পশ্চিম অসমৰ ডি আই জিকে ধৰি জিলাখনৰ আৰক্ষী অধীক্ষক, জিলাৰ উপ আৰক্ষী অধীক্ষক , উত্তৰ শালমাৰা মহকুমাৰ মহকুমা আৰক্ষী বিষয়া আদিকে ধৰি শীৰ্ষ আৰক্ষী বিষয়া আৰু জিলা প্ৰশাসনৰ শীৰ্ষ বিষয়াৰ লগতে অংশ গ্ৰহণ কৰিছিল কোভিড- ১৯ ত আক্ৰান্ত অষ্টম অসম আৰক্ষী বেটেলিয়নৰ কমাণ্ডেণ্টগৰাকীও ৷ সেয়ে এতিয়া কমাণ্ডেণ্টগৰাকীৰ নমুনা পৰীক্ষাৰ ফলাফলত দেহত কোভিড- ১৯ পজিটিভ ধৰা পৰাত লাগিছে হাহাকাৰ ৷ কমাণ্ডেণ্ট গৰাকী ধুবুৰী জিলাৰ ছাগলীয়া প্ৰৱেশ দ্বাৰত কৰ্তব্য পালন কৰা পৰিপ্ৰেক্ষিতত কোভিড- ১৯ ৰোগত আক্ৰান্ত হোৱা বুলি জানিব পৰা গৈছে ৷ কমাণ্ডেণ্ট গৰাকী ভিডিও কনফাৰেন্সত অংশ লোৱা আৰু কোভিড- ১৯ পজিটিভ ধৰা পৰাৰ পাছত আজি  বঙাইগাঁও জিলা উপায়ুক্তৰ কাৰ্যালয় চেনিটাইজ কৰা পৰিলক্ষিত হয় ৷ ইপিনে কমাণ্ডেণ্ট গৰাকী কোভিড- ১৯ ত আক্ৰান্ত হ'লেও জিলা উপায়ুক্তৰ কাৰ্যালয়ৰ ভিডিও কনফাৰেন্সত অংশ লোৱা সকলৰ মাজত শংকাৰ কাৰণ নাই বুলি ব্যক্ত কৰিছে স্থানীয় বিধায়ক তথা ৰাজ্যৰ খাদ্য আৰু অসামৰিক যোগান বিভাগৰ মন্ত্ৰী আৰু কোভিড-১৯ ৰোগ সন্দৰ্ভত বঙাইগাঁও জিলাৰ কাম- কাজ চোৱা- চিতাৰ দায়িত্বত থকা ফণী ভূষণ চৌধুৰীয়ে ৷ তেওঁ কয় যে ভিডিঅ কনফাৰেন্সত অংশ গ্ৰহণ কৰাৰ সময়ত সকলোৱে মাস্ক পৰিধান কৰাৰ লগতে সামাজিক দূৰত্ব বৰ্তাই ৰাখিছিল ৷ সেয়ে কমাণ্ডেণ্টগৰাকী কোভিড- ১৯ ত আক্ৰান্ত হলেও তেওঁৰ জৰিয়তে যে জিলা উপায়ুক্ত কাৰ্যালয়লত সংক্ৰমণ হৈছে তেনে কথা নহয় আৰু আশংকা কৰাৰো কোনো প্ৰয়োজন নাই ৷ লগতে মই ভাৱো যে বাকীকেইজনে যিটো ল'বলগীয়া ব্যৱস্থা সেয়া ল'ব ৷ কাৰণ এছ পি বা ডি আই জি কে ধৰি এইসকল লোক অবিহনে এখন জিলা নচলে , সেয়ে তেওঁলোক কৰ্মৰত অৱস্থাতে আছে আৰু যদিও কনফাৰেন্সত একেলগে আছিল তেওঁলোক সংক্ৰমিত হোৱা নাই ৷ উল্লেখ্য যে সম্প্ৰতি জিলা উপায়ুক্তৰ কাৰ্যালয় চেনিটাইজেচন কৰাৰ ফলত বঙাইগাঁও জিলা উপায়ুক্তৰ কাম -কাজ আৱৰ্ত ভৱনৰ পৰা চলাই থকা হৈছে বুলি জানিব পৰা গৈছে ৷

লক্ষণীয় যে আজি বঙাইগাঁও জিলা উপায়ুক্ত কাৰ্যালয়ত থকা আৱকাৰী বিভাগৰ অধীক্ষকজনৰো দেহত কোভিড- ১৯ পজিটিভৰ অৱস্থিতি ধৰা পৰে ৷ বিষয়াজন কিছু দিন পূৰ্বে গুৱাহাটীলৈ গৈছিল বুলি জানিব পৰা গৈছে ৷ আৱকাৰী বিষয়া জনৰ দেহত কোভিড -১৯  পজিটিভ পোৱাৰ পাছত জিলা উপায়ুক্তৰ কাৰ্যালয়ত জড়িত বিষয়া কৰ্মচাৰী সকলৰ মাজত স্বাভাৱিকতে বিৰাজ কৰিছে শংকা ৷ আনহাতে বঙাইগাঁও চহৰৰ কলেজ ৰোড আৰু লেচুতোলা অঞ্চলৰো আন দুজন ব্যক্তিৰ দেহত কোভিড- ১৯ পজিটিভ ধৰা পৰা বুলি জানিব পৰা গৈছে ৷ সেইদৰে বইটামাৰী উন্নয়ন খণ্ডৰ অধীনৰ অঞ্চলৰো আন তিনি জন ব্যক্তি কোভিড- ১৯ ত আক্ৰান্ত হোৱা বুলি জানিব পৰা গৈছে ৷ জিলা খনত আজি সন্ধিয়া লৈ কোভিড- ১৯ ত আক্ৰান্ত ৰোগীৰ সংখ্যা ৮৪ জনলৈ বৃদ্ধি পালে ৷ ইপিনে জিলা প্ৰশাসনৰ এগৰাকী বিষয়াই জানিবলৈ দিয়া মতে জিলা উপায়ুক্ত কাৰ্যালয়ৰ সকলো কৰ্মচাৰীৰে নমুনা পৰীক্ষা কৰি থকা হৈছিল আৰু তাৰে মাজতে আৱকাৰী বিভাগৰ অধীক্ষকগৰাকীৰ নমুনাৰ ফলাফল পজিটিভ  আহে ৷ ইতিমধ্যে অধীক্ষকগৰাকীক চিকিৎসালয়ত ভৰ্তি কৰা হৈছে ৷ সেইদৰে অষ্টম অসম আৰক্ষী বেটেলিয়নৰ কোভিড- ১৯ ত আক্ৰান্ত কমাণ্ডেণ্টগৰাকীক চিকিৎসাৰ বাবে বৰপেটা চিকিৎসা মহাবিদ্যালয় হাস্পাতাললৈ প্ৰেৰণ কৰা বুলিও জানিবলৈ দিছে ৷ একেদৰে বাকী যাৱতীয় ব্যৱস্থাও গ্ৰহণ কৰি থকা বুলি জানিব দিয়ে ৷🔯