NEWS 4 BONGAIGAON

👉বঙাইগাঁৱত বানপানী আৰু দুৰ্যোগৰ সময়ত ল'বলগীয়া ব্যৱস্থা সন্দৰ্ভত জিলা প্ৰশাসনৰ সভা  

            বঙাইগাঁওঃ ২৪ জুনঃ 

🔯কোৰোণা ভাইৰাছ প্ৰতিৰোধমূলক কাৰ্য্যসূচী মৰ্ম্মে সামাজিক দূৰত্ব বজাই ৰাখি আগন্তুুক  সম্ভাব্য বান- দুৰ্যোগ পৰিস্থিতি সঠিকভাবে প্ৰতিৰোধ কৰা সন্দৰ্ভত আজি বঙাইগাঁও জিলা উপায়ুক্ত কাৰ্য্যালয়ৰ সভা কক্ষত এখন গুৰুত্বপূৰ্ণ সভা অনুষ্ঠিত হয় । বঙাইগাঁও জিলাৰ উপায়ুক্ত ডাঃ এম এছ লক্ষ্মীপ্ৰিয়াৰ সভাপতিত্বত অনুষ্ঠিত সভাত বানপানীৰ দুৰ্যোগৰ সময়ত বিভিন্ন বিভাগে ল'বলগীয়া ব্যবস্থা সমূহ পাঠ কৰে বঙাইগাঁও জিলাৰ অতিৰিক্ত উপায়ুক্ত অনুপম ডেকাই ।  ইয়াৰ পিছতে উপায়ুক্ত গৰাকীয়ে বানপানী আৰু দুৰ্যোগৰ সময়ত ল'বলগীয়া ব্যৱস্থাসমূহ আলোকপাত কৰি  সভাত উপস্থিত থকা বিভিন্ন বিভাগ সমূহক পৃথকে পৃথকে দায়িত্ব প্ৰদান কৰে ৷ লগতে বানপানীত ক্ষতিগ্ৰস্ত হ’ব পৰা সাম্ভাব্য এলেকা সমূহ পৰিদৰ্শন কৰি তাত স্থাপন কৰিবলগীয়া সাহাৰ্য্য শিবিৰ সমূহ চিনাক্ত কৰিবলৈ সংশ্লিষ্ট বিভাগ সমূহক দায়িত্ব প্ৰদান কৰে । সভাত জিলাখনত হ'ব পৰা বান-দুৰ্যোগৰ সময়ত ল'বলগীয়া সাৱধানতা আৰু প্ৰস্তুতি আদি বিষয় সন্দৰ্ভত বিভাগীয় মুৰব্বী বিষয়া আৰু চক্ৰ বিষয়া সকলৰ সৈতে বিস্তৃতভাবে আলোচনা কৰে ।  এই সভাত জিলা উপায়ুক্ত গৰাকীয়ে স্বাস্থ্য আৰু পৰিয়াল কল্যাণ বিভাগক সাম্ভাব্য বান -দুৰ্যোগৰ সময়ত জনসাধাৰণক তৎকালীনভাৱে চিকিৎসা সাহায্য প্ৰদান কৰিব পৰাকৈ পৰ্য্যাপ্ত চিকিৎসকৰ দল সাজু কৰি ৰখাৰ লগতে নিয়মিত ঔষধৰ যোগান অব্যাহত ৰাখিবলৈ নিৰ্দ্দেশ দিয়ে । একেদৰে জনস্বাস্থ্য কাৰিকৰী বিভাগকো জৰুৰীকালীন অৱস্থাত পৰ্য্যাপ্ত  খোৱাপানী যোগান নিশ্চিত কৰিবলৈ নিৰ্দ্দেশ দিয়ে় । বানপানীৰ সময়ত প্ৰয়োজন হোৱা পশু খাদ্যৰ যোগান পৰ্য্যাপ্ত পৰিমাণে মজুত ৰখাৰ বাবে যোগান বিভাগক নিৰ্দ্দেশ দিয়ে । লগতে অগ্নি নিৰ্বাপক বাহিনীক বানপানীৰ সময়ত সদায় সজাগহৈ থাকিবলৈ নিৰ্দ্দেশ দিয়াৰ উপৰিও নাও, ভূতভুটি আদি থোৰতে পাবপৰাকৈ মজুত ৰাখিবলৈ দায়িত্ব দিয়ে । ইয়াৰোপৰি বঙাইগাঁও পৌৰ সভাক বঙাইগাঁও সদৰৰ অধীনস্থ নলা-নৰ্দমা সমূহ পৰিস্কাৰ পৰিচ্ছন্ন আৰু মেৰামতি কৰিবলৈ দায়িত্ব দিয়ে । একেদৰে বঙাইগাঁও বৈদ্যুতিক উপ কেন্দ্ৰৰ অন্তৰ্গত বৈদ্যুতিক তাঁৰ সমূহ পৰীক্ষা -নিৰীক্ষা কৰি বিপদমুক্ত কৰি ৰাখিবলৈও নিৰ্দ্দেশ দিয়ে । আনহাতে দুৰ্বল মথাউৰিসমূহ , ৰাস্তা -ঘাট আদি মেৰামতিৰ ব্যৱস্থা কৰিবলৈ জলসম্পদ বিভাগক নিৰ্দ্দেশ দিয়ে । লগতে জিলাখনৰ অন্যান্য সংশ্লিষ্ট বিভাগ সমূহৰ বিষয়া সকলক যাৱতীয় ব্যৱস্থা গ্ৰহণ কৰাৰ বাবে পৰামৰ্শ দিয়ে ।আগন্তুক বান-দুৰ্যোগৰ সময়ত যাতে ৰাইজৰ দুৰ্দশা  যথাসম্ভৱ কম হয় তাৰ বাবে প্ৰতিটো বিভাগক সুসংহত কাৰ্য আচঁনি প্ৰস্তু কৰিবলৈ উপায়ুক্ত ডাঃ এম এছ লক্ষ্মীপ্ৰিয়াই নিৰ্দ্দেশ দিয়ে । এই সভাত বঙাইগাঁও জিলা পৰিষদৰ কাৰ্য্যবাহী বিষয়া নাদিৰা জেছমিন , আৰক্ষী অধীক্ষক সুবোধ কুমাৰ সোণোৱাল, অতিৰিক্ত উপায়ুক্ত সকল ,উত্তৰ শালমাৰা মহকুমাৰ মহকুমাধিপতি পল্লৱী সৰকাৰ ,  ৰাজহ চক্ৰ বিষয়া সকল আৰু  অন্যান্য বিভাগৰ বিষয়া কৰ্মচাৰী সকল উপস্থিত থাকে ।🔯