NEWS 4 BONGAIGAON

👉বঙাইগাঁৱত মজদুৰ ইউনিয়নৰ দ্বাৰা কেন্দ্ৰীয় চৰকাৰৰ শ্ৰমিক বিৰোধী নীতিৰ প্ৰতিবাদ 

                    🔯 বঙাইগাঁওঃ ৫ জুনঃ

 🔯কেন্দ্ৰীয় চৰকাৰৰ শ্ৰমিক বিৰোধী নীতিৰ প্ৰতিবাদত দেশৰ আন আন প্ৰান্তৰ লগতে বঙাইগাঁৱতো আজি উত্তৰ পূৱ সীমান্ত ৰে'লৱে মজদুৰ ইউনিয়নে বিভিন্ন স্থানত প্ৰতিবাদী কাৰ্যসূচী ৰূপায়ণ কৰে ৷ অল ইণ্ডিয়া ৰে'লৱেমেনচ ফেডাৰেচনৰ আহ্বানত যোৱা ১ জুনৰ পৰা ৮ জুনলৈ দেশজুৰি ৰূপায়ণ কৰিবলগীয়া প্ৰতিবাদী সপ্তাহৰ লগত সংগতি ৰাখি বঙাইগাঁওৰ কাৰ্যক্ৰমণিকাৰ অংশ হিচাপে এই চুটি প্ৰতিবাদী সভাসমূহ বঙাইগাঁও ৰে'লৱেৰ ইলেকট্ৰিক কাৰ্যালয়, দলং কাৰ্যালয় আৰু বঙাইগাঁও ৰে'লৱে কাৰখানাত অনুষ্ঠিত কৰা হয় ৷ এই সভাত ভাষণ প্ৰদান কৰি ইউনিয়নৰ কেন্দ্ৰীয় যুটীয়া সম্পাদক আশীষ বিশ্বাসে কয় যে বিজেপি নেতৃত্বাধীন কেন্দ্ৰীয় চৰকাৰখন মাথো পুঁজিপতিৰ হাতৰ পুতলা ৷ “ 

কোৰোণা মহামাৰীৰ বাবে আজি দেশত জৰুৰী অৱস্থাই দেখা দিছে  আৰু মানুহ ত্ৰাসিত হৈ পৰিছে ৷ কিন্তু এই চৰকাৰখনে পুঁজিপতিৰ স্বাৰ্থৰ বাবে তাৰো সুবিধা লৈছে ৷ আজি চৰকাৰী কৰ্মচাৰীৰ মৰগীয়া ভাট্টা বন্ধ কৰি দিয়া হৈছে ৷ সেইদৰে চৰকাৰী চাকৰিসমূহ হ্ৰাস কৰি দেশত নিবনুৱা সমস্যা বৃদ্ধি কৰিবৰ ফন্দি পাঙিছে ৷ আনহাতে এই সময়চোৱাতে বিভিন্ন লাভজনক চৰকাৰী ক্ষেত্ৰ যেনে তৈলক্ষেত্ৰ, ৰে'ল, বনজ সম্পদ আদি পুঁজিপতিৰ হাতত বিক্ৰী কৰিব বিচাৰিছে ৷ এই ষড়যন্ত্ৰ আমি কেতিয়াও সফল হবলৈ নিদিও আৰু ইয়াৰ বিৰুদ্ধে আমি আমাৰ আন্দোলন চলাই যাম"বুলিও তেওঁ কয় ৷ এই প্ৰতিবাদী সভাকেইখনত আশীষ বিশ্বাসৰ উপৰি উপসভাপতি ফণীধৰ দাস, সহ সম্পাদক তন্ময় শক্তি ৰাহাকে ধৰি কেইবাজনো ইউনিয়নৰ কেন্দ্ৰীয় নেতা উপস্থিত থাকে ৷🔯