NEWS 4 BONGAIGAON

👉বঙাইগাঁৱত মেডিকেল ৰিপ্ৰেজেনটেটিভচ ইউনিয়নৰ প্ৰতিবাদ 

👉জিলা প্ৰশাসনে জাৰি কৰা দহ দিন কাম বন্ধৰ নিৰ্দেশ প্ৰত্যাহাৰ কৰাৰ দাবী চি আৰ ইউ ৰ

             বঙাইগাঁওঃ ২০ জুলাইঃ 

🔯বঙাইগাঁও জিলা প্ৰশাসনে জিলাখনত মেডিকেল ৰিপ্ৰেজেনটেটিভসকলক দহ দিনৰ বাবে কাম- কাজ বন্ধ ৰখাৰ বাবে জাৰি কৰা নিৰ্দেশ অনতিপলমে প্ৰত্যাহাৰ কৰিবলৈ দাবী জনাইছে মেডিকেল ৰিপ্ৰেজেনটেটিভচৰ উত্তৰ পূৰ্বাঞ্চলৰ সংগঠন চেন্টাৰ অৱ মেডিকেল এণ্ড চেলছ্ ৰিপ্ৰেজেনটেটিভচ্ ইউনিয়ন (উত্তৰ পূৰ্বাঞ্চল) য়ে দাবী জনাইছে ৷ আনকি এই নিৰ্দেশ প্ৰত্যাহাৰৰ দাবীত আজি বঙাইগাঁৱত চেলছ্ ৰিপ্ৰেজেনটেটিভচসকলে প্ৰতিবাদী কাৰ্যসূচীও ৰূপায়ণ কৰে ৷ এই সন্দৰ্ভত উত্তৰ পূৰ্বাঞ্চলৰ চেন্টাৰ অৱ মেডিকেল এণ্ড চেলছ্ ৰিপ্ৰেজেনটেটিভচ্ ইউনিয়নৰ সম্পাদক সোমেন দেৱে এক প্ৰেছ বিবৃতিত কয় যে বঙাইগাঁও জিলাৰ অতিৰিক্ত জিলা দণ্ডাধীশে ১৬ জুলাইত  BMJ/Corona/16/2020/135 নং আদেশ যোগে সকলো মেডিকেল ৰিপ্ৰেজেনটেটিভচৰ কাম -কাজ বঙাইগাঁও জিলাত ১৭ জুলাইৰ পৰা দহ দিনৰ বাবে বন্ধ কৰাৰ নিৰ্দেশ জাৰি কৰাৰ লগতে সকলো মেডিকেল ৰিপ্ৰেজেনটেটিভচক ১৮ জুলাইৰ ভিতৰত স্বাব পৰীক্ষাৰ নিৰ্দেশ দিছিল ৷ 

কিন্তু বৰ্তমান বঙাইগাঁৱত কোনোধৰণৰ লকডাউন নাই আৰু সকলো দোকান- পোহাৰ, কাৰ্যালয় আদি নিয়মীয়াকৈ চলি আছে। বঙাইগাঁৱৰ লগতে অসমৰ অন্য জিলাতো কোভিড ৰোগীৰ চিনাক্তকৰণৰ কাম চলি আছে ৷ কিন্তু কেৱল মাত্ৰ বঙাইগাঁও জিলাতহে আশ্চৰ্যজনক ভাবে মেডিকেল ৰিপ্ৰেজেনটেটিভচৰ কাম- কাজ দহ দিনৰ বাবে বন্ধ কৰি দিয়া হৈছে। মেডিকেল ৰিপ্ৰেজেনটেটিভচৰ কাম- কাজ কোম্পানীৰ কোম্পানী আইন অনুযায়ী পৰিচালিত হয়। এই ক্ষেত্ৰত মেডিকেল ৰিপ্ৰেজেনটেটিভচৰ কাম- কাজ বন্ধ ৰাখিলে তেওঁলোকৰ দৰমহা, ভাট্টা ইত্যাদি কৰ্তন কৰা হ'ব। যিয়ে তেওঁলোকৰ প্ৰতি অতিৰিক্ত মানসিক চাপৰ সৃষ্টি কৰিব। 

সেয়ে এই সংক্ৰান্তত আমাৰ সংগঠনে বঙাইগাঁও জিলা প্ৰশাসনৰ ওচৰত দাবী জনাইছো যে অনতিপলমে মেডিকেল ৰিপ্ৰেজেনটেটিভচৰ কাম -কাজ বন্ধ ৰখাৰ এই আদেশ প্ৰত্যাহাৰ কৰক। এনেধৰণৰ জাননী মেডিকেল ৰিপ্ৰেজেনটেটিভচৰ পৰিৱৰ্তে সংশ্লিষ্ট সকলো কোম্পানীলৈ প্ৰেৰণৰ ব্যৱস্থা লওক। মেডিকেল ৰিপ্ৰেজেনটেটিভচে হেৰুৱাবলগীয়া দৰমহা, ভাট্টা আদি চৰকাৰে দিয়াৰ ব্যৱস্থা গ্ৰহণ কৰক। আমি আশা কৰিম জিলা প্ৰশাসনে এই ক্ষেত্ৰত এক নিৰ্দেশনা প্ৰদান কৰিব। ইয়াৰ লগতে কেৱল মেডিকেল ৰিপ্ৰেজেনটেটিভচেই নহয় সকলো নাগৰিকৰ বাবেই কভিড পৰীক্ষাৰ ব্যৱস্থা গ্ৰহণ কৰক। যাতে আমি এই মহামাৰীৰ পৰা ৰক্ষা পাব পাৰোঁ। বিবৃতিটোত আৰু কয় যে মেডিকেল ৰিপ্ৰেজেনটেটিভচ সকল সমাজৰ এক অংগ। সমাজৰ ক্ষতি হ'ব পৰা কোনো কাম মেডিকেল ৰিপ্ৰেজেনটেটিভচ সকলে নকৰে। বৰং বৰ্তমান চলি থকা কৰ'না ভাইৰাছৰ সংক্ৰমণৰ পৰা সমাজক ৰক্ষা কৰাৰ বাবে প্ৰশাসনক সকলো প্ৰকাৰৰ সহায় কৰিবলৈ মেডিকেল ৰিপ্ৰেজেনটেটিভচসকল প্ৰস্তুত। কিন্তু আমি এনেবোৰ কামৰ বিৰোধিতা কৰো যিবোৰ কামে মেডিকেল ৰিপ্ৰেজেনটেটিভচৰ প্ৰতি এক নেতিবাচক ধাৰণাৰ সৃষ্টি কৰে। উল্লেখে যে ৰিপ্ৰেজেনটেটিভচ সকলে আজি কোভিড পৰীক্ষাৰ বাবা স্বাৱতো দিয়ে ৷🔯