NEWS 4 BONGAIGAON

👉বঙাইগাঁও অসামৰিক চিকিৎসালয়ত জিলাখনৰ প্ৰথম গৰাকী কোভিড পজিটিভ মহিলাৰ চিজাৰিয়ান অস্ত্ৰোপচাৰ সম্পন্ন

👉নৱজাতকৰ ৰেপিড এণ্টিজেন টেষ্টৰ ফলাফল আহিল নিগেটিভ

            🔯বঙাইগাঁওঃ২৮ জুলাইঃ 

📝বৰ্তমান জিলাখনত কোভিড-১৯ৰ গণসংক্ৰমনৰ জটিল পৰিস্থিতি বাহাল থকাৰ মাজতে এক সুখবৰ আহিছে জিলাখনৰ স্বাস্থ্য খণ্ডলৈ। আজি বঙাইগাঁও অসামৰিক চিকিৎসালয়ত পুৱা ৯ বজাত এগৰাকী কোভিড পজিটিভ গৰ্ভৱতী মহিলাৰ চিজাৰিয়ান অস্ত্ৰোপচাৰ সফলতাৰে সম্পন্নৰ অন্তত এটি কন্যা শিশুৱে জন্ম লাভ কৰে। বঙাইগাঁও জিলাৰ সিদলসতী এলেকাৰ এই ১৯ বছৰ বয়সীয়া মহিলা গৰাকী দীৰ্ঘ সময় ধৰি প্ৰসৱ যন্ত্ৰণাত থকাৰ অন্তত আজি পুৱা ৪ বজাত বঙাইগাঁও অসামৰিক চিকিৎসালয়ত আহি ভৰ্তি হয়। ভৰ্তি হোৱাৰ লগে লগে মহিলা গৰাকীৰ ৰেপিড এণ্টিজেন টেষ্ট কৰা হয় আৰু ফলাফল পজিটিভ অহাৰ লগে লগে চিকিৎসালয়খনৰ কোভিড কেয়াৰ দলটো ব্যস্ত হৈ পৰে। লগে লগে প্ৰসূতী ৰোগ বিশেষজ্ঞ গৈ মহিলা গৰাকীক পৰীক্ষা কৰি তেওঁৰ জটিল অৱস্থাৰ প্ৰতি লক্ষ্য ৰাখি চিজাৰিয়ান অস্ত্ৰোপচাৰৰ সিদ্ধান্ত লয় আৰু পুৱা ৯ বজাৰ লগে লগে এক সুদক্ষ চিকিৎসকৰ দলে সফলতাৰে অস্ত্ৰোপচাৰ সম্পন্ন কৰি মহিলা গৰাকীক ২.৪ কে. জি. ওজনৰ এটি সুস্থ কন্যা শিশুৰ মাতৃত্ব প্ৰদান কৰে। জন্মৰ ঠিক পাছতেই নৱজাতকৰ ৰেপিড এণ্টিজেন টেষ্ট কৰা হয় আৰু ফলাফল নিগেটিভ আহে। বৰ্তমান মাতৃ আৰু  শিশু উভয়ে সুস্থিৰ অৱস্থাত আছে আৰু যাৱতীয় চিকিৎসা সেৱা আগবঢ়াই থকা হৈছে।

আজিৰ এই সফল অস্ত্ৰোপচাৰ সম্পন্ন কৰা চিকিৎসাকৰ্মীৰ দলটোত আছিল প্ৰসূতী ৰোগ বিশেষজ্ঞ  ডাঃ গৌতম দাস, এনাচথেচিষ্ট( সংজ্ঞা শৰক)ডাঃ এম.এম. ৰহমান, শিশু ৰোগ বিশেষজ্ঞ ডাঃ এম. আই. আহমেদ, ষ্টাফ নাৰ্ছ ক্ৰমে মিজিং ব্ৰহ্ম, অনিতা কলিতা আৰু লক্ষ্মী ছেত্ৰী আৰু অস্ত্ৰোপচাৰ কক্ষৰ সহায়কাৰী সত্ৰ সিং ৰয়, চাফাই কৰ্মী কিৰণ বাছফৰ আদি।এই সমগ্ৰ প্ৰক্ৰিয়াটোত স্বাস্থ্য বিভাগৰ যুটীয়া সঞ্চালক ডাঃ এন. এম. দাস আৰু অধীক্ষক পি. কে. ৰয়ে  সকলো সম্ভৱপৰ সহযোগিতা আগবঢ়ায়৷🔯