NEWS 4 BONGAIGAON

👉বঙাইগাঁৱৰ হাপাচাৰাত ঘাই পথ অৱৰোধ কৰি ৰাইজৰ প্ৰতিবাদ 

👉পৰ্যাপ্ত পৰিমাণৰ পশুখাদ্য যোগান ধৰাৰ দাবী 

                 বঙাইগাঁওঃ ২১ জুলাই ঃ 

🔯বান পৰিস্থিতিৰ বাবে এতিয়া ৰাজ্যৰ চাৰিওফালে সৃষ্টি হৈছে হাহাকাৰ অৱস্থা ৷ ঠায়ে ঠায়ে প্ৰশাসনৰ তৰফৰ পৰা  বানপীড়িত ৰাইজৰ লগতে পশুধনৰ বাবে পৰ্যাপ্ত খাদ্য সামগ্ৰী যোগান নধৰাৰো উঠিছে অভিযোগ ৷ ইয়াৰ মাজতে আজি বিয়লি বঙাইগাঁও জিলাৰ হাপাচাৰাত স্থানীয় ৰাইজে পশুধনৰ বাবে পৰ্যাপ্ত খাদ্য সামগ্ৰী যোগান ধৰাৰ দাবীত ৰাষ্ট্ৰীয় ঘাইপথ অৱৰোধ কৰি প্ৰতিবাদ সাব্যস্ত কৰে ৷ ৰাইজৰ অভিযোগ প্ৰশাসনৰ তৰফৰ পৰা নাম মাত্ৰহে যোগান ধৰা হৈছে পশু খাদ্য ৷ যিখিনি যোগান ধৰা হৈছে সেয়া পৰ্যাপ্ত নহয় ৷ সেয়ে প্ৰশাসনৰ তৰফৰ পৰা যোগান ধৰা পশু খাদ্যৰ বস্তা ৰাজ পথত দলিয়াই দি পথ অৱৰোধ কৰি প্ৰতিবাদ সাব্যস্ত কৰে ৷ 

স্থানীয় ৰাইজে অভিযোগ কৰা মতে এটাকৈ পশুধনৰ বিপৰীতে এক কিলো তিনিশ গ্ৰামকৈ পশু খাদ্য যোগান ধৰিছে ৷ লগতে আৰু পশুখাদ্য দিব নোৱাৰে বুলি জনাইছে ৷ সেইদৰে বানপীড়িত লোকেও সাহায্য নোপোৱাৰ লগতে গাঁও পঞ্চায়তৰ প্ৰতিনিধিয়েও বানপীড়িত ৰাইজৰ কোনো খা- খবৰ নোলোৱা বুলিও অভিযোগ কৰে ৷ ইপিনে ঘাই পথ অৱৰোধ কৰাৰ ফলত বন্ধ হৈ পৰে যান- বাহনৰ চলাচল ৷ পিচত অৱৰোধস্থলীত বঙাইগাঁও জিলাৰ অতিৰিক্ত উপায়ুক্ত অনুপম ডেকা উপস্থিত হৈ বুধবাৰে পৰ্যাপ্ত পৰিমাণৰ পশুখাদ্য যোগান ধৰাৰ প্ৰতিশ্ৰুতি প্ৰদান কৰাতহে ৰাইজে অৱৰোধ কাৰ্যসূচী উঠাই লয় ৷ 

ৰাইজে অতিৰিক্ত উপায়ুক্তগৰাকীক পশুধনৰ বাবে পৰ্যাপ্ত খাদ্য সামগ্ৰী যোগান ধৰাৰ লগতে হাপাচাৰা গাঁও পঞ্চায়ৰ অন্তৰ্গত বানৰ কৱলত পৰা গাঁৱৰ বানপীড়িত ৰাইজকো পৰ্যাপ্ত পৰিমাণৰ ৰিলিফ দিয়া আৰু বানত যিসকল পৰিয়ালৰ ঘৰ- বাৰী ক্ষতিগ্ৰস্ত হৈছে সেই পৰিয়াল সকলৰ বাবেও ব্যৱস্থা গ্ৰহণ কৰিবলৈ দাবী জনায় ৷ উল্লেখ্য যে আজি অসমৰ মুখ্যমন্ত্ৰী সৰ্বানন্দ সোনোৱালে বঙাইগাঁও জিলাৰ বান পৰিস্থিতিৰ বুজ লবলৈ আহিছিল ৷🔯