NEWS 4 BONGAIGAON

👉বঙাইগাঁৱৰ টুনীয়া নৈৰ পানীত বিষক্ৰিয়াৰ সন্দেহঃ মাছৰ মৃত্যু 

             বঙাইগাঁওঃ ৬ জুলাইঃ

🔯বঙাইগাওঁ জিলাৰ বিভিন্ন প্ৰান্তৰ মাজেৰে বৈ যোৱা টুনীয়া নৈৰ পানীত ভয়ানক বিষক্ৰিয়াত আজি অসংখ্য মাছৰ মৃত্যু হৈছে । জানিব পৰা মতে নৈ খনৰ পানীত হোৱা বিষক্ৰিয়াৰ ফলত আজি সৰু ডাঙৰ বিভিন্ন প্ৰজাতিৰ শ শ মাছৰ মৃত্যু ঘটিছে । বইটামাৰী অঞ্চলৰ ধলাগাওঁ, দেৱানগাওঁ , বৰখাতা আদি নৈখনৰ উপকণ্ঠ অঞ্চলৰ লোকসকলে আজি নৈৰ পানীত অসংখ্য মাছ মৃত অৱস্থাত পোৱাৰ উপৰি আন কিছু মাছ পানীত অৰ্দ্ধমৃত অৱস্থাত ভাহি আহি থকা দেখা পায় । শ শ তেনে মাছ দেখি লোকসকলে ধৰিবলৈ অহা পৰিলক্ষিত হয় । উল্লেখ্য যে ভাৰতীয় তেল নিগমৰ অধীনৰ বঙাইগাওঁ শোধনাগাৰ আৰু ব্ৰহ্মপুত্ৰ কাৰ্বন উদ্যোগ দুটাৰ কাষেৰে টুনীয়া নৈ বৈ আহিছে, তেনেক্ষেত্ৰত শোধনাগাৰ আৰু কাৰ্বন উদ্যোগৰ বিষাক্ত আৰু বৰ্জিত ৰাসায়নিক দ্ৰব্য তথা আবৰ্জনা নৈ খনত পেলোৱাৰ বাবে এই বিষক্ৰিয়া সংঘটিত হোৱা বুলি স্থানীয় লোকসকলে অভিযোগ উত্থাপন কৰি আহিছে । বিষক্ৰিয়াৰ ফলত মাছৰ উপৰি নৈ  খনত থকা আন জলজ প্ৰাণীৰো জীৱন সংকটত পৰিছে ।

 নৈ খনৰ উপকণ্ঠ অঞ্চলসমূহৰ গৰু, মহ, ছাগলী আদি নৈখনৰ দাঁতি কাষৰীয়া অঞ্চলত চৰিবলৈ এৰি দিয়ে আৰু সেই জীৱ-জন্তু সমূহে টুনীয়া নৈৰ পানী সেৱন কৰে । তাৰোপৰি নৈখনৰ কাষতে থকা নাককাটি পাহাৰৰ বহু বন্য জীৱ-জন্তু আৰু আন চৰাই-চিৰিকটি ও নৈখনৰ পানী সেৱন কৰে । নৈ খনৰ পানীত হোৱা বিষক্ৰিয়াৰ ফলত ঘৰচীয়া- বনৰীয়া জীৱ-জন্তু সমূহৰো প্ৰাণ সংকটত পৰিছে । প্ৰণিধানযোগ্য যে, টুনীয়া নৈ খন আগৰে পৰা প্ৰদূষিত । নৈ খনৰ পানী অতি দুৰ্গন্ধযুক্ত । টুনীয়া নৈৰ দাঁতিকাষৰীয়া অঞ্চলেদি যোৱা সকলোৱে দুৰ্গন্ধ অনুভৱ কৰে । পানীৰ বৰণো সলনি হৈছে । প্ৰদূষিত নৈ খনত শেহতীয়াকৈ বিষক্ৰিয়াত শ শ মাছ তথা আন জলজ সম্পদৰ মৃত্যু হোৱাত সচেতন মহল উদ্বিগ্ন হৈ পৰিছে । বিষক্ৰিয়াৰ তদন্ত কৰিবলৈ ৰাইজে দাবী জনাইছে । আনহাতে নৈ খনক প্ৰদূষণৰ কবলৰ পৰা উদ্ধাৰ কৰিবলৈ ও চৰকাৰ তথা বিভাগীয় কৰ্ত্তৃপক্ষক দাবী জনাইছে ।🔯