NEWS 4 BONGAIGAON

👉কোচ ৰাজবংশীসকলৰ জনজাতিকৰণৰ বিষয়ত চৰকাৰৰ নিষ্ক্ৰিয়তা

👉সদৌ অসম কোচ ৰাজবংশী যুৱ-ছাত্ৰ সন্মিলনীৰ অসন্তুষ্টি প্ৰকাশ 

           বঙাইগাঁওঃ ৬ জুলাইঃ 

🔯কোভিড-১৯ মহামাৰীৰ পৰিপ্ৰেক্ষিতত লকডাউন শেষ হৈ প্ৰায় নিয়মীয়াকৈ চৰকাৰী কাম কাজ আৰম্ভ হৈছে যদিও এতিয়ালৈকে কোচ ৰাজবংশী সকলৰ জনজাতিকৰণৰ বিষয়ত চৰকাৰ নিষ্ক্ৰিয় হৈ থকা বিষয়ত অসন্তুষ্টি প্ৰকাশ কৰিছে সদৌ অসম কোচ ৰাজবংশী যুৱ-ছাত্ৰ সন্মিলনীয়ে৷ এক প্ৰেছ বিবৃতিত সদৌ অসম কোচ ৰাজবংশী যুৱ-ছাত্ৰ সন্মিলনীৰ সভাপতি ত্ৰৈলোক্য ৰায় আৰু সাধাৰণ সম্পাদক ধৰ্মেন্দ্ৰ ৰায়ে কয় যে নিৰ্বাচনৰ পূৰ্বে বিজেপি আৰু বৰ্তমানৰ মিত্ৰজোঁটৰ ৰাজনৈতিক দল সমূহে কোচ ৰাজবংশী সকলক বাৰম্বাৰ জনজাতিকৰণৰ প্ৰতিশ্ৰুতি প্ৰদান কৰি সহজ সৰল কোচ ৰাজবংশী সকলৰ ভোট আদায় কৰি লৈছিল৷সেয়ে শাসন লাভ কৰাৰ পিছত জনজাতিকৰণৰ বিষয়টো এৰাই চলিলে নহ'ব৷ বিবৃতিটোত অসমৰ জনজাতি পৰিক্ৰমা দপ্তৰৰ মন্ত্ৰী চন্দন ব্ৰহ্মৰ তত্বাৱধানত মন্ত্ৰীগোট গঠন কৰা হৈছে যদিও এই মন্ত্ৰীগোটৰ প্ৰতিবেদন কেন্দ্ৰীয় চাকাৰক প্ৰদান কৰিব লগা সময় কেতিয়াবাই উকলি গৈছে ৷ কিন্তু এতিয়ালৈকে প্ৰদান কৰা নাই প্ৰতিবেদন৷ বিটিচি নিৰ্বাচনৰ ব্যস্ততাৰ বাবে কোচ ৰাজবংশী  সকলৰ জনজাতিকৰণৰ বিষয়টো মন্ত্ৰীগৰাকীয়ে সম্পূৰ্ণ ভাবে পাহৰি গৈছে নেকি বুলিও বিবৃতিটোত নেতাদ্বয়ে প্ৰশ্ন কৰে৷ নেতাদ্বয়ে লগতে জনজাতি পৰিক্ৰমা বিভাগৰ মন্ত্ৰীগৰাকীৰ জনজাতিকৰণ বিষয়ত সদিচ্ছাৰ অভাবৰ বাবেই বৰ্তমানলৈকে  মন্ত্ৰীগোটৰ প্ৰতিবেদন দাখিল হোৱা নাই বুলিও কয়৷ বিবৃতটোত পুনৰ কয় যে অসম চৰকাৰে কমতাপুৰ স্বায়ত্ব শাসিত পৰিষদ গঠনৰ কথা উল্লেখ কৰিছিল যদিও প্ৰাৰম্ভিক কাম কাজ সমূহকে এতিয়ালৈ সম্পূৰ্ণ কৰা নাই ৷ জনজাতি পৰিক্ৰমা দপ্তৰৰ অসমৰ মন্ত্ৰী হৈও কেৱল একচেতিয়া চিন্তাধাৰাৰে কাম কৰি যোৱাৰ বাবে কোচ ৰাজবংশী সকলৰ মৌলিক সমস্যাসমূহ সমাধানৰ বাবে পলম হোৱা বুলিও নেতাদ্বয়ে কয়৷ অসম চৰকাৰক বিষয়সমূহ অনাহকত পলম নকৰি সোণকালে সমাধান কৰিবলৈকো নেতাদ্বয়ে আহ্বান জনায় ৷  আনহাতে ৮ জুলাইত ভিডিও কনফাৰেন্স যোগে কাৰ্যকৰী সভা অনুস্থিত কৰি পৰৱৰ্তী কাৰ্যপন্থা নিৰ্ধাৰণ কৰা হ'ব বুলিও বিবৃতিটোত সভাপতি আৰু সাধাৰণ সম্পাদকে বিবৃতিটোত উল্লেখ কৰিছে🔯 ৷