NEWS 4 BONGAIGAON

👉বঙাইগাঁও অসামৰিক চিকিৎসালয়ৰ নাৰ্চৰ দেহটো ধৰা পৰিল কোভিড- ১৯ পজিটিভ

👉তিনিগৰাকী চিকিৎসক আৰু কেইবাগৰাকী নাৰ্চক কোৱাৰেণ্টাইন 

👉ডাকঘৰ আৰু তিনি বেংক প্ৰতিষ্ঠান বন্ধৰ নিৰ্দেশ 

              বঙাইগাঁওঃ ৬ জুলাইঃ 

🔯বঙাইগাঁও জিলাত কৰ'না ভাইৰাছত আক্ৰান্তৰ সংখ্যা বৃদ্ধি পাই আছে ৷ আজি জিলাখনৰ ৭ জনকৈ ব্যক্তিৰ দেহত পুনৰ ধৰা পৰিছে কোভিড- ১৯ পজিটিভ ৷ ইয়াকেলৈ জিলাখনত মুঠ আক্ৰান্তৰ সংখ্যা ১৫৫ জনলৈ বৃদ্ধি পালে ৷ ইয়াৰ ভিতৰত ৭১ জন ব্যক্তি সুস্থ হোৱাৰ বিপৰীতে ৬৮ জন ব্যক্তি চিকিৎসাধীন হৈ আছে ৷ ইপিনে জিলাখনৰ বিভিন্ন চৰকাৰী চিকিৎসালয়ৰ চিকিৎসক,নাৰ্চ তথা স্বাস্থ্য কৰ্মীও কোভিড- ১৯ ত আক্ৰান্ত হ'বলৈ ধৰিছে ৷ জানিব পৰা মতে বঙাইগাঁও অসামৰিক চিকিৎসালয়ৰ এগৰাকী নাৰ্চৰ দেহতো কোভিড-১৯ পজিটিভ ধৰা পৰিছে ৷ নাৰ্চগৰাকী কোভিড-১৯ ত আক্ৰান্ত হোৱাৰ পিচতে এতিয়া চিকিৎসালয়খনৰ স্বাস্থ্যকৰ্মীসকলৰ মাজত লাগিছে হাহাকাৰ ৷ ইতিমধ্যে নাৰ্চগৰাকীৰ সংস্পৰ্শলৈ অহা ১২ গৰাকী নাৰ্চসহ স্বাস্থ্যকৰ্মীক ইনষ্টিটিউচনেল কোৱাৰেণ্টাইন কৰা হৈছে ৷ একেদৰে আন তিনিগৰাকী চিকিৎসক ক্ৰমে ডাঃ গৌতম দাস, ডাঃ হাফিজা আহমেদ আৰু ডাঃ কমলিকা দাসক হোম কোৱাৰেণ্টাইন কৰা হৈছে বুলিও জানিব পৰা গৈছে ৷ 

আনহাতে কোভিডত আক্ৰান্ত ব্যক্তিৰ সংস্পৰ্শলৈ অহাৰ বাবে বঙাইগাঁও চহৰৰ মুখ্য ডাকঘৰ , উত্তৰ বঙাইগাঁওস্থিত এইচডিএফচি বেংক আৰু আইডিবিআই বেংকৰ বঙাইগাঁও শাখাৰ লগতে নৰ্থ ইষ্ট স্মল ফাইনেন্স বেংক বন্ধ ৰখাৰ নিৰ্দেশ জাৰি কৰিছে বঙাইগাঁও জিলা উপায়ুক্তই ৷ উল্লেখ্য বঙাইগাঁও চহৰৰ দুজন ব্যক্তিৰ দেহত কোভিড ১৯ পজিটিভ ধৰা পৰাৰ পিচত জিলা প্ৰশাসনে ব্যক্তি দুগৰাকীৰ ভ্ৰমণ বৃত্তান্তত আক্ৰান্ত ব্যক্তিদ্বয়ে বঙাইগাঁও চহৰৰ মুখ্য ডাকঘৰৰ লগতে বেংক তথা বিত্তীয় প্ৰতিষ্ঠান সমূহত বিভিন্ন কামৰ বাবে যোৱাৰ তথ্য লাভ কৰে ৷ যাৰ বাবে বন্ধ কৰি দিয়া হৈছে ডাকঘৰ তথা বিত্তীয় প্ৰতিষ্ঠানসমূহ ৷ ইপিনে কোভিডত আক্ৰান্ত ব্যক্তিৰ সংস্পৰ্শলৈ অহা বঙাইগাঁও শাখা ষ্টেট বেংক অৱ ইণ্ডিয়া আৰু ইউনাইটেড বেংক অৱ ইণ্ডিয়া বেংক দুটা ২৯ জুনৰ পৰা বন্ধ কৰি দিছিল যদিও আজিৰে পৰা পুনৰ খোলাৰ বাবে জিলা প্ৰশাসনে নিৰ্দেশনা জাৰি কৰিছে ৷ অৱশ্যে বেংকৰ বিষয়া - কৰ্মচাৰীসকলে তথা গ্ৰাহকসকলে কৰ'না মহামাৰী প্ৰতিৰোধৰ বাবে মানি চলিবলগীয়া বিধি- বিধানসমূহ মানি চলিব লাগিব 🔯৷