NEWS 4 BONGAIGAON

👉চিৰাঙৰ বিজনীত বান পৰিদৰ্শন মন্ত্ৰী চন্দন ব্ৰহ্মৰ

          
            বঙাইগাঁওঃ ৮ জুলাইঃ 

🔯চিৰাং জিলাৰ বিজনী ৰাজহ চক্ৰৰ অন্তৰ্গত কেইবাখনো গাঁও এইবেলি আই নৈৰ বানৰ কৱলত পৰিছে। ভূটানৰ পৰা বৈ অহা আই নৈৰ বাঢ়নী পানীয়ে বিগত সপ্তাহত গতি সলনি কৰি চিৰাং আৰু  বঙাইগাঁও জিলাৰ সীমামূৰীয়া অঞ্চল ১ নং জাৰাগুৰী - ২ নং জামদহাৰ মাজেৰে প্ৰবেশ কৰি নধীয়াপাৰা, ২ নং জামদহা, ৩ নং জামদহা, ৪ নং আৰু ৫ নং জামদহা , ১ নং জাৰাগুৰীকে ধৰি বৃহত্তৰ ভাণ্ডাৰা অঞ্চল প্লাৱিত কৰে। যাৰ ফলত বিগত এসপ্তাহ ধৰি উক্ত অঞ্চল সমূহৰ বানপীড়িত ৰাইজে পথৰ দাঁতিত অস্থায়ী গৃহ সাজি আশ্ৰয় লৈ থাকিবলগীয়া হৈছে। তাৰোপৰি নধীয়াপাৰা ৰায় পাৰাস্থিত বৰ্ণালী ক্লাৱত পুৰুষ- মহিলা,শিশুসহ ৫২ জন, নধীয়াপাৰা প্ৰাথমিক বিদ্যালয় আৰু নধীয়াপাৰা অনচাই আফাদ ক্লাৱ এণ্ড  লাইব্ৰেৰীত ১৭৬ জন বানপীড়িত  লোকে বিগত এসপ্তাহ ধৰি আশ্ৰয় লৈ থাকিবলগীয়া হৈছে ।

আজি উক্ত বানপীড়িত অঞ্চল সমূহ ৰাজ্যৰ পৰ্যটন মন্ত্ৰী চন্দন ব্ৰহ্মৰ লগতে বিজনীৰ বিধায়ক কমলসিং নাৰ্জাৰী, উত্তৰ অভয়াপুৰী সমষ্টিৰ বিধায়ক আব্দুল হাই নাগৰী, প্ৰাক্তন বিধায়ক ভূপেন ৰায়, বিজনীৰ মহকুমাধিপতি ধ্ৰুৱজ্যোতি দাস , বিজনীৰ ৰাজহ চক্ৰ বিষয়া দৰদী দেৱৰায় সহ বিভিন্ন বিভাগৰ বিষয়াই পৰিদৰ্শন কৰে। পৰিদৰ্শনৰ পূৰ্বে নধীয়াপাৰা অনচাই আফাদ লাইব্ৰেৰী এণ্ড ক্লাৱত মন্ত্ৰী চন্দন ব্ৰহ্মই বানপীড়িত ৰাইজৰ সৈতে এক আলোচনাত মিলিত হয়। ইফালে মন্ত্ৰী গৰাকীয়ে ১ নং জাৰাগুৰী আৰু ২ নং জামদহাৰ মাজেৰে প্ৰৱেশ কৰা আই নৈ নাওৰে পৰিদৰ্শন কৰে।

উক্ত অঞ্চল সমূহ পৰিদৰ্শন কৰি মন্ত্ৰী চন্দন ব্ৰহ্মই সাংবাদিকৰ আগত কয় যে এইবেলি জাৰগুৰী আৰু জামদহাৰ মাজেৰে আই নৈখন সম্পূৰ্ণৰূপে প্ৰৱেশ কৰিছে। গতিকে নধীয়াপাৰা, জামদহা আদি কৰি বৃহত্তৰ ভাণ্ডাৰা অঞ্চল পানীৰ তলত থাকিব। নৈ খনৰ পানী অলপ কমিলে ইয়াৰ ব্যৱস্থা কৰা যাব। বানপানীত ক্ষতিগ্ৰস্ত পৰিয়ালক আমি উদ্ধাৰ কৰিম আৰু সকলোৰে বাবে অস্থায়ী আশ্ৰয় শিবিৰ স্থাপন কৰি সাহায্য প্ৰদানৰ সিদ্ধান্ত গ্ৰহণ কৰা হৈছে। নাওৰে যাত্ৰা কৰি মন্ত্ৰী চন্দন ব্ৰহ্মই নৈ খনৰ মাথাউৰি নিৰ্মানৰ পৰিকল্পনা কৰে । ইপিনে নাওৰে যাত্ৰা কৰি থাকোতে আই নৈৰ মাজত গৈ নাওখন বালিৰ মাজত আৱদ্ধ হৈ পৰে । পাছত একাংশ লোকে নাওঁ খন ঠেলি ঠেলি গভীৰ পানিত লৈ যায় । মন্ত্ৰী চন্দন ব্ৰহ্মই নিজেও আৱদ্ধ হোৱা নাওখন পুনৰ গভীৰ পানীলৈ নিয়াৰ ক্ষেত্ৰত সহায় কৰে🔯 ৷