NEWS 4 BONGAIGAON

👉চিৰাঙৰ বিজনীত আঠ শতাধিকৰ    বিপিএফত যোগদান 

        ৷৷৷ বঙাইগাঁওঃ ৮ জুলাই ৷৷৷

🔯কৰ'না ভাইৰাছৰ সংক্ৰমণৰ পৰিপ্ৰেক্ষিতত বিটিচিৰ পৰিষদীয় নিৰ্বাচন স্থগিত ৰখাৰ পাছত দল-সংগঠনৰ তৎপৰতা বৃদ্ধি পোৱা পৰিলক্ষিত হৈছে ৷ মঙলবাৰে চিৰাং জিলাৰ বিজনী মহকুমাৰ আনন্দ বজাৰত বিপিএফে এক যোগদান অনুষ্ঠানৰ আয়োজন কৰে ৷ আনন্দ বজাৰ আলাউৰীৰ সামূহিক কেন্দ্ৰত বিজনী জিলা বিপিএফৰ উদ্যোগত  অনুষ্ঠিত এই অনুষ্ঠানত মানাস-চেৰফাং পৰিষদীয় সমষ্টিৰ আঠ শতাধিক ভিন্ন দলৰ কৰ্মী তথা সমৰ্থকে আনুষ্ঠানিক ভাৱে বিপিএফত যোগদান কৰে  । উক্ত অনুষ্ঠানত মুখ্য অতিথি ৰূপে দলৰ জ্যেষ্ঠ নেতা তথা ৰাজ্যৰ মন্ত্ৰী চন্দন ব্ৰহ্ম, ৰাজ্য সভাৰ সাংসদ বিশ্বজিৎ দৈমাৰী, বিজনীৰ বিধায়ক কমল সিং নাৰ্জাৰী সহিতে কে'বাজনো দলীয় নেতা উপস্থিত থাকে । 

বিজনীৰ  বিধায়ক কমলসিং নাৰ্জাৰীয়ে আঁত ধৰা যোগদান পৰ্বত কোকৰাঝাৰৰ সাংসদ নৱ কুমাৰ শৰণীয়াৰ নেতৃত্বৰ গণ সুৰক্ষা দলৰ লগতে প্ৰমোদ বড়ো নেতৃত্বাধীন ইউ পি পি এলৰ পৰাও বি পি এফত যোগদান কৰে বুলি দলৰ জ্যেষ্ঠ নেতা তথা ৰাজ্যৰ পৰ্যটন বিভাগৰ মন্ত্ৰী চন্দন ব্ৰহ্মই সংবাদ মাধ্যমৰ আগত প্ৰকাশ কৰে । তেওঁ কয় সম্প্ৰতি বিটিচি নিৰ্বাচনৰ বাবে ৰাজ্য চৰকাৰৰ নিৰ্দেশনা আছে ৷ ৰাজ্যিক নিৰ্বাচন আয়োগৰ পৰা নিৰ্বাচন অনুষ্ঠিত কৰাৰ নিৰ্দেশ দিলেই দলে সম্পূৰ্ণ ভাৱে নিৰ্বাচনী কাম -কাজ আৰম্ভ কৰিব ৷ সংবাদ মাধ্যমৰ আগত জ্যেষ্ঠ নেতা ব্ৰহ্মই বিটিচিত পুনৰাই হাগ্ৰামা মহিলাৰীৰ নেতৃত্বত বিটিচি পৰিষদ গঠন হ'ব বুলি ব্যক্ত কৰি সমাগত পৰিষদীয় নিৰ্বাচনত দলে ৩০ খন আসন লাভ কৰিব বুলি দাবী কৰে ৷ সভাত ৰাজ্য সভাৰ সাংসদ বিশ্বজিত দৈমাৰীয়ে দলে ৰাইজৰ উন্নয়ন আৰু সমস্যা সমাধান কৰি আহিছে বুলি প্ৰকাশ কৰি হাগ্ৰামা মহিলাৰীয়ে বিটিচিৰ উন্নয়নত উল্লেখনীয় কাম কৰিছে বুলিও উল্লেখ কৰে ৷🔯