👉বঙাইগাঁৱত চি পি আই ( এম) ৰ বিক্ষোভ কাৰ্যসূচী ৰূপায়ণ

👉বঙাইগাঁৱত চি পি আই ( এম) ৰ বিক্ষোভ কাৰ্যসূচী ৰূপায়ণ 

👉প্ৰধানমন্ত্ৰীলৈ ১৬ দফীয়া দাবী সম্বলিত স্মাৰক পত্ৰ প্ৰেৰণ 

            বঙাইগাঁওঃ ২৬ আগষ্টঃ 

📝আজি চি পি আই ( এম) য়ে বিভিন্ন দাবীত আহ্বান জনোৱা দেশজোৰা বিক্ষোভ কাৰ্যসূচীৰ অংশ হিচাপে বঙাইগাঁৱতো দলটোৱে এই কাৰ্যসূচী ৰূপায়ণ কৰে ৷ চি পি আই ( এম)ৰ বঙাইগাঁও আঞ্চলিক সমিতিৰ উদ্যোগত জিলা উপায়ুক্ত কাৰ্যালয়ৰ সন্মুখত ৰূপায়ণ কৰা এই বিক্ষোভ কাৰ্যসূচীৰ জৰিয়তে বিক্ষোভকাৰীসকলে আয়কৰ নিদিয়া সকলো পৰিয়ালক মাহিলী ৭,৫০০ টকাকৈ আদায় দিয়া ,সকলো অভাৱী ব্যক্তিক মাহিলী ১০ কেজিকৈ খাদ্য সামগ্ৰী যোগান ধৰা ,স্বাস্থ্য সেৱাত অৰাজকতাৰ অৱসান কৰা ,গণতন্ত্ৰৰ ওপৰত আক্ৰমণ বন্ধ কৰা ,ৰাজহুৱা শিল্প প্ৰতিষ্ঠানৰ বেচৰকাৰীকৰণ বন্ধ কৰা আদিকে ধৰি ১৬ টা দাবী জনায় ৷ উল্লেখ্য যে বিক্ষোভ কাৰ্যসূচী ৰূপায়ণ কৰাৰ পূৰ্বে কাৰ্যসূচীত অংশগ্ৰহণ কৰা নেতা- কৰ্মীসকল স্থানীয় গান্ধী ময়দানত একত্ৰিত হয় আৰু তাৰ পৰা হাতে হাতে ৰঙা পতাকা ,বেনাৰ  আৰু প্লেকাৰ্ডলৈ বিভিন্ন চৰকাৰ বিৰোধী শ্লোগান দি প্ৰতিবাদী সমদল উলিয়াই জিলা উপায়ুক্ত কাৰ্য়ালয়ৰ সন্মুখত উপস্থিত হৈ বিক্ষোভ কাৰ্যসূচী ৰূপায়ণ কৰে ৷ এই বিক্ষোভ কাৰ্যসূচীত চি আই টি ইউয়েও অংশ লয় ৷ কাৰ্যসূচীৰ অন্তত  জিলা উপায়ুক্তৰ জৰিয়তে ভাৰতৰ প্ৰধানমন্ত্ৰীলৈ এখন ১৬ দফীয়া দাবী সম্বলিত স্মাৰক পত্ৰ প্ৰেৰণ কৰে ৷ স্মাৰক পত্ৰখন জিলা উপায়ুক্তৰ হৈ কাৰ্যবাহী দণ্ডাধীশ কবিতা ডেকাই গ্ৰহণ কৰে ৷ শেষত গান্ধী ময়দানত এখন চমু সভাও অনুষ্ঠিত কৰে ৷

সভাত আঞ্চলিক সমিতিৰ সাধাৰণ সম্পাদক  হৰেশ্বৰ দাস ,শ্ৰমিক নেতা সঞ্জীৱ দেৱ ,পূণ্য দাস , মহিলা নেত্ৰী বিজয়া ৰায় আদিয়ে বক্তব্য ৰাখে ৷ ইপিনে প্ৰধানমন্ত্ৰীলৈ প্ৰেৰণ কৰা স্মাৰক পত্ৰত উপৰোক্ত দাবীসমূহৰ উপৰিও এমএনৰেগাৰ সম্প্ৰসাৰণ কৰি বৰ্দ্ধিত মজুৰীৰে বছৰি  অতিকমেও ২০০ দিনৰ কৰ্মসংস্থাপন  নিশ্চিত কৰাৰ লগতে  কৰ্মসংস্থাপন নিশ্চয়তা আইন চালু কৰা আৰু নিবনুৱা ভাট্টা ঘোষণা কৰা , আন্তঃৰাজ্য প্ৰব্ৰজিত শ্ৰমিকৰ আইনখন শক্তিশালী কৰা ,ৰাজহুৱা স্বাস্থ্যখণ্ডত কেন্দ্ৰীয় ব্যয় অতিকমেও জি ডি পি ৰ ৩ শতাংশলৈ বৃদ্ধি কৰা, নিত্য প্ৰয়োজনীয় সামগ্ৰী আইন বাতিল আৰু এ পি এম চি আইন সংশোধন কৰি অনিয়ন্ত্ৰিত মূল্যত ৰাজ্যসমূহৰ মাজত খাদ্যশস্যৰ অনা- নিয়া কৰিব বিচৰা অধিসূচনা বাতিল কৰা ,প্ৰচলিত শ্ৰমিক আইন বাতিল,সংশোধন, স্থগিত কৰিব বিচৰা প্ৰস্তাৱসমূহ উঠাই লোৱা ,প্ৰধানমন্ত্ৰীৰ নামযুক্ত ব্যক্তিগত ন্যাস এটাত জমা হোৱা সকলো ধন অতিমাৰীৰ বিৰুদ্ধে যুঁজ দিয়া ৰাজ্যসমূহক প্ৰদান কৰা , অতিমাৰীৰ বিৰুদ্ধে যুঁজ কৰাৰ বাবে যিহেতু দুৰ্যোগ ব্যৱস্থাপনা আইন কাৰ্যকৰী হৈ আছে সেয়ে অতিমাৰীত মৃত্যু হোৱা মৃতকৰ পৰিয়াললৈ ৰাষ্ট্ৰীয় দুৰ্যোগ সাহাৰ্য পুঁজিৰ পৰা এককালীন সাহাৰ্য  ঘোষণা কৰা , এচ টি ,এচ চি ,অ বি চি আৰু অক্ষম সকলৰ বাবে থকা সংৰক্ষণ গুৰুত্বসহকাৰে কাৰ্যকৰী কৰাৰ লগতে পূৰণ নহোৱা সকলো খালী পদ পূৰণ কৰা, চূড়ান্ত বৰ্ষৰ স্নাতক আৰু স্নাতকত্তোৰ পাঠ্যক্ৰমত অধ্যয়ণৰত ছাত্ৰ- ছাত্ৰীক পূৰ্বৰ ষান্মাষিকৰ ফলাফলৰ ভিত্তিত পৰীক্ষণ কৰি ডিগ্ৰী প্ৰদান কৰা, 

জম্মু- কাশ্মীৰত ২০১৯ ৰ আগষ্টৰ পৰা আটক কৰি ৰখাসকলক অতিশীঘ্ৰে মুক্তি দিয়াৰ লগতে মুক্ত বিচৰণ আৰু সকলো ধৰণৰ যোগাযোগ ব্যৱস্থা পুনৰ প্ৰতিষ্ঠা কৰা ,ইউএপিএ, এনএচএ ৰাষ্ট্ৰদ্ৰোহ আদি আইনৰ জৰিয়তে গ্ৰেপ্তাৰ কৰি ৰখা ৰাজনৈতিক বন্দীসকলক মুক্তি দিয়া , ইআইএ ২০২০ অধিসূচনা বাতিল কৰা , দলিতসকলৰ বিৰুদ্ধে জাতিগত হিংসা ,মহিলাৰ বিৰুদ্ধে ঘৰুৱা তথা যৌন হিংসা আৰু জনজাতিসকলক শোষণ কৰা ব্যক্তিসকলক শাস্তি প্ৰদান কৰা আদি১৬ দফীয়া দাবী জনায়🔯 ৷