👉চিৰাঙৰ ভাৰত - ভূটান সীমান্তৰ দাদগিৰিত হাতীৰ দাঁতসহ এজনক গ্ৰেপ্তাৰ

 👉চিৰাঙৰ ভাৰত - ভূটান সীমান্তৰ দাদগিৰিত হাতীৰ দাঁতসহ এজনক গ্ৰেপ্তাৰ 

          বঙাইগাঁওঃ ২৪ আগষ্টঃ

📝চিৰাং জিলাৰ ভাৰত - ভূটান সীমান্তৰ দাদগিৰিত আৰক্ষীয়ে হাতীৰ দাঁতসহ এজন লোকক গ্ৰেপ্তাৰ কৰিছে । এক গোপন সূত্ৰৰ খবৰৰ ভিত্তিত চিৰাং জিলাৰ অতিৰিক্ত আৰক্ষী অধীক্ষক প্ৰকাশ মেধিৰ নেতৃত্বত ৰুণীখাটা আৰক্ষী আৰু বনবিভাগৰ সহযোগত দেওবাৰে বিয়লিৰ পৰা নিশালৈকে চলোৱা অভিযানত ভাৰত-ভূটান সীমান্তৰ দাদগিৰিৰ পৰা এলেন বসুমতাৰী নামৰ লোকজনক আটক কৰাৰ লগতে দুডালকৈ দহ কিলোগ্ৰাম ওজনৰ হাতীৰ দাঁত উদ্ধাৰ কৰিবলৈ সক্ষম হয় । ইয়াৰ উপৰিও অভিযানকাৰী দলটোৱে বন্য জন্তুৰ অংগৰ চোৰাং ব্যৱসায়ীটোৰ পৰা এটা মোবাইল ফোন আৰু এটা ৰেইন কোট জব্দ কৰে । উল্লেখ্য যে ৰুণীখাটা থানাৰ ভাৰপ্ৰাপ্ত আৰক্ষী বিষয়া ৰাম চন্দ্ৰ ৰাভাই এদিন আগৰ পৰাই নিজেই চোৰাং ব্যবসায়ী হিচাপে পৰিচয় দি চক্ৰটোৰ সৈতে দৰদাম কৰি আছিল । দেওবাৰে নিশা সাধাৰণ পোচাকত যোৱা আৰক্ষীৰ দলটোৱে দাদগিৰিৰ এলেন বসুমতাৰী নামৰ ব্যক্তিজনৰ ঘৰত হাতীৰ দাঁত দুটা আনিবলৈ যায় । 

কিন্তু কথা বতৰা চলি থকাৰ সময়তে বন্য জীৱ জন্তুৰ অংগ- পতংগৰ চোৰাং চক্ৰটোৰ সন্দেহ ওপজাত সাধাৰণ পোচাকত যোৱা আৰক্ষী বিষয়াজনক আক্ৰমণ কৰিবলৈ উদ্যত হয় । এনে অৱস্থাত পূৰ্বৰে পৰা নিৰ্দিষ্ট দূৰত্বত চোপ পাতি থকা অতিৰিক্ত আৰক্ষী অধীক্ষক প্ৰকাশ মেধীসহ অভিযানকাৰী দলটোৱে ঘৰটো ঘেৰি লৈ বন্য জীৱ- জন্তুৰ অংগ-পতংগৰ চোৰাং ব্যবসায়ী চক্ৰটোৰ সৈতে জড়িত এলেন বসুমতাৰী নামৰ লোক জনক গ্ৰেপ্তাৰ কৰে ।  ঘটনা সন্দৰ্ভত আৰক্ষীয়ে দাদগিৰি আৰক্ষী চকীত ৩২১ / ২০ নম্বৰত এটি গোচৰ ৰুজু কৰি তদন্ত অব্যাহত ৰাখিছে । ইপিনে চিৰাং বন প্ৰাধিকাৰী ব্ৰহ্মানন্দ পাতিৰিয়ে জানিবলৈ দিয়া মতে চিৰাং জিলাত চলিত লক ডাউনৰ সময়ত মানাস ৰাষ্ট্ৰীয় উদ্যানত তিনিটাকৈ বনৰীয়া হাতী চোৰাং চিকাৰীয়ে হত্যা কৰিছে ৷ এই হাতী সমূহৰ মৃতদেহ উদ্ধাৰ কৰা হৈছে ৷ বন প্ৰাধিকাৰী পাতিৰিয়ে আৰু জনোৱা মতে চিৰাঙত অনুমানিক ষাঠি কিলোগ্ৰাম ওজনৰ হাতী দাঁত চোৰাং কাৰবাৰত জড়িতই লুকাই ৰাখিছে🔯৷