👉বঙাইগাঁৱত ছহিদ- নিৰ্যাতিত পৰিয়াল পৰিষদৰ আমৰণ অনশন কাৰ্যসূচী ৰূপায়ণ

👉বঙাইগাঁৱত ছহিদ- নিৰ্যাতিত পৰিয়াল পৰিষদৰ আমৰণ অনশন কাৰ্যসূচী ৰূপায়ণ 

👉মুখ্যমন্ত্ৰীলৈ স্মাৰক পত্ৰ প্ৰেৰণ 

                বঙাইগাঁওঃ১চেপ্তেম্বৰঃ

📝অসম আন্দোলনৰ ছহিদ - নিৰ্যাতিত পৰিয়ালৰ সদস্যসকলক নিযুক্তিৰ ক্ষেত্ৰত ৰাজ্য চৰকাৰে প্ৰদৰ্শন কৰা চৰম অৱহেলাৰ অভিযোগ তুলি সদৌ অসম ছহিদ - নিৰ্যাতিত পৰিয়াল পৰিষদে ৰাজ্যজুৰি আহ্বান জনোৱা আমৰণ অনশন কাৰ্যসূচী আজি বঙাইগাঁৱতো ৰূপায়িত হয় ৷ বঙাইগাঁও জিলা আছুৰ মুখ্য কাৰ্যালয় ছহিদ ভৱন প্ৰাংগণত সদৌ অসম ছহিদ - নিৰ্যাতিত পৰিয়াল পৰিষদৰ  বঙাইগাঁও আৰু গোৱালপাৰা জিলা সমিতিয়ে যৌথভাৱে ৰূপায়ণ কৰা আমৰণ অনশন কাৰ্যসূচীত অংশগ্ৰহণ কৰা ছহিদ -নিৰ্যাতিত পৰিয়ালৰ সদস্যসকলে এই কাৰ্যসূচীৰ জৰিয়তে ছহিদ - নিৰ্যাতিত পৰিয়ালৰ সদস্য - সদস্যাই আবেদন কৰা বিভাগসমূহৰ পৰা আবেদনকাৰী সকলৰ নামসমূহ সংগ্ৰহ কৰি নিযুক্ত পত্ৰ দিয়াৰ ব্যৱস্থা কৰা ,অসম চৰকাৰৰ জলসম্পদ বিভাগত যি দৰে ৫ জনক নিযুক্ত দিছে ,ঠিক সোইদৰে বাকী ৩১০ নিযুক্তি দিয়া আৰু ছহিদৰ তেজ আৰু ত্যাগৰ দলিল অসম চুক্তিৰ ৭৯ পৃষ্ঠাৰ ৬ নং দফাত ছহিদ- নিৰ্যাতিত পৰিয়ালৰ উন্নয়নৰ আঁচনি ,স্থায়ী নিযুক্তিৰ আসন সংৰক্ষণ তথা অন্তৰ্ভুক্তি কৰি শীঘ্ৰে ৰূপায়ণৰ ব্যৱস্থা কৰাৰ দাবী উত্থাপন কৰে ৷

ইপিনে জিলা সমিতিৰ সম্পাদক জিতেন্দ্ৰ চন্দ্ৰ সৰকাৰে সংবাদ মাধ্যমৰ আগত দুখ প্ৰকাশ কৰি কয় যে আমি অসম আন্দোলনৰ ছহিদ- নিৰ্যাতিত পৰিয়ালৰ দুখ - দুৰ্দশা , অভাৱ - অভিযোগসমূহ বাৰম্বাৰ চৰকাৰক অগত কৰি আহিছো যদিও চৰকাৰে সেইক্ষেত্ৰত একো ইতিবাচক পদক্ষেপ গ্ৰহণ নকৰি প্ৰতিটো ক্ষেত্ৰতে অৱহেলা কৰা দেখা গৈছে ৷ বিগত ২০১৬ চনত মুখ্যমন্ত্ৰী সৰ্বানন্দ সোনোৱাল চৰকাৰৰ ১০০ দিনীয়া কাৰ্যসূচীত ৩১৫ জন সদস্য- সদস্যাক নিযুক্তি দিয়াৰ প্ৰতিশ্ৰুতি দিছিল ৷ কিন্তু ইতিমধ্যে ৪ টা বছৰ উকলি গ'ল ৷ এই সময়চোৱাৰ ভিতৰতে ২০১৮ চনত ৫ জন সদস্য- সদস্যাক চৰকাৰী চাকৰিত নিযুক্তি দিলে যদিও বাকা ৩১০ জনক বঞ্চিত কৰি ৰাখিলে ৷ যাৰ বাবে সমগ্ৰ অসমৰ লগতে বঙাইগাঁও জিলাতো ছহিদ- নিৰ্যাতিতি পৰিয়ালৰ সদস্য- সদস্যাসকলে আমৰণ অনশন কাৰ্যসূচী ৰূপায়ণ কৰিবলৈ বাধ্য হলো বুলি কয় ৷ সম্পাদকগৰাকীয়ে লগতে কয় যে সোনোৱাল চৰকাৰৰ দিনত অসম আন্দোলনৰ ছহিদ- নিৰ্যাতিত পৰিয়ালৰ প্ৰাপ্যৰ বাবে আন্দোলন কৰিব লাগিব বুলি ভবা নাছিলো ৷ তাৰ কাৰণে আমি অতিকৈ দুখিত ৷

লগতে অনশনস্থলীৰ পৰা পুনৰবাৰ মুখ্যমন্ত্ৰীক আহ্বান জনাই কয় যে আমাৰ দাবীসমূহ অহা ৩০ চেপ্তেম্বৰৰ ভিতৰত সমাধান নকৰিলে অনাগত দিনত জংগী আন্দোলনৰ কাৰ্যসূচী গ্ৰহণ কৰিবলৈ বাধ্য হ'ম ৷ উল্লেখ্য যে জিলা সমিতিয়ে ওপৰোক্ত দাবী সন্দৰ্ভত জিলা উপায়ুক্তৰ জৰিয়তে মুখ্যমন্ত্ৰীলৈ এখন স্মাৰক পত্ৰও প্ৰেৰণ কৰে ৷ কাৰ্যসূচীত সংগঠনটোৰ জিলা সমিতিৰ সভাপতি বিৰাজ মোহন ৰায় আদিৰ লগতে বঙাইগাঁও জিলা ছাত্ৰ সন্থাৰ সভাপতি যিনোদ কুমাৰ নাথ ,সাধাৰণ সম্পাদক জ্যোতি শংকৰ ৰায় চৌধুৰী আদিও অংশগ্ৰহণ কৰে🔯 ৷