👉বঙাইগাঁৱত কৃষক মুক্তি সংগ্ৰাম সমিতিৰ কেন্দ্ৰীয় কাৰ্যনিৰ্বাহক সভা

👉বঙাইগাঁৱত কৃষক মুক্তি সংগ্ৰাম সমিতিৰ কেন্দ্ৰীয় কাৰ্যনিৰ্বাহক সভা 

 👉এক ঐক্যৱদ্ধ আপোচ বিহীন আঞ্চলিক ৰাজনৈতিক দল গঠনৰ পোষকতা 

👉'কা' বিৰোধী আন্দোলন তীব্ৰতৰ কৰা , অখিল গগৈৰ মুক্তিৰ দাবীত জিলাই জিলাই আন্দোলন গঢ়ি তোলাৰো প্ৰস্তাৱ গ্ৰহণ

👉অখিল গগৈ জেলত থাকিলেও গঠন হ'ব ৰাজনৈতিক দল 

👉২১ ত বিজেপিক উৎখাত কৰিবলৈ হলে আমি একলগ হ'ব লাগিব -- ধৈৰ্য কোঁৱৰ

                 বঙাইগাঁও, ১ ছেপ্তেম্বৰঃ 

📝সাম্প্ৰতিক সময়ত এক ঐক্যৱদ্ধ আপোচ বিহীন আঞ্চলিক ৰাজনৈতিক দল গঠনৰ পোষকতা কৰিছে কৃষক মুক্তি সংগ্ৰাম সমিতিয়ে ৷ আজি বঙাইগাঁও চহৰৰ বীৰঝৰা পাব্লিক লাইব্ৰেৰীত অনুষ্ঠিত সংগঠনটোৰ এখন কেন্দ্ৰীয় কাৰ্যনিৰ্বাহক সভাত অংশ গ্ৰহণ কৰিবলৈ আহি সংবাদ মাধ্যমৰ আগত এই মন্তব্য কৰে সংগঠনটোৰ যুটীয়া সম্পাদক ধৈৰ্য কোঁৱৰে ৷ যুটীয়া সম্পাদকগৰাকীয়ে কয় যে আমি 'কা ' আন্দোলনক অধিক তীব্ৰতৰ তথা শক্তিশালী কৰি তুলিবলৈ এলানি পদক্ষেপ গ্ৰহণ কৰিছো ৷ লগতে এটা ৰাজনৈতিক বিকল্প দিবৰ কাৰণে তথা প্ৰকৃতাৰ্থত অসমৰ মানুহৰ মুক্তিৰ হকে এটা ৰাজনৈতিক বিকল্প দিবৰ কাৰণে ঐক্যবদ্ধভাবে আপোচহীন এটা ৰাজনৈতিক দল গঠন সন্দৰ্ভত আমি সকলো পক্ষকই মিলি এটা দল গঠন কৰিবৰ কাৰণে যিখিনি পাৰম্ভিক কাম-কাজ আৰু কচৰৎ কৰিব লাগে, সেই কচৰতৰে অংশ হিচাপে বঙাইগাঁৱত এই কাৰ্যনিৰ্বাহক সভা অনুষ্ঠিত কৰা হৈছে বুলিও কয় ৷ কৃষক মুক্তিৰ নেতাগৰাকীয়ে কয় যে আমি এক ঐক্যবদ্ধ আপোচবিহীন ৰাজনৈতিক দলৰ কথা কৈছোঁ ৷ এটাই দল হ'ব লাগে , এখনেই পতাকা হ'ব লাগে আৰু এখনেই সংবিধান হ'ব লাগে ৷ অসমৰ মানুহেও আচলতে আমাক একেলগে কাম কৰাতো বিচাৰিছে ৷ একেলগে মিলি এটা এটা আপোচ বিহীন আঞ্চলিক শক্তি গঠন হোৱাটো বিচাৰিছে আৰু সেইটোৱে বিকল্প দিব ৷

 যুটীয়া সম্পাদকগৰাকীয়ে আছুৰ লগত এতিয়ালৈকে আনুষ্ঠানিকভাৱে কথা- বতৰা হোৱা নাই বুলিও কয় ৷ অৱশ্যে নেতাগৰাকীয়ে লগতে কয় যে আমি ভাবো সকলো পক্ষই এদিন ঐক্যমতত উপনিত হ'ব ৷ কাৰণ অসমৰ ৰাইজে বিচাৰিলে বা জনজীৱনৰ পৰা উঠি অহা প্ৰশ্নক কোনেও নসাৎ কৰিব নোৱাৰে ৷ আমি জাতীয় কথাতে জাতীয় কৰ্তব্য বুলি ভাবিয়ে একলগ হ'ব লাগিব ৷ এয়া আমাৰ জাতীয় দায়িত্ব ৷ গতিকে আমি একলগ হ'ব লাগিব আৰু অসমৰ মানুহে একলগ হোৱাতো বিচাৰিছে ৷ বিভিন্ন জাতীয় - জনগোষ্ঠীয় সংগঠন আছু ,কৃষক মুক্তি ,অসম জাতীয়তাবাদী যুৱ ছাত্ৰ পৰিষদ আৰু যিবিলাক জাতীয়তাবাদী আদৰ্শত বিশ্বাসী ৰাজনৈতিক দল আছে , আঞ্চলিক দল আছে সকলোৱে একলগ হ'ব লাগিব ৷ তেতিয়াহে ২১ ত বিজেপিক পৰাভূত কৰাতো সম্ভৱ হ'ব ৷ নহলে বিজেপিক আমি উৎখাত কৰিব নোৱাৰিম ৷ যিটো অসমৰ মানুহৰ কাৰণে ক্ষতিকাৰক কথা হ'ব ৷ গতিকে বিজেপিক উৎখাত কৰিবলৈ হলে তথা বিজেপিক যদি সঁচাকৈ আমি অসমৰ মাটিৰ পৰা উৎখাত কৰিম বুলি ভাবিছো বা বিজেপিক আমি সঁচাকৈ পৰাভূত কৰিম বুলি ভাবিছো ,তেতিয়াহলে আমি সকলোৱে একলগ হ'ব লাগিব ৷ ইপিনে ৰাজনৈতিক দল গঠনৰ কুচকাৱাজৰ সময়তে কৃষক নেতা অখিল গগৈ কাৰাৰুদ্ধ হৈ থকাত কিদৰে আগবাঢ়িব বুলি সাংবাদিকে প্ৰশ্ন কৰাত যুটীয়া সম্পাদকগৰাকীয়ে কয় যে অখিল গগৈ জেলত থাকিলেও ৰাজনৈতিক দল গঠন হ'ব ৷ কাৰণ অখিল গগৈক অতি অন্যায়ভাৱে গ্ৰেপ্তাৰ কৰি ৰাখিছে ৷ কোনো তথ্য প্ৰমাণ নোহোৱাকৈ গ্ৰেপ্তাৰ কৰি ৰখা হৈছে ৷ গতিকে আমাৰ আইন তথা ন্যায়ালয়ৰ ওপৰত বিশ্বাস আছে আৰু ন্যায়ালয়ে আমাক ন্যায় দিব বুলি আশা কৰিব পাৰো ৷ আমি আশাবাদী আৰু ন্যায়ালয়ৰ ওপৰত আমাৰ বিশ্বাস আছে ৷ সেয়ে অখিল গগৈ অতি সোনকালে মুকলি আকাশৰ তললৈ আহিব বুলি আমি বিশ্বাস কৰো ৷ 

যি কি নহওক আমি সকলো পক্ষ লগ হৈ এক ঐক্যবদ্ধ আপোচহীন আঞ্চলিক ৰাজনৈতিক দল বিচাৰিছো আৰু এই ৰাজনৈতিক দলটোৱে অসমৰ মানুহক প্ৰকৃত বিকল্প দিব পাৰিব ৷ আমি সেই কাৰ্যত ব্ৰত আছো আৰু দৃঢ় প্ৰতিজ্ঞ আৰু স্থিতিত অটল আছো যে অসমত এক বিকল্প দিব পৰা আপোচহীন ৰাজনৈতিক দল গঠন হ'ব ৷ আনহাতে সোমবাৰে একাংশ কৃষক মুক্তিৰ সদস্যই বিজেপি দলত যোগদান কৰা সন্দৰ্ভত সাংবাদিকে নেতাগৰাকীক প্ৰশ্ন কৰাত কয় যে কৃষক মুক্তিৰ কোনো সদস্যই বিজেপিত যোগদান কৰা নাই ৷ আচলতে বিজেপিয়ে আমাৰ উত্থান দেখি শংকিত হৈছে ৷ আমাৰ উত্থান দেখি ৰঞ্জিত দাসে থৰকাচুটি হেৰুৱাইছে ৷ সেই কাৰণে বাটৰ মানুহ ধৰি আনি তেওঁলোকক কৃষক মুক্তিৰ সদস্য সজাইছে ৷ গতিকে এয়া এক চৰম বহুৱালি ৷ ৰঞ্জিত দাসক কৈছো যে নাটক কিয় কৰিব লাগে ? যোগদান কৰিছে যদি সঁচাকৈ কৃষক মুক্তিৰ সদস্যক যোগদান কৰাওক ৷ জনমানসত সংগঠনটোক হেয় প্ৰতিপন্ন কৰিবৰ কাৰণে এনেকুৱা ষড়যন্ত্ৰ নকৰাটো ভাল ৷ লেখন হাজৰিকা এসময়ত আমাৰ সংগঠনৰ সদস্য আছিল ৷ নদী বান্ধ আন্দোলনৰ সময়ত সক্ৰিয় আছিল যদিও পৰৱৰ্তী সময়ত নিষ্ক্ৰীয় হৈ আছিল আৰু বিগত ফেব্ৰুৱাৰী মাহতে তেওঁক সংগঠনৰ পৰা বিদায় দিয়া হৈছে ৷ সেয়ে তেওঁ এতিয়া আমাৰ সংগঠনৰ সদস্য নহয় ৷ কৃষক মুক্তিৰ কোনো সদস্যই বিজেপিত যোগদান নকৰে ৷ কাৰণ এই সংগঠনটো মাটিৰ পৰা উঠি অহা সংগঠন বুলিও কয় ৷ ইপিনে বঙাইগাঁও চহৰৰ বীৰঝৰা পাব্লিক লাইব্ৰেৰীত অনুষ্ঠিত কেন্দ্ৰীয় কাৰ্যনিৰ্বাহক সভাত মূলত তিনিটা বিষয়ৰ ওপৰত আলোচনা হোৱাৰ লগতে প্ৰস্তাৱ গ্ৰহণ কৰে ৷ সংগঠনটোৰ কাৰ্যকৰী সভাপতি অনিল বড়োৰ সভাপতিত্বত অনুষ্ঠিত সভাত 'কা' আন্দোলনক তীব্ৰতৰ কৰি তোলাৰ লগতে প্ৰতিখন গাঁৱৰ পৰা আৰম্ভ কৰাৰ কাৰণে জিলা সমিতিসমূহক নিৰ্দেশনা দি প্ৰস্তাৱ গ্ৰহণ কৰে ৷ সেইদৰে সকলো জাতি - জনগোষ্ঠীয় দল- সংগঠন ,নতুনকৈ গঠন হোৱা সকলো জাতীয়তাবাদী আদৰ্শৰ ৰাজনৈতিক দলসমূহক একত্ৰিত কৰি এক বিকল্প জাতীয়তাবাদী আপোচ বিহীন আঞ্চলিক ৰাজনৈতিক দল গঢ়ি তোলাৰ বাবে প্ৰস্তাৱ গ্ৰহণ কৰাৰ লগতে কাৰাৰুদ্ধ কৃষক নেতা অখিল গগৈৰ মুক্তিৰ বাবে প্ৰতিখন জিলা সমিতিয়ে উমৈহতীয়া আন্দোলনৰ কাৰ্যসূচী গ্ৰহণৰো প্ৰস্তাৱ লয় ৷ এঘাৰখন জিলাৰ প্ৰতিনিধি উপস্থিত থকা কাৰ্যনিৰ্বাহক সভাত কেন্দ্ৰীয় সমিতিৰ যুটীয়া সম্পাদক মুকুট ডেকা , ছাত্ৰ মুক্তি সংগ্ৰাম সমিতিৰ সভাপতি বিটু সোনোৱাল ,কাৰ্যকৰী সভাপতি মানস কোঁৱৰ , উপদেষ্টা লুচন শ্যাম গোঁহাই আৰু হুছেইন মহম্মদ ছাহজাহান আদি উপস্থিত থাকে ৷ আনহাতে সভাৰ পিচত বৰপাৰাৰ জ্যোতি সংঘত জিলাখনৰ বিভিন্ন জাতীয় - জনগোষ্ঠীয় সংগঠনৰ প্ৰতিনিধিৰে মিলিত হোৱাৰ লগতে সকলোৱে একেলকে কাম কৰাৰ আশ্বাস প্ৰদান কৰে আৰু ঐক্যমতত উপনীত হয় বুলি জানিব পৰা গৈছে🔯 ৷