👉বঙাইগাঁও জিলাৰ ১ নং নাচনকুৰিত মাতৃ -কন্যাৰ মৃতদেহ উদ্ধাৰঃ হত্যাৰ অভিযোগ

👉বঙাইগাঁও জিলাৰ ১ নং নাচনকুৰিত মাতৃ -কন্যাৰ মৃতদেহ উদ্ধাৰঃ হত্যাৰ অভিযোগ

                    বঙাইগাঁওঃ ১১ মাৰ্চঃ 

📝বঙাইগাঁও জিলাৰ মাণিকপুৰ থানাৰ অন্তৰ্গত ১ নং নাচনকুৰিত আজি পুৱা ৰহস্যজনকভাৱে মাতৃ আৰু ডেৰ বছৰীয়া কণমানি কন্যা শিশুৰ মৃতদেহ নিজ গৃহত উদ্ধাৰ হোৱা ঘটনাই অঞ্চলটোত তীব্ৰ চাঞ্চল্যৰ সৃষ্টি কৰে। প্ৰাপ্ত তথ্যমতে, ১ নং নাচনকুৰি  নিৱাসী শ্ৰমিক মাৰখত আলী(৩৫)ৰ পত্নী মঞ্জুৱাৰা খাতুনৰ(২৪) আজি পুৱা ৰহস্যজনকভাৱে শোৱনী কোঠাত চীপ লৈ থকা অৱস্থাত মৃতদেহ উদ্ধাৰ হোৱাৰ লগতে একেটা কোঠালীতে ডেৰ বছৰীয়া কন্যা শিশু মৰিয়ম খাতুনৰ মৃতদেহ উদ্বাৰ হয়। ইফালে, এই ঘটনাক পৰিকল্পিত হত্যাকাণ্ড বুলি অভিযোগ উত্থাপন কৰিছে বৰপেটা জিলাৰ কলহভাঙা নিৱাসী তথা  মৃতা মঞ্জুৱাৰা খাতুনৰ ককায়েক হুছেন আলীয়ে । ঘটনা সন্দৰ্ভত হুছেন আলীয়ে মাণিকপুৰ থানাৰ অন্তৰ্গত গেৰুকাবাৰী  আৰক্ষী পোহৰা চকীত এখন এজাহাৰ দাখিল কৰিছে । এজাহাৰত উল্লেখ কৰা অনুযায়ী ৫ বছৰমান পূৰ্বে ১ নং নাচনকুৰিৰ মাৰখত আলীলৈ বিয়া হোৱা মঞ্জুৱাৰা খাতুনক দীৰ্ঘদিনৰে পৰা স্বামী গৃহই ধন দাবী কৰাৰ লগতে শাৰীৰিক নিৰ্যাতন চলাই আহিছিল। তাৰোপৰি মঞ্জুৱাৰাক হত্যাৰ ভাবুকি প্ৰদান কৰি স্বামী গৃহই তেঁৱৰ পৰা ৪৫ হেজাৰ টকা আদায় কৰিছিল । আজি পুৱা ৰহস্যজনকভাৱে মাতৃ-কন্যাৰ মৃত্যুৰ বতৰা লাভ কৰাৰ পাছত হুছেন আলীসহ মঞ্জুৱাৰাৰ পিতৃগৃহৰ একাংশ লোক ঘটনাস্থলীত উপস্থিত হোৱাত ৰহস্যজনকভাৱে মাৰখত আলীৰ বাহিৰে স্বামী গৃহৰ  পৰিয়ালৰ আটাইবোৰ লোক পলাতক হৈ থকা বুলি অভিযোগ উত্থাপন হৈছে  । হুছেন আলীসহ মঞ্জুৱাৰাৰ পৰিয়ালৰ লোকে গেৰুকাবাৰীৰ আৰক্ষীক বিষয়টো অৱগত কৰাত আৰক্ষী ঘটনাস্থলীত উপস্থিত হৈ মৃতদেহ দুটা মৰণোত্তৰ পৰীক্ষাৰ বাবে জিলা সদৰ বঙাইগাঁওলৈ প্ৰেৰণ কৰাৰ লগতে মাৰখতৰ ৩ বছৰীয়া পুত্ৰ মুনতাজ আলীক স্বাস্থ্য পৰীক্ষাৰ বাবে হাস্পতাললৈ প্ৰেৰণ কৰে । গেৰুকাবাৰীৰ আৰক্ষীয়ে মাৰখত আলীক সোধা পোছাৰ বাবে গেৰুকাবাৰী আৰক্ষী পোহৰা চকীলৈ লৈ আহে । পাছত হুছেন আলীয়ে মাৰখত আলীসহ স্বামী গৃহৰ ৮ জন লোকৰ বিৰুদ্ধে পৰিকল্পিত হত্যাকাণ্ডৰ অভিযোগ তুলি গেৰুকাবাৰী আৰক্ষী পোহৰা চকীত এজাহাৰ দাখিল কৰাত আৰক্ষীয়ে মাৰখত আলীক গ্ৰেপ্তাৰ কৰি এক গোচৰ ৰুজু কৰে ৷🔯