👉বঙাইগাঁৱত অজাপৰ প্ৰাৰ্থীক ৰাইজৰ দলৰ পূৰ্ণ সমৰ্থন

👉বঙাইগাঁৱত অজাপৰ প্ৰাৰ্থীক ৰাইজৰ দলৰ পূৰ্ণ সমৰ্থন

👉কাইলৈ দাখিল কৰিব মনোনয়ন পত্ৰ  

বঙাইগাঁওঃ ১৭ মাৰ্চঃ 

📝নামনি অসমৰ অন্যতম গুৰুত্বপূৰ্ণ সমষ্টি ৩২ নং বঙাইগাঁও বিধান সভা সমষ্টিত এইবেলি জয়ী হোৱাৰ বাবে উঠি পৰি লাগিছে অসম জাতীয় পৰিষদৰ প্ৰাৰ্থী দীপু চৌধুৰীয়ে ৷ উল্লেখ্য যে সৌ সিদিনালৈকে ফণীভূষণ চৌধুৰীৰৰ সৈতে ঘনিষ্ঠ সম্পৰ্ক থকা তথা বঙাইগাঁও পৌৰসভাত বিগত দুটা কাৰ্যকাল পৌৰপতিৰ কাৰ্যভাৰ চলাই যোৱা দীপু চৌধুৰীক পূৰ্ণ সমৰ্থন জনাইছে ৰাইজৰ দলে ৷ আজি বৃহত্তৰ বঙাইগাঁও প্ৰেছ ক্লাবত ৰাইজৰ দল আৰু অসম জাতীয় পৰিষদৰ বঙাইগাঁও জিলা সমিতিয়ে আয়োজন কৰা এখন যৌথ সংবাদমেলত ৰাইজৰ দলে অজাপৰ প্ৰাৰ্থীগৰাকীক সমৰ্থন জনোৱাৰ কথা ঘোষণা কৰে ৷ সংবাদ মেলত ৰাইজৰ দলৰ সভাপতি দীপক দাসে কয় যে ৩২ নং বঙাইগাঁও বিধান সভা সমষ্টিত অসম জাতীয় পৰিষদ আৰু ৰাইজৰ দলে যৌথভাৱে মিলি নিৰ্বাচনী যুঁজত অৱতীৰ্ণ হোৱাৰ বাবে পূৰ্বৰে পৰা প্ৰস্তুতি চলাই আহিছিল ৷ সেয়ে অসম জাতীয় পৰিষদ আৰু ৰাইজৰ দলৰ উমৈহতীয়া প্ৰাৰ্থী দীপু চৌধুৰীক ৰাইজৰ দলৰ বঙাইগাঁও জিলা সমিতিয়ে পূৰ্ণ সমৰ্থ আগবঢ়াব ৷ ৰাইজৰ দলৰ সভাপতিগৰাকীয়ে আৰু কয় যে বঙাইগাঁৱৰ একাধিক সমস্যাৰ লগতে বঙাইগাঁও অসামৰিক চিকিৎসালয়ৰ পৰিকাঠামো উন্নত কৰাৰ যথেষ্ট সুযোগ আছিল যদিও এয়া কৰা নহ'ল ৷ ফলত সৰ্বসাধাৰণ ৰাইজে ব্যক্তিগত খণ্ডৰ  চিকিৎসালয়ৰ কাষ চাপিবলগীয়া হৈছে ৷ বঙাইগাঁৱত এখন চিকিৎসা মহাবিদ্যালয় হ'ব লাগিছিল ৷ কিন্তু নহ'ল ৷ সেইদৰে শৈক্ষিক দিশতো বঙাইগাঁৱত তেনে কোনো উচ্চ তথা উন্নত শিক্ষানুষ্ঠান গঢ়ি উঠা নাই ৷ আই টি আই এখন আছে যদিও ইয়াৰো জৰাজীৰ্ণ অৱস্থাই উপযুক্ত শৈক্ষিক পৰিবেশ বিনষ্ট কৰিছে ৷ এইবোৰ দিশত বিধায়কগৰাকীয়ে গুৰুত্ব দিব লাগিছিল যদিও নিদিলে ৷ সেয়ে বঙাইগাঁও সমষ্টিৰ পৰা দীপু চৌধুৰী জয়ী হলে শৈক্ষিক আৰু স্বাস্থ্যৰ দিশত যথেষ্ট গুৰুত্ব প্ৰদান কৰিব বুলি কয় ৷ লগতে দল দুটাৰ উমৈহতীয়া প্ৰাৰ্থীগৰাকী পৌৰ সভাৰ সভাপতি হৈ থকা সময়ত বহু কাম - কাজ কৰা বুলি কৈ বঙাইগাঁৱৰ ৰাইজে পৰিৱৰ্তন বিচাৰিছে আৰু সেই পৰিৱৰ্তনৰ বিকল্প দিব পাৰিছে বাবে প্ৰাৰ্থীগৰাকীক ভোট দিব বুলি আশা ব্যক্ত কৰে ৷

ইপিনে সংবাদ মেলত অসম জাতীয় পৰিষদৰ বঙাইগাঁও জিলা সমিতিৰ সভাপতি কুসুম্বৰ ৰায়ে কয় যে এই সমষ্টিৰ ৰাইজে পৰিৱৰ্তন বিচাৰিছে ৷ বিগত ৩৫ বছৰে সমষ্টিটোৰ পৰা বিধায়ক হৈ থকা ফণীভূষণ চৌধুৰী দুবাৰকৈ মন্ত্ৰী হিচাপেও কাৰ্যনিৰ্বাহ কৰিলে ৷ কিন্তু তেওঁৰ কাৰ্যকালত ৰাইজে কোনো নতুনত্ব পোৱা নাই ৷ মানুহৰ আবেগকলৈ তেওঁ ৰাজনীতি কৰি আহিছে ৷ সেয়ে এইবাৰ ৰাইজে পৰিৱৰ্তন বিচাৰিছে আৰু পৰিৱৰ্তনৰ স্বাৰ্থত সমষ্টিবাসী ৰাইজে অসম জাতীয় পৰিষদ আৰু ৰাইজৰ দলৰ উমৈহতীয়া প্ৰাৰ্থী দীপু চৌধুৰীক জাহাজৰ ছবিত ভোট দি জয়যুক্ত কৰিব ৷ সংবাদ মেলত সভাপতিগৰাকীয়ে দলৰ প্ৰাৰ্থী দীপু চৌধুৰীয়ে কাইলৈ মনোনয়ন পত্ৰ দাখিল কৰিব বুলি কৈ এই মনোনয়ন পত্ৰ দাখিলৰ কাৰ্যসূচীত বঙাইগাঁৱৰ পৰিৱৰ্তনকামী জনসাধাৰণক অংশগ্ৰহণ কৰাৰ বাবেও আহ্বান জনায় ৷ সংবাদমেলত ৰাইজৰ দলৰ বঙাইগাঁও জিলা সমিতিৰ কাৰ্যকৰী সভাপতি হিৰকজ্যোতি বৰ্মন , সম্পাদক নিলমণি কলিতা , সাংগঠনিক সম্পাদক ৰাজীৱ দাস , টাউন মণ্ডলৰ সভাপতি বাপন দাস , বঙাইগাঁও সমষ্টিৰ সভাপতি বিকাশ বৰ্মনৰ লগতে আৰু কেবাজনো নেতৃবৃন্দ উপস্থিত থাকে ৷🔯