👉বঙাইগাঁও মহাবিদ্যালয়ত নতুন ভোটাৰ ছাত্র-ছাত্রী সকলৰ মাজত সজাগতা সভা ‍

👉বঙাইগাঁও মহাবিদ্যালয়ত নতুন ভোটাৰ ছাত্র-ছাত্রী সকলৰ মাজত সজাগতা সভা ‍

বঙাইগাঁওঃ ১৫ মাৰ্চঃ 

📝সমাগত ৩২ নং বঙাইগাঁও বিধান সভা সমষ্টিৰ নিৰ্বাচনক কেন্দ্ৰ কৰি আজি বঙাইগাঁও মহাবিদ্যালয়ৰ সভা কক্ষত বঙাইগাঁও জিলা নিৰ্বাচন বিভাগৰ চুইপ চেল ( SVEEP CELL ) ৰ অধীনত মহাবিদ্যালয়খনৰ নতুন ভোটাৰ ছাত্র-ছাত্রী সকলৰ মাজত ভোটদান সন্দৰ্ভত এখন সজাগতামূলক সভা অনুষ্ঠিত হয় ৷ মহাবিদ্যালয়খনৰ ভাৰপ্ৰাপ্ত অধ্যক্ষ ডঃ ৰূপাঞ্জলী দেৱীয়ে সভাপতিত্ব কৰা সভাত উদ্দেশ্য ব্যাখ্যা কৰে  মহাবিদ্যালয়খনৰ প্ৰৱক্তা ডঃ বনজিৎ শৰ্মাই৷ এই সজাগতামূলক সভাত ছাত্র-ছাত্রীসকলৰ মাজত নিৰ্বাচন সম্পৰ্কীয় থিতাতে ভাষণ প্ৰতিযোগিতা ,মুকলি কুইজ প্ৰতিযোগিতা  অনুষ্ঠিত কৰি প্ৰশ্নৰ শুদ্ধ উত্তৰ দিয়োতাক  থিতাতে পুৰস্কাৰ প্ৰদান কৰা হয় ৷ ভাষণ প্ৰতিযোগিতাত সাত গৰাকী ছাত্র-ছাত্রীয়ে অংশ গ্ৰহণ কৰি তাৰে চাৰি গৰাকী ছাত্রী বিজয়ী হয় ৷ বিজয়ীসকলক পুৰস্কাৰ সমূহ পিছত এটা বিশেষ দিনত প্ৰদান কৰা হ'ব। 

কুইজ প্ৰতিযোগিতাৰ বাবে ছাত্র-ছাত্রীসকলক নিৰ্বাচন সম্পৰ্কীয় প্ৰশ্ন কৰে মহাবিদ্যালয়খনৰ প্ৰৱক্তা ডঃ বনজিৎ শৰ্মাই । এই সজাগতা সভাত উপস্থিত থাকি মহাবিদ্যালয়খনৰ অধ্যাপক ডঃ ভৱানী প্ৰসাদ শৰ্মাই দুই- এটা প্ৰশ্ন কৰি নতুন তথা যুৱ ভোটাৰ সকলে ভোট কিয় দিব লাগে আৰু ইলেক্ট্ৰনিক ভোটিং মেচিনৰ সহায়ত কেনেকৈ ভোট দিয়া হয়, সেয়া সুন্দৰকৈ ছাত্র-ছাত্রী সকলৰ মাজত ডাঙি ধৰে । এই সভাত মহাবিদ্যালয়খনৰ নতুন ভোটাৰ তথা ছাত্র-ছাত্রী সকলে সক্ৰিয়ভাবে অংশ গ্ৰহণ কৰে ৷ লগতে মহাবিদ্যালয়খনৰ কেইবাগৰাকীও অধ্যাপক উপস্থিত থাকে  । আনহাতে সভাত বঙাইগাঁও ৰাজহ চক্ৰ বিষয়া দীপন বৰ্মন উপস্থিত থাকি অহা ৬ এপ্ৰিলত অনুষ্ঠিত হ'বলগীয়া ভোটদানৰ সময়ত সকলো ভোটাৰে আগবাঢ়ি আহি নিজৰ ভোট প্ৰদানৰে নিজৰ অধিকাৰ সাব্যস্ত কৰিবলৈ সকলোকে আহ্বান জনায় । উল্লেখ্য যে ভাষণ প্ৰতিযোগিতাত চাবিনা ইয়াচমিন ( প্ৰথম), ধনমায়া চেত্ৰী (দ্বিতীয়), আৰু নৱনীয়া নাৰ্জাৰী আৰু প্ৰতিক্ষা উপাধ্যায়ে তৃতীয় স্থান লাভ কৰে ৷🔯