👉নিৰ্বাচনৰ বতৰঃ পদূলি মুখত ভিৰ নেতা- কৰ্মীৰ

👉নিৰ্বাচনৰ বতৰঃ পদূলি মুখত ভিৰ নেতা- কৰ্মীৰ 

👉মুখত ফুটিছে আখৈ ফুটা দি মাত- বোৱাইছে প্ৰতিশ্ৰুতিৰ বন্যা  

বঙাইগাঁওঃ ৩১ মাৰ্চঃ

📝এতিয়া নিৰ্বাচনৰ বতৰ ৷ সেয়ে ৰাজনৈতিক নেতাৰ মুখত ফুটিছে আখৈ ফুটা দি মাত ৷ নিমাতী কন্যা বুলি সততে ইতিকিং কৰাসকলৰো এইকেইদিন মুখত ফুটিছে মাত ৷ ডিঙিৰ সিৰ ফুলাই ফুলাই বিতৰ্কিত মন্তব্য আৰু কিছুমান ভুল তথ্যৰে নিৰ্বাচনী বতাহ গৰম কৰি দিছে ভাষণ ৷ প্ৰতিশ্ৰুতিৰ বন্যাত উটি ভাহি গৈছে সৰ্বসাধাৰণ ৰাইজ ৷ ঘৰে ঘৰে প্ৰৱেশ ঘটিছে নেতাৰ ৷ মুখত মিছিকিয়া হাঁহি, ডিঙিত গামোচা লৈ বিছাৰিছে বহু মূল্যবান ভোট ৷ বিগত পাঁচটা বছৰে এবাৰো খবৰ লোৱাৰ প্ৰয়োজনবোধ নকৰা লোকৰ পদূলি মুখতো ভিৰ কৰিছে তেঁওলোকে ৷ পৰিয়ালে প্ৰতি আগবঢ়াই দিয়া চাহ- বিস্কুট অথবা তামোলচালি মুখত ভৰাই বিদায় লৈছে ইঘৰৰ পৰা সিঘৰলৈ ৷ কাৰোবাৰ ঘৰত হয়তো দুখৰ কথা শুনি ঘৰিয়ালৰ চকুপানীও টুকুছে এইসকল নেতাই ৷ এয়াই বৰ্তমানৰ বাস্তৱ ছবি ৷ ৰাজ্যখনৰ আন সমষ্টিসমূহৰ লগতে বঙাইগাঁও বিধান সভা সমষ্টিতো এই দৃশ্য সুলভ হৈ পৰিছে ৷ ৰাইজক সেৱা কৰাৰ এই দৃশ্যখন দেখিবলৈ পোৱা যায় কেৱল মাত্ৰ নিৰ্বাচনৰ সময়তহে ৷ নিৰ্বাচনৰ সময়তহে ৰাজনৈতিক নেতাসকলৰ মনত পৰে ৰাইজৰ সমস্যাসমূহৰ কথা ৷ ৰাইজৰো বিড়ম্বনা এইয়ে যে নেতাই কেৱল ভাষণ দি যায় আৰু ৰাইজে শুনি যাবলগীয়া হয় ৷ কিন্তু ৰাইজৰ সমস্যা সমস্যা হৈয়ে ৰৈ যায় ৷ নিৰ্বাচনৰ সময়ত নেতাই ৰাইজৰ ওচৰ চাপিও কেৱল ভাষণ দিয়াৰ লগতে প্ৰতিশ্ৰুতি দিয়ে যদিও নিৰ্বাচনত জয়ী হোৱাৰ পিচত নেতাৰ ওচৰ চাপিবই নোৱাৰে ৰাইজে ৷ নিৰ্বাচনত বিজয়ী হৈও সভাই -সমতিয়ে আহি কেৱল ভাষণেই দিয়ে আৰু ৰাইজে শুনে ৷ ৰাইজৰ মুখৰ মাত মুখতেই থাকি যায় ৷ পাঁচ বছৰলৈ নেতাইও ৰাইজৰ সমস্যাবোৰলৈ পিঠি দি ৰাজভোগত ব্যস্ত হয় ৷ ৰাইজেও সমস্যাৰ সৈতে যুঁজ দি যায় কপালক ধিয়াই ৷ কিন্তু নেতাৰ মুখত সদায় ৰাইজক সেবা কৰাৰ বাবেই নিৰ্বাচনত অৱতীৰ্ণ হোৱা বুলি কোৱা শুনা যায় ৷ তৎস্বত্বেও সৰ্বসাধৰণ ৰাইজে নেতাৰ মিছা প্ৰতিশ্ৰুতিতে ভোল যায় ৷ চোৰ - ডকাইত , বিভিন্ন অপৰাধৰ ঘটনাৰ সৈতে জড়িত থকাজনেও নেতা হয় ৷ অথচ যোগ্যজন পৰি ৰয় ৷ 

এইদৰেই এইবাৰো নিৰ্বাচনী যুঁজত বহুজনে প্ৰতিদ্বন্দ্বিতা কৰিছে ৷ বিভিন্ন গোচৰ থকা ব্যক্তিয়েও  কৰিছে প্ৰতিদ্বন্দ্বিতা ৷ এয়াই ৰাজনীতি  ৷ ইপিনে নিৰ্বাচনত প্ৰতিদ্বন্দ্বিতা কৰাসকলে এইকেইদিন কেৱল যে গাঁও আৰু চহৰৰ পৰিয়ালসকলকে সাঙুৰি লৈছে এনে নহয় ৷ চহৰৰ ব্যৱসায়িক প্ৰতিষ্ঠান ,দোকান - পোহাৰতো সাংগ- পাংগ লৈ ভোট বিছাৰি ভীৰ কৰিছে ৷ ৰাজনৈতিক দলৰ প্ৰাৰ্থীসকলে বৃহৎ সভা - সমিতিৰ বিপৰীতে সমষ্টিটোৰ চুকে- কোনে নিৰ্বাচনী প্ৰচাৰৰ বাবে ৰাইজৰ ওচৰ চপা পৰিলক্ষিত হৈছে ৷ কিন্তু প্ৰলোভিত ৰাজনীতিৰ পৰা মুক্ত নহয় তেওঁলোক ৷ কাৰণ ধন নহলে নিৰ্বাচন খেলাতো পৰ্বতত কাছৰ কণী বিছাৰি যৱাৰ লেখিয়া কথা হৈ পৰিছে বৰ্তমান ৷ নিৰ্বাচন আয়োগে প্ৰাৰ্থী এজনৰ নিৰ্বাচনী ব্যয় ৩০.৮ লাখ টকা ধাৰ্য কৰি দিছে যদিও ৰাজনৈতিক দলৰ প্ৰাৰ্থীয়ে সেই নিৰ্দেশক সন্মান কৰিছে নে ? কৰিছে ,যি কেইগৰাকী ব্যক্তি কেৱল নাম বিছাৰিহে নিৰ্বাচনত অৱতীৰ্ণ হৈছে ৷ আগশাৰীৰ ৰাজনৈতিক দলৰ একোজন প্ৰাৰ্থীয়ে নিজৰ বিজয়ৰ বাবে কোটি কোটি টকা খৰচ কৰা বুলিও বিভিন্নজনে মন্তব্য কৰা শুনিবলৈ পোৱা যায় ৷ অৱশ্যে এইসকল নেতাই নিজৰ ঘৰ- মাটি বিক্ৰী কৰি টকা খৰচ নকৰে ৷কৰে বিভিন্ন উপায়েৰে উপাৰ্জন কৰা ধনহে ৷ বিজয়ী হৈ আহিলে উচুল কৰে ইয়াৰ দুগুণ পৰিমাণৰ ধন ৷ সোঁয়ে- বাঁৱে একাংশ  জনপ্ৰতিনিধি কেৱল ধন ঘটাতে ব্যস্ত হৈ পৰে ৷ পাঁচ বছৰৰ ভিতৰতে তেনে একাংশ জনপ্ৰতিনিধিৰ সম্পত্তিৰ পৰিমাণ অভাবনীয়ভাবে বৃদ্ধি পায় ৷ উৎস কিন্তু কোনো দিনে ৰাজহুৱা নকৰে ৷ আনকি মনোনয়ন পত্ৰ দাখিলৰ সময়তো ৰাজনৈতিক নেতাসকলে নিজৰ সম্পত্তিৰ সঠিত তথ্য নিদিয়ে বুলিয়ে অভিযোগ উত্থাপিত হৈ আহিছে ৷ ইপিনে জনপ্ৰতিনিধি হিচাপে নিৰ্বাচিত হোৱাৰ পিছত ৰাইজৰ সমস্যালৈ পিঠি দিয়াসকলৰ বাবে পৰৱৰ্তী নিৰ্বাচনৰ দিন চমু চাপি আহিলে দুচিন্তা বাঢ়ে ৷ যিমানে জনপ্ৰতিনিধিগৰাকীৰ ভেঁটি দুৰ্বল হৈ পৰে সিমানে বাঢ়ি যায় নিৰ্বাচনী ব্যয় ৷ সেয়ে নিৰ্বাচনৰ সময়ত নেতাৰ সৈতে উঠা- বহা কৰাৰ বাবে অভাব  নহয় লোকৰ ৷ নিৰ্বাচন অহা মানেই টকাৰ খেলত নামি পৰাৰহে প্ৰস্তুতি লোৱাৰ লেখিয়া কথা ৷ গতিকে নিৰ্বাচন আয়োগৰ কঠোৰ স্থিতিয়ে মুকলিকৈ ভোটাৰক ৰাজনৈতিক নেতাই ধন তথা অন্যান্য সামগ্ৰী বিতৰণ কৰাৰ ক্ষেত্ৰত বাধাৰ সৃষ্টি কৰিছে যদিও তৎস্বত্বেও বিভিন্ন অভিযোগ উত্থাপিত হৈ আহিছে ৷ সেইদৰে নিশাৰ খেলক বন্ধ কৰিব পৰা নাই ৷ প্ৰাৰ্থীয়ে নিজে ধন তথা সামগ্ৰী বিতৰণ নকৰি সহায় লৈছে আনৰ ৷ অশুভ পৰম্পৰা অব্যাহত আছে এইবাৰো ৷ ধন থকাজনকো যেনেকৈ আৰু ধন লাগে ,ঠিক সেইদৰে প্ৰতিজনে বিচাৰে ভোটদানৰ বিনিময় ৷ নিৰ্বাচন আহিলে সেয়ে বহুতোৰ মনত আনন্দ লাগে ৷ ধন বিচাৰি নেতাৰ কাষ চাপে ৷ নেতাইও নিৰাশ নকৰি কিবা এটা দি পঠায় ৷ যাতে ভোটটো পায় ৷ আনকি ৰাজনৈতিক দলৰ নিৰ্বাচনী সভাত ভাগ ল'বলৈ অহাসকলোকো লাগে ধন ৷ লাগে গাড়ী ৷ সেয়ে নিৰ্বাচনী ব্যয় কমক চাৰি দিনে দিনে বৃদ্ধিহে পাই আহিছে আৰু ৰাজনীতিত বাঢ়ি গৈছে বিত্তশালী লোকৰ সংখ্যা ৷ একেদৰে নিৰ্বাচনতো প্ৰাৰ্থীত্ব প্ৰদানৰ ক্ষেত্ৰত ৰাজনৈতিক দলসমূহে অগ্ৰাধিকাৰ দিছে বিত্তশালী ,বাহুবলী আৰু ক্ষমতাশালী লোককহে ৷ ফলত ৰাজনীতি এতিয়া হৈ পৰিছে ৰজাৰ নীতি ৷ ধন খৰচ কৰিব নোৱাৰাজনে দিছপুৰলৈ যোৱাৰ সপোন দেখাতো আহি পৰে বাধা ৷ অৱশ্যে নিকা ব্যক্তিত্বৰ প্ৰাৰ্থীৰ ক্ষেত্ৰত হৈ পৰে বিষয়টো কিছু পৃথক ৷ কিন্তু দুৰ্নীতিগ্ৰস্থই মেলি দিয়া ফান্দত সোমাই পৰা সৰ্বসাধাৰণ ভোটাৰ ৰাইজক উদ্ধাৰ কৰাটো অসম্ভৱ হৈ পৰাত ক্ষতিগ্ৰস্ত হৈছে গণতন্ত্ৰৰ প্ৰকৃত লক্ষ্য আৰু উদ্দেশ্য৷ ইয়াৰ উপায় এটাই আছে আৰু সেয়া হ'ল ৰাইজ সজাগ হ'ব লাগিব ৷ সজাগতাই ধ্বংস কৰিব দুৰ্নীতি - অনীতি আৰু প্ৰতিষ্ঠা হ'ব গণতন্ত্ৰৰ প্ৰকৃত ছবি ৷ গণতন্ত্ৰৰ ভেঁটি শক্তিশালী কৰিবলৈ ওলাই আহিব লাগিব সকলোৱে ৷🔯