👉বঙাইগাঁৱত কংগ্ৰেছৰ নিৰ্বাচনী সভাত ৰাজস্থানৰ মুখ্যমন্ত্ৰী অশোক গেহলট

👉বঙাইগাঁৱত কংগ্ৰেছৰ নিৰ্বাচনী সভাত ৰাজস্থানৰ মুখ্যমন্ত্ৰী অশোক গেহলট 

👉প্ৰয়াত প্ৰাক্তন মুখ্যমন্ত্ৰী তৰুণ গগৈক তেওঁ কৰা কামৰ কাৰণে আজিও অসমবাসীয়ে সোঁৱৰে

👉কংগ্ৰেছক ভোট দি পুনৰ চৰকাৰ গঠনৰ সুবিধা দিয়ক 

বঙাইগাঁওঃ ১ এপ্ৰিলঃ

📝কংগ্ৰেছ দলে শাসন কৰিব জানে, সুশাসন দিব জানে, সকলোকে একেলগে লৈ চলিব জানে আৰু শাসন কৰাৰ অনুভৱ আছে ৷   সেয়ে কংগ্ৰেছক পুনৰ এবাৰ চৰকাৰ গঠন কৰাৰ বাবে সুবিধা দিয়ক ৷ এই মন্তব্য ৰাজস্থানৰ মুখ্যমন্ত্ৰী অশোক গেহলটৰ ৷ আজি বঙাইগাঁৱত সমষ্টিটোৰ মহাজোঁটবন্ধন সমৰ্থিত কংগ্ৰেছ দলৰ প্ৰাৰ্থী শংকৰ প্ৰসাদ ৰায়ৰ হৈ নিৰ্বাচনী প্ৰচাৰ চলাবলৈ আহি এই মন্তব্য কৰে ৷ বিশেষকৈ বঙাইগাঁও চহৰৰ মাৰোৱাৰী সম্প্ৰদায়ৰ লগতে ব্যৱসায়ী শ্ৰেণী আৰু ৰাইজৰ উপস্থিতিত তেৰাপন্থ ভৱনত অনুষ্ঠিত নিৰ্বাচনী প্ৰচাৰ সভাত মুখ্যমন্ত্ৰীগৰাকীয়ে কয় যে দলটোৰ প্ৰয়াত প্ৰাক্তন মুখ্যমন্ত্ৰী তৰুণ গগৈক তেওঁ কৰা কামৰ কাৰণে আজিও অসমবাসীয়ে সোঁৱৰে ৷ পোন্ধৰ বছৰীয়া শাসন কালত তেওঁ বহু উল্লেখনীয় কাম কৰিছিল ৷ তেওঁ সদায় সকলোৰে উন্নয়ন হোৱাটো বিচাৰিছিল আৰু ৰাজ্যত শান্তিৰ পৰিৱেশ ঘুৰাই আনিছিল ৷ তাৰোপৰি তৰুণ গগৈৰ মৃত্যুৰ পিচত এয়া প্ৰথম নিৰ্বাচন ৷ সেয়ে একপ্ৰকাৰ তেওঁলৈ শ্ৰদ্ধাঞ্জলিও জনাব লাগে ৷ কাৰণ যিগৰাকী ব্যক্তিয়ে পোন্ধৰ বছৰে শাসন কৰিলে তেওঁৰ কাম- কাজলৈ চাই ৰাইজ আগবাঢ়ি আহি কংগ্ৰেছ দলক চৰকাৰ বনাবলৈ সহযোগিতা কৰিব লাগে ৷ আনহাতে বঙাইগাঁও বিধান সভা সমষ্টিটো ৩৫ বছৰ ধৰি অগপ দলৰ বিধায়ক ফণীভূষণ চৌধুৰীৰ দখলত থকাৰ পিচতো বিশেষ কোনো উন্নয়ন নোৱা সন্দৰ্ভত মুখ্যমন্ত্ৰী গেহলটে কয় যে ৩৫ টা বছৰ কম সময় নহয় ৷ মই নিজে প্ৰথমে পাঁচ বাৰ সাংসদ আৰু পাঁচ বাৰ বিধায়ক হৈছো ৷ মোৰ সমষ্টিত কি নাই ? সকলো আছে ৷ এইমচ ,আইআইটিকে ধৰি সকলো স্থাপন হৈছে ৷ কিন্তু বঙাইগাঁৱত উচ্চ শিক্ষানুষ্ঠান , মেডিকেল কলেজ আদি একো নাই ৷ সেয়ে কেনে মন্ত্ৰী - বিধায়কৰ কথা এবাৰ ভাবি চাব ৷ অসমত আমি শান্তি বিচাৰি ৷ কিন্তু অসমত 'কা' আদিৰ বিষয়লৈ পৰিৱেশ বিঘ্নিত কৰা হৈছে ৷  কংগ্ৰেছৰ চৰকাৰ যদি নাহেও নাই ,কিন্তু পিচতো আহিব ৷ কিন্তু যিসকলে চৰকাৰ চলাই আছে তেওঁলোকৰ লোকতন্ত্ৰৰ ওপৰত বিশ্বাস নাই ৷ ধৰ্মৰ নামত ৰাজনীতি কৰে , হিন্দু বাঙালীৰ কথা কৈ ৰাজনীতি কৰে ৷ কিন্তু  এনে ৰাজনীতি বেছিদিন নচলিব ৷ সকলোৱে সমিলমিলে থাকি আগবাঢ়িলেহে দেশ আগবাঢ়িব ৷ সেয়ে মুখ্যমন্ত্ৰীগৰাকীয়ে সমষ্টিটোৰ কংগ্ৰেছ দলৰ প্ৰাৰ্থী শংকৰ প্ৰসাদ ৰায়ক ভোট দি কংগ্ৰেছক চৰকাৰ গঠন কৰাৰ ক্ষেত্ৰত সকলোকে আহ্বান জনায় ৷

 মুখ্যমন্ত্ৰীগৰাকীয়ে প্ৰয়াত প্ৰধানমন্ত্ৰী ৰাজীৱ গান্ধীৰ দিনত স্বাক্ষৰিত অসম চুক্তিৰ বিষয়েও উল্লেখ কৰে ৷ সভাত বঙাইগাঁও বিধান সভা সমষ্টিৰ কংগ্ৰেছ দলৰ প্ৰাৰ্থী শংকৰ প্ৰসাদ ৰায়ে নিজৰ ভাষণত অহপ বিধায়ক ফণীভূষণ চৌধুৰীয়ে বিগত সময়ছোৱাত সমষ্টিটোৰ উন্নয়নৰ ক্ষেত্ৰত বিশেষ কোনো কাম নকৰা বুলি কৈ ৰাইজে তেওঁক নিৰ্বাচিত কৰি পঠালে সমষ্টিবাসীৰ উন্নয়নত গুৰুত্ব প্ৰদান কৰিব বুলি কয় ৷ শংকৰ প্ৰসাদ ৰায়ে শিক্ষা- স্বাস্থ্য - যাতায়াত আদি সকলো দিশতে সমষ্টিটো বহু পিছপৰি থকা বুলিও ভাষণ উল্লেখ কৰে ৷ সভাত কংগ্ৰেছ দলৰ প্ৰাক্তন বিধায়ক তথা নিখিল ভাৰত কংগ্ৰেছ কমিটিৰ সাধাৰণ সম্পাদক ৰাণা গোস্বামী , যুৱ কংগ্ৰেছৰ ৰাষ্ট্ৰীয় মুখপাত্ৰ জ্যোতিৰ্ময় বৈশ্য , প্ৰদেশ কংগ্ৰেছৰ সম্পাদক শ্যামল নাৰায়ণ দেৱৰে ধৰি জিলা কংগ্ৰেছৰ বিষয়ববীয়া ,চিপিআই ( এম) দলৰ নেতা আদি উপস্থিত থাকে ৷   ইপিনে সংবাদ মাধ্যমৰ আগত মুখ্যমন্ত্ৰীগৰাকীয়ে অসমত কংগ্ৰেছৰ স্থিতি ভাল বুলি কৈ কংগ্ৰেছে চৰকাৰ গঠন কৰিব বুলিও দাবী কৰে ৷ মুখ্যমন্ত্ৰীগৰাকীয়ে কয় যে প্ৰয়াত মুখ্যমন্ত্ৰী তৰুণ গগৈৰ নেতৃত্বত ৰাজ্যত কংগ্ৰেছে পোন্ধৰ বছৰ ধৰি শাসন কৰে ৷ কিন্তু কংগ্ৰেছ দলক কিছুমানে প্ৰৱঞ্চনা কৰিলে ? যাৰ বাবে পিচত চৰকাৰ সলনি হ'ল ৷ কোনে প্ৰৱঞ্চনা কৰিলে মুখ্যমন্ত্ৰীগৰাকীয়ে পোনপতিয়াকৈ উল্লেখ নকৰি কয় যে সেই কথা সকলোৱে জানে ৷ ইপিনে গৃহমন্ত্ৰী অমিত শ্বাহে কংগ্ৰেছ দলে আন্দোলন আৰু উগ্ৰবাদক উচতনি দিয়া বুলি উত্থাপন কৰা অভিযোগ সন্দৰ্ভত ৰাজস্থানৰ মুখ্যমন্ত্ৰীগৰাকীয়ে কয় যে দেশৰ গৃহমন্ত্ৰী এগৰাকীয়ে এনে কথা কোৱাতো শোভা নাপায় ৷ বিজেপিক ফেচিষ্ট চৰকাৰ আখ্যা দি কয় যে তেওঁ হয়তো নাজানে যে প্ৰধানমন্ত্ৰী ৰাজীৱ গান্ধীয়ে অসমৰ নিজৰ কংগ্ৰেছ দলৰ চৰকাৰখন ভংগ কৰি দি পুনৰ নিৰ্বাচন অনুষ্ঠিত কৰিছিল ৷ ইয়াৰ একমাত্ৰ কাৰণ আছিল যে আছুৰ নেতৃত্বত যি অসম আন্দোলন চলি আছিল তাৰ বাবে অসমবাসীৰ মনত যি ভাৱনাৰ সৃষ্টি হৈছিল আৰু যি অশান্ত পৰিৱেশ হৈছিল তাক শান্ত কৰা ৷ ইয়াৰ কাৰণে নিজ দলৰ চৰকাৰখনকে দেশৰ হিতৰ বাবে ত্যাগ কৰিছিল ৷ প্ৰধানমন্ত্ৰী ৰাজীৱ গান্ধীয়ে অসম চুক্তি স্বাক্ষৰিত কৰাত দেশৰ কিদৰে লাভ হৈছিল, প্ৰধানন্ত্ৰী ইন্দিৰা গান্ধীয়ে খালিস্থানী উগ্ৰপন্থীৰ কাৰ্যকলাপ সমাপ্ত কৰিবলৈ গৈ কিদৰে প্ৰাণ হেৰুৱাবলগীয়া হৈছিল এই ত্যাগ জানো কম আছিল ? সেয়ে গৃহমন্ত্ৰীগৰাকীয়ে নৱ প্ৰজন্মৰ আগত এনে কথা ক'ব নালাগিছিল ৷ তেওঁ নৱ প্ৰজন্মক বিপথে পৰিচালিত কৰিছে ৷ ন্যায় ব্যৱস্থা , ইনকামটেক্স, ই ডি ,চি বি আই ,নিৰ্বাচন আয়োগকে ধৰি সকলো সংস্থাকে ধ্বংস কৰাৰ বাবে লাগি পৰিছে ৷ বিজেপি আৰু আৰ এছ এছৰ এনে চিন্তা গণতন্ত্ৰৰ বাবে ভাবুকি ৷ 

আনহাতে কংগ্ৰেছক অসমৰ জনসাধাৰণে কিয় ভোট দিব বুলি সাংবাদিকে সোধাত মুখ্যমন্ত্ৰীগৰাকীয়ে কয় যে কংগ্ৰেছ দলে শাসন কৰিব জানে, সুশাসন দিব জানে, সকলোকে একেলগে লৈ চলিব জানে আৰু শাসন কৰাৰ অনুভৱ আছে ৷ সেয়ে যদি পুনৰ এবাৰ সুবিধা দিয়ে তেতিয়াহলে সমগ্ৰ দেশতে এক বাৰ্তা যাব৷ কাৰণ দেশত এতিয়া এনে এটা পৰ্যায় পাইছে যে মানুহে মোবাইলত কথাও পাতিব নোৱাৰে ৷ গতিকে আহিবলগীয়া দিনত কি পৰিস্থিতিৰ সৃষ্টি হয় সেয়া কল্পনা কৰক ৷ এইটো কেৱল এজন দুজনৰ কথা নহয় ৷ বৰং উদ্যোগপতি , বুদ্ধিজীৱি , সাহিত্যিক আদি সকলোৱে এই কথাটো জানে ৷ অখিল গগৈ জেলৰ ভিতৰত আছে ৷ কথা হ'ল চৰকাৰৰ বিৰুদ্ধে যদি কোনো ব্যক্তিয়ে সমালোচনা কৰে তিতিয়াহলে চৰকাৰে আদৰণি জনাব লাগে ৷ আমি আদৰণি জনাও ৷ কাৰণ এনে সমালোচনাক আমি গুৰুত্ব দিও ৷ বিৰোধীয়ে  উত্থাপন কৰা বিষয়সমূহ চালি জাৰি চাই কি দৰে সমাধান কৰিব পাৰি সেয়াহে লোকতন্ত্ৰৰ অধীন হোৱা উচিত ৷ কিন্তু যদি এওঁলোকৰ বিৰুদ্ধে কোনোবাই সমালোচনা কৰে  তেতিয়াহলে দেশদ্ৰোহী হয় ৷ গতিকে দেশৰ বাহিৰত পূৰ্বে ভাৰতৰ গণতান্ত্ৰিক ব্যৱস্থাৰ প্ৰতি যিটো সুনাম আছিল এতিয়া বিজেপিৰ শাসনকালত লাহে লাহে সেই সুনামৰ প্ৰতি প্ৰশ্নৰ উদয় হৈছে বুলিও কয় ৷ উল্লেখ্য যে ৰাজস্থানৰ মুখ্যমন্ত্ৰীগৰাকীয়ে গুৱাহাটীৰ পৰা হেলিকপ্টাৰযোগে বঙাইগাঁৱত উপস্থিত হয় আৰু সভাৰ পিছতে পুনৰ উভতি যায় ৷ 🔯