👉ধন, সুৰা আদিৰ অবৈধ সৰবৰাহত নজৰ ৰাখিবলৈ বঙাইগাঁৱত সক্ৰিয় হৈ উঠিছে ফ্লায়িং স্কোৰ্ৱাড আৰু ষ্টেটিক ছাৰ্ভিলেন্সৰ দল

👉বিধান সভা নিৰ্বাচন

👉ধন, সুৰা আদিৰ অবৈধ সৰবৰাহত নজৰ ৰাখিবলৈ বঙাইগাঁৱত সক্ৰিয় হৈ উঠিছে ফ্লায়িং স্কোৰ্ৱাড আৰু ষ্টেটিক ছাৰ্ভিলেন্সৰ দল 

বঙাইগাঁওঃ ৩ মাৰ্চঃ 

📝ভাৰতৰ নিৰ্বাচন আয়োগে বিধানসভা নিৰ্বাচনৰ দিন ঘোষণা কৰাৰ লগে লগে সমগ্ৰ ৰাজ্যখনৰ লগতে বঙাইগাঁও নিৰ্বাচনী জিলাৰ ৩২ নং বঙাইগাঁও বিধান সভা সমষ্টিটো ২৬ ফেব্ৰুৱাৰীৰ পৰা নিৰ্বাচনী  আচৰণবিধি বলবৎ হৈছে । সেয়ে নৈতিক ভোটগ্ৰহণৰ ধাৰণা সম্পূৰ্ণৰূপে প্ৰযোজ্য কৰি মুক্ত আৰু নিকা নিৰ্বাচন অনুষ্ঠিত কৰাৰ ক্ষেত্ৰত সকলো নাগৰিকক নিৰ্বাচনী নীতি- নিৰ্দেশনা মানি চলি বঙাইগাঁও জিলা প্ৰশাসনক সহযোগ কৰিবলৈ জিলা প্ৰশাসনে আহ্বান জনাইছে । ইতিমধ্যে ধন, সুৰা আদিৰ অবৈধ সৰবৰাহত নজৰ ৰাখিবলৈ ফ্লায়িং স্কোৰ্ৱাড আৰু ষ্টেটিক ছাৰ্ভিলেন্সৰ দল সক্ৰিয় হৈ উঠিছে । এই সময়চোৱাত যি কোনো ব্যক্তিয়ে উপযুক্ত নথি অবিহনে অধিক ধন লগত লৈ ফুৰিব নোৱাৰিব ৷ তাৰোপৰি বাহনত নিয়মীয়া তালাচী অব্যাহত থাকিব । তালাচীৰ সময়ত প্ৰাৰ্থী,তেওঁৰ এজেন্ট বা দলীয় কৰ্মী বা পোষ্টাৰ বা নিৰ্বাচনী প্ৰচাৰৰ সমগ্ৰী কঢ়িওৱা কোনো গাড়ীত ৫০ হেজাৰ টকাতকৈ অধিক নগদ ধন পালে বা ১০ হেজাৰ টকাতকৈ অধিক মূল্যৰ উপহাৰ সামগ্ৰী, কোনো ড্ৰাগছ,সুৰা, মাৰণাস্ত্র আদি পালে সেইবোৰ জব্দ কৰা হ'ব । ভাৰতীয় দণ্ডবিধিৰ ১৭১(খ)ধাৰাৰ অধীনত নিৰ্বাচনী প্ৰক্ৰিয়াত ধন বা আন সুবিধাৰে কোনো ব্যক্তিৰ নিৰ্বাচনী অধিকাৰক প্ৰভাৱিত কৰাৰ চেষ্টা কৰিলে দিওঁতা আৰু গ্ৰহণ কৰোঁতা  দুয়োজনেই এবছৰপৰ্যন্ত কাৰাবাস বা জৰিমনা বা দুয়োটা শাস্তিৰ সন্মূখীন হ'ব লাগিব ।

ইয়াৰোপৰি ভাৰতীয় দণ্ডবিধিৰ ১৭১(গ) ধাৰাৰ অধীনত কোনো ব্যক্তিয়ে কোনো প্ৰাৰ্থী বা ভোটাৰ অথবা অন্য লোকক ভাবুকি প্ৰদান কৰিলে, যিকোনো ধৰণে আঘাত কৰিলে এবছৰ পৰ্যন্ত কাৰাবাস বা জৰিমনা বা দুয়োটা শাস্তিৰ সন্মূখীন হ'ব লাগিব । উপঢৌকন দিয়া বা গ্ৰহণ কৰাৰ ঘটনা ধৰা পেলাই গোচৰ ৰুজু কৰাৰ বাবে আৰু ভোটাৰক ভয় দেখুওৱা বা ভাবুকি দিয়া সকলৰ বিৰুদ্ধে ব্যৱস্থা গ্ৰহণৰ বাবে ফ্লায়িং স্কোৰ্ৱাড গঠন কৰা হৈছে । সকলো নাগৰিকক উপঢৌকন লোৱাৰ পৰা বিৰত থাকিবলৈ অনুৰোধ জনোৱাৰ লগতে কোনো লোকে যদি উপঢৌকন যাঁচে বা উপঢৌকন  দিয়া বা ভয় ভাবুকি দিয়াৰ বিষয়ে অৱগত হয় তেনেহ'লে অভিযোগ গ্ৰহণৰ বাবে স্থাপন কৰা অভিযোগ নিৰীক্ষণ কক্ষৰ টোল ফ্ৰী নম্বৰ ১৯৫০ আৰু  দূৰভাষ নম্বৰ ০৩৬৬৪-২৩১১৭১ ত জনাবলৈ জিলা নিৰ্বাচনী বিষয়া তথা জিলা উপায়ুক্তই অনুৰোধ জনাইছে ৷ লগতে জিলা প্ৰশাসনে নিৰ্বাচন মুক্ত আৰু নিকা কৰাত সাধাৰণ ৰাইজৰ সহযোগিতা কামনা কৰিছে ৷ 🔯