👉বঙাইগাঁও সমষ্টিত ভোটাৰৰ মাজত সজাগতা বৃদ্ধিৰ বাবে একক স্থানত সৰ্বাধিক ৩২ হাজাৰ গছপুলি ৰোপণেৰে সৰ্বভাৰতীয় অভিলেখ স্থাপন

👉বঙাইগাঁও সমষ্টিত ভোটাৰৰ মাজত সজাগতা বৃদ্ধিৰ বাবে একক স্থানত সৰ্বাধিক ৩২ হাজাৰ গছপুলি ৰোপণেৰে সৰ্বভাৰতীয় অভিলেখ স্থাপন

বঙাইগাঁও ২ এপ্ৰিলঃ

📝আজি একক স্থানত সৰ্বাধিক সংখ্যক ৩২,০০০ (বত্ৰিছ হাজাৰ) গছপুলি ৰোপণেৰে ইণ্ডিয়া বুক অৱ ৰেকৰ্ডচত অভিলেখ গঢ়িবলৈ সক্ষম হ'ল বঙাইগাঁৱে ৷ উল্লেখ্য যে 'গণতান্ত্ৰিক সমৃদ্ধি' (Grow with Democracy) ক মূল বিষয়বস্তু হিচাপে লৈ ১,৫০০ তকৈ অধিক ভোটাৰে ভোটাৰ সকলৰ মাজত ভোটদানৰ প্ৰতি সজাগতা বৃদ্ধি আৰু জিলাখনৰ কাকৈজানা সংৰক্ষিত বনাঞ্চলত থকা বিলুপ্তপ্ৰায় প্ৰজাতি তথা বঙাইগাঁও বিধানসভা নিৰ্বাচনৰ শুভাংকৰ প্ৰতীক সোণালী বান্দৰৰ (গোল্ডী) খাদ্যৰ উপযোগী হোৱাকৈ এই গছপুলিসমূহ ৰোপণ কৰা হয়৷ বিধানসভা নিৰ্বাচনৰ প্ৰতি লক্ষ্য ৰাখি ভোটাৰৰ মাজত সচেতনতা বৃদ্ধিৰ বাবে আৰু পদ্ধতিগত ভোটাৰ শিক্ষা আৰু অংশগ্ৰহণ (SVEEP) কোষৰ অংশ হিচাপে ৩২ নং বঙাইগাঁও বিধানসভা সমষ্টিৰ জিলা নিৰ্বাচনী বিষয়া তথা জিলাখনৰ উপায়ুক্ত ডাঃএম.এছ.লক্ষ্মী প্ৰিয়া আৰু জিলা প্ৰশাসনৰ উদ্যোগত এই গছ পুলি ৰোপণ কাৰ্যসূচী গ্ৰহণৰ জৰিয়তে অভিলেখ গঢ়িবলৈ সক্ষম হোৱাত কেৱল বঙাইগাঁও বিধান সভা সমষ্টিয়ে নহয় বৰং সমগ্ৰ জিলাখনৰ বাবে এয়া এক সুখবৰ হিচাপে পৰিগণিত হৈছে ৷

পুৱা ১১ বজাত আৰম্ভ হোৱা গছপুলি ৰোপণ কাৰ্যসূচীৰ জৰিয়তে মুঠ ৩২,০০০ গছপুলি ৩২ মিনিটত ৰোপণৰ লক্ষ্য বান্ধি লোৱা হয় যদিও সেয়া ২৯ মিনিটতে সম্পন্ন কৰা হয় ৷ কাকৈজানা সংৰক্ষিত বনাঞ্চলৰ ৰাভাপাৰা ভাওৰিয়াকাটা পাহাৰত  এই গছ পুলিসমূহ ৰোপণ কৰি অভিলেখ স্থাপন কৰা হয় ৷ উল্লেখ্য যে এই সমগ্ৰ প্ৰক্ৰিয়া পৰ্যৱেক্ষণ কৰাৰ বাবে ইণ্ডিয়া বুক অৱ ৰেকৰ্ডচৰ জীতেন্দ্ৰ  কুমাৰ জৈন উপস্থিত থাকি ভোটাৰৰ মাজত সজাগতা বৃদ্ধিৰ উদ্দেশ্যে একক স্থানত সৰ্বাধিক গছপুলি ৰোপণৰে সৰ্বভাৰতীয় অভিলেখ স্থাপন হোৱা বুলি আনুষ্ঠানিকভাবে ঘোষণা কৰাৰ লগতে জিলা উপায়ুক্তৰ হাতত প্ৰমাণ পত্ৰ আদি প্ৰদান কৰে ৷ গছ পুলিসমূহ ৩২ নং বঙাইগাঁও বিধান সভা সমষ্টিৰ নিৰ্বাচনৰ শুভাংকৰ প্ৰতীক তথা বাৰ্তাবাহক সোনালী বান্দৰ ( গোল্ডী) ৰ খাদ্যৰ উৎস হিচাপে আমলখী, বহেৰা , জাম, গমাৰি, কৰৈ, শিলিখা, ভাতঘিলা, খাচীয়াবাদাম, পোমা, মধুৰিআম, লেটেকু, কঠাঁল , অৰ্জুন , ইউৰিয়াম , আজাৰ , বকুল, দেৱদাৰু , আশোক , ম'জ, অমৰা , কৰছ, কাঞ্চন , জলফাই , তেতেলী , পনিয়াল, ছটিয়না , চজিনা আদি যিবোৰ গছপুলি সোনালী বান্দৰৰ প্ৰাকৃতিক আবাসস্থল হিচাপে পৰিচিত কাকৈজানা সংৰক্ষিত বনাঞ্চলত ৰোপণ কৰা হয় । 

এই অনুষ্ঠানত স্থানীয় প্ৰজাতিৰ গছপুলি সমূহ মিয়াওয়াকি পদ্ধতিৰ দ্বাৰা ৰোপণ কৰা হয় । গছপুলি সমূহৰ মাজত সঠিক দূৰত্ব বৰ্তাই ৰাখিবলৈ মাটিৰ বন আতঁৰাই পৰিস্কাৰ কৰি মাটিৰ ঢিপ আদি তৈয়াৰ আগতীয়াকৈ কৰি লোৱা হয় ৷ এই অনুষ্ঠানত SVEEP ৰ ৰাজ্যিক আইকণ তথা অভিনেতা কপিল বৰা , কণ্ঠশিল্পী অনিন্দিতা পাল আৰু পেৰা চাইক্লিষ্ট ৰাকেশ বণিক আদিও উপস্থিত থাকি সকলোকে উৎসাহ উদ্দীপনাৰে অহা ৬ এপ্ৰিলত অনুষ্ঠিত হ'বলগীয়া তৃতীয় পৰ্যায়ৰ নিৰ্বাচনত ভোটদান কৰিবলৈ সকলোকে আহবান জনায় । ইণ্ডিয়া বুক অৱ ৰেকৰ্ড কতৃপক্ষৰ তৰফৰ পৰা উপস্থিত থকা জীতেন্দ্ৰ কুমাৰ জৈনে কয় যে এয়া ৩২ নং বঙাইগাঁও বিধান সভা সমষ্টিত জিলা নিৰ্বাচনী বিষয়াই  যি পদক্ষেপ গ্ৰহণ কৰা হ'ল সেয়া বহু ভাল পদক্ষেপ ৷ গছপুলি ৰোপণ কৰাৰ পিচত যিদৰে বাঢ়ি যাব ,ঠিক সেইদৰে আমাৰ গণতন্ত্ৰৰো সমৃদ্ধি হ'ব ৷ এনে পদক্ষেপক আমি সদায় উৎসাহিত কৰো ৷ কেৱল বঙাইগাঁও বা ভাৰততে নহয় সমগ্ৰ পৃথিৱীতে গছ পুলি ৰোপণ কৰি থাকিব লাগে ৷ তেতিয়া মানুহে নিৰ্মল বতাহ পাব , স্বাস্থ্যৰ উন্নতি হ'ব ৷ আনহাতে অভিনেতা কপিল বৰাই কয় যে প্ৰতিটো সংগঠন ,প্ৰতিখন জিলাই এনে পদক্ষেপ গ্ৰহণ কৰা উচিত ৷ সেইদৰে জন্মদিন আদিতো গছ পুলি ৰোপণ কৰিব লাগে ৷ এই উদং পাহাৰখনত যেতিয়া গছসমূহ বাঢ়ি সেউজীয়া হৈ উঠিত তেতিয়া কিমান ভাললগা হ'ব ৷ এই পৃথিৱীত মানৱ জাতি যদি জীয়াই থাকিব লাগে তেতিয়াহলে আমাক গছ লাগিব ৷ পৃথিৱীখন সেউজীয়া হ'ব লাগিব ৷ সেইদৰে কণ্ঠশিল্পী অনিন্দিতা পালে কয় যে পৃথিৱীত গছ আছে কাৰণে আমি জীয়াই আছো ৷ যিমানে গছ কমি যাব সিমানে আমাৰ প্ৰাণী জীৱন কমি যাব ৷ উল্লেখ্য যে অনিন্দিতা পালে ভোটাৰক সজাগ কৰাৰ বাবে নিৰ্বাচ বিভাগৰ হৈ গোৱা 'এয়া যে নিৰ্বাচনৰ সময়' শীৰ্ষক গীতটিও পৰিৱেশন কৰে ৷ উল্লেখ্য পূৰ্বে ৩২ মিনিটতত ২৮ হাজাৰ গছ পুলি ৰোপণৰ অভিলেখ আছিল ,যদিও সেই অভিলেখ ভংগ কৰে বঙাইগাঁৱে ৷ গছ পুলি ৰোপণ কাৰ্যসূচীত জিলা প্ৰশাসনৰ বিষয়াসকলৰ লগতে বিভিন্ন চৰকাৰী বিভাগৰ বিষয়া - কৰ্মচাৰী আদিও উপস্থিত থাকে ৷🔯