👉ফণীভূষণ চৌধুৰীয়ে সমষ্টিটোৰ কোচ ৰাজবংশী ৰাইজক প্ৰলোভনেৰে বিপথে পৰিচালনা কৰি আহিছে - আক্ৰাছু

👉ফণীভূষণ চৌধুৰীয়ে সমষ্টিটোৰ কোচ ৰাজবংশী ৰাইজক প্ৰলোভনেৰে বিপথে পৰিচালনা কৰি আহিছে - আক্ৰাছু 

👉বিকল্প ৰাজনৈতিক নেতাৰ পক্ষত অৱস্থান কৰি ভোটাৰ ৰাইজক ভোট দিবলৈ আহ্বান

বঙাইগাঁওঃ ৩ এপ্ৰিলঃ  

📝নিজকে কোচ ৰাজবংশীৰ জনপ্ৰতিনিধি বুলি প্ৰচাৰ চলোৱা বঙাইগাঁও বিধান সভা  সমষ্টিৰ বিজেপি- অগপ মিত্ৰজোঁটৰ প্ৰাৰ্থী ফণীভূষণ চৌধুৰীয়ে সমষ্টিটোৰ কোচ ৰাজবংশী ৰাইজক প্ৰলোভনেৰে বিপথে পৰিচালনা কৰি আহিছে ৷ গতিকে অহা ছয় এপ্ৰিলত বঙাইগাঁওবাসী ৰাইজক এইজন কুটিল ৰাজনীতিকৰ পৰা বঙাইগাঁও সমষ্টিটোৰ লগতে কোচ ৰাজবংশী সমাজ জীৱনক উদ্ধাৰ কৰাৰ স্বাৰ্থত বিকল্প ৰাজনৈতিক নেতাৰ পক্ষত অৱস্থান কৰি ভোটাৰ ৰাইজক ভোট দিবলৈ সদৌ বঙাইগাঁও জিলা আক্ৰাছুই আহ্বান জনাইছে ৷ এক প্ৰেছ বিবৃতিত সংগঠনটোৰ জিলা সভাপতি দিব্যজ্যোতি পাঠক আৰু সাধাৰণ সম্পাদক বিকাশ বৰ্মনে কয় যে বঙাইগাঁও সমষ্টিত এইগৰাকী ৰাজনৈতিক নেতাই বিগত ৩৫ টা বছৰে কোচ ৰাজবংশী ৰাইজক আবেগিক কৰি সমৰ্থন আদায় কৰি জন প্ৰতিনিধি হিচাপে নিৰ্বাচিত হৈ আহিছে ৷ কুটিল মস্তিষ্কৰ এইগৰাকী ৰাজনীতিকে বিগত ৩৫ টা বছৰে জাতিটোক প্ৰৱঞ্চনা কৰিলে ৷ তেওঁৰ ৩৫ বছৰীয়া কাৰ্যকালৰ এটা দিনো বিধান সভাৰ মজিয়াত কোচ ৰাজবংশী সকলৰ জনজাতিকৰণৰ প্ৰসংগ উল্লেখ নকৰিলে ৷ আনকি কোনো এটা দিনতো তেওঁ জনজাতিকৰণৰ সপক্ষে মাত নামাতিলে ৷ নিৰ্বাচনৰ পূৰ্বে তেওঁ কমতাপুৰ স্বায়ত্তশাসিত পৰিষদখন গঠনৰ দায়িত্ব লাভ কৰাৰ পিছতো পৰিষদীয় এলেকাৰ ব্যক্তিৰে পৰিষদখন গঠন কৰিব নোৱাৰিলে ৷ এই পৰিষদখন গঠন কৰাৰ বাবে বি টি আৰ এলেকাৰ বাসিন্দাক আমদানি কৰি আনিলে ৷ বি টি আৰৰ বাসিন্দাক কে এ চি ত ৰাজনৈতিক সংস্থাপন দিয়াৰ আঁৰত ফণীভূষণ চৌধুৰীৰ ৰাজনৈতিক স্বাৰ্থনিহিত আছে ৷ কাৰণ তেওঁ ইয়াৰ জৰিয়তে বঙাইগাঁৱত তেওঁৰ কোনো বিকল্প ৰাজনৈতিক নেতাৰ উত্থান হোৱাটো বিচৰা নাই ৷ বঙাইগাঁৱত তেৱেঁই একমাত্ৰ ৰাজনৈতিক নেতা হিচাপে বৰ্তি থকাৰ বাবেই কে এ চিত বি টি আৰৰ বাসিন্দাক বঙাইগাঁৱৰ বাসিন্দা দেখুৱাই পৰিষদখন গঠন কৰিলে ৷ এইদৰেই তেওঁ ৩৫ টা বছৰে বঙাইগাঁৱত কুটিল ৰাজনীতি কৰি আহিছে ৷ গতিকে অহা ছয় এপ্ৰিলত বঙাইগাঁওবাসী ৰাইজক এইজন কুটিল ৰাজনীতিকৰ পৰা বঙাইগাঁও সমষ্টিটোৰ লগতে কোচ ৰাজবংশী সমাজ জীৱনক উদ্ধাৰ কৰাৰ স্বাৰ্থত বিকল্প ৰাজনৈতিক নেতাৰ পক্ষত অৱস্থান কৰাৰ বাবে ভোটাৰ ৰাইজক ভোট দিবলৈ আহ্বান জনায় ৷ বিবৃতিটোত জিলা সমিতিৰ নেতাদ্বয়ে লগতে কয় যে অহা ছয় এপ্ৰিলত ৰাজ্যখনৰ আন বহুকেইটা বিধান সভা সমষ্টিৰ লগতে বঙাইগাঁও জিলাৰ তিনিটা সমষ্টি ক্ৰমে ৩২ নং বঙাইগাঁও ,৩৪ নং উত্তৰ অভয়াপুৰী আৰু ৩৫ দক্ষিণ অভয়াপুৰী বিধান সভা সমষ্টিতো নিৰ্বাচন অনুষ্ঠিত হ'ব ৷ এই নিৰ্বাচনত জিলাখনৰ তিনিওটা বিধান সভা সমষ্টিতে বিভিন্ন ৰাজনৈতিক দলৰ মনোনীত প্ৰাৰ্থীয়ে প্ৰতিদ্বন্দ্বিতা কৰিছে ৷ সেইদৰে বহুকেইজনে নিৰ্দলীয় হিচাপেও প্ৰতিদ্বন্দ্বিতা কৰাটো দৃষ্টিগোচৰ হৈছে ৷ ২০২১ চনৰ সাধাৰণ নিৰ্বাচনত প্ৰতিদ্বন্দ্বিতা কৰা প্ৰাৰ্থীসকলে ইতিমধ্যে নিৰ্বাচনী প্ৰচাৰ অভিযান অব্যাহত ৰাখিছে ৷ এই প্ৰচাৰ অভিযানত বিভিন্নজন প্ৰাৰ্থীয়ে কোচ ৰাজবংশী সমাজৰ দীৰ্ঘদিনীয়া জনজাতিকৰণৰ দাবী ,কমতাপুৰ স্বায়ত্তশাসিত পৰিষদ আৰু কোচ ৰাজবংশী সমাজৰ বিভিন্ন জলন্ত সমস্যাৰাজিক লৈ সাধাৰণ ভোটাৰ ৰাইজৰ মন বিভ্ৰান্ত কৰাৰ বাবে উঠি পৰি লাগিছে ৷ আমি এইক্ষেত্ৰত সকলো পক্ষৰে দৃষ্টি আকৰ্ষণ কৰি ক'ব বিচাৰিছো যে কোচ ৰাজবংশীসকলক লৈ আপোনালোকে দশক দশক ধৰি বহু ৰাজনীতি কৰিলে ৷ আপোনালোকৰ প্ৰৱঞ্চনাৰ ৰাজনীতি আমি ইমান দিনে বুজিলো আৰু শিকিলো ৷ এতিয়া আপোনালোকে আমাক ৰাজনীতি - সমাজনীতিৰ আদিপাঠ শিকোৱাৰ প্ৰয়োজন অনুভৱ কৰা নাই ৷ কোচ ৰাজবংশী সমাজৰ নতুন প্ৰজন্ম ৰাজনৈতিক আৰু সামাজিকভাৱে অধিক সজাগ আৰু সচেতন ৷ কোচ ৰাজবংশী সমাজে ৰাজনৈতিক দল, নেতা আৰু সুবিধাবাদীস্থিতি গ্ৰহণ কৰা সুবিধাবাদীৰ ৰাজনীতিক অন্তৰৰ পৰাই ঘৃণা কৰে ৷ ৰাজনীতিৰ নামত সমাজক টুকুৰা টুকুৰ কৰা আৰু বিষবাস্প বিয়পোৱা ৰাজনীতিক কোচ ৰাজবংশী সমাজে প্ৰশ্ৰয় নিদিয়ে ৷ এই সমাজক প্ৰতিনিধিত্ব কৰা জাতীয় সংগঠন হিচপে এই ৰাজনৈতিক প্ৰেক্ষাপটত আমাৰো নিশ্চয় দায়িত্ব আছো ৷ গতিকে সেই দিশৰ প্ৰতি লক্ষ্য ৰাখি অহা ছয় এপ্ৰিলত অনুষ্ঠিত হ'বলগীয়া তৃতীয় পৰ্যায়ৰ নিৰ্বাচনত বঙাইগাঁও জিলাৰ তিনিওটা বিধান সভা সমষ্টিত নিশ্চয় আমাৰ ভূমিকা থাকিব ৷🔯