👉বঙাইগাঁও জিলাৰ মাণিকপুৰত আৰক্ষীৰ অভিযান

👉বঙাইগাঁও জিলাৰ মাণিকপুৰত আৰক্ষীৰ অভিযান

👉আলফা নেতা দ্বীপেন সাউদ নিহত

👉উদ্ধাৰ দুটা পিষ্টল, গ্ৰেণেড, গুলী আদি 

বঙাইগাঁওঃ ২৯ এপ্ৰিলঃ 

📝ৰাজ্যখনত শেহতীয়াভাৱে বিভিন্ন তৈল প্ৰতিষ্ঠানৰ কৰ্মচাৰীৰ অপহৰণৰ ঘটনাৰ সৈতে আলফা( স্বাধীন) জড়িত হৈ পৰাত এতিয়া সংগঠনটো পুনৰ চৰ্চাৰলৈ অহাৰ সময়তে আজি পুৱা বঙাইগাঁও জিলাৰ বেছিমাৰীত সংগঠনটোৰ এজনৰ শীৰ্ষ পৰ্যায়ৰ নেতা আৰক্ষীৰে সৈতে হোৱা গুলীয়াগুলিত নিহত হয় ৷ নিহত আলফা নেতাজনক দ্বীপেন সাউদ ওৰফে জিষ্ণু অসম ওৰফে ৰমেন নাথ বুলি চিনাক্ত কৰা হয় ৷ নিহত আলফা নেতাজনক কিছুদিন পূৰ্বে সংগঠনটোৰ পশ্চিম মণ্ডলৰ কমাণ্ডাৰ দৃষ্টি ৰাজখোৱাৰ স্থানত নিযুক্তি দিয়া হৈছিল ৷ আলফা নেতাজনৰ মৃত্যু সংগঠনটোৰ বাবে এক মোক্ষম আঘাত হিচাপে পৰিগণিত হৈছে ৷ আনহাতে আলফা নেতাজনৰ লগত থকা দেহৰক্ষী পদুম ৰায়ক আৰক্ষীয়ে কৰায়ত্ত কৰে ৷ অভিযান সন্দৰ্ভত জানিব পৰা মতে বঙাইগাঁও জিলাৰ মাণিকপুৰ আৰক্ষী থানাৰ অন্তৰ্গত বেছিমাৰী চাৰিআলি চ'কৰ কাষতে থকা কিশোৰ ৰায় নামৰ ব্যক্তি এগৰাকীৰ ঘৰত আলফা (স্বাধীন)ৰ দুজনীয়া এটি দলে নিশা বাহৰ পাতি থকা বুলি গোপন সূত্ৰে খবৰ লাভ কৰি বঙাইগাঁও জিলা আৰক্ষী আৰু বেটেলিয়নৰ দলে এক অভিযান চলায়। অভিযানকালত আলফাৰ দলটোক আৰক্ষীয়ে ঘৰৰ বাহিৰলৈ ওলাই আহি  আত্মসমৰ্পন কৰিবলৈ আহ্বান জনায় যদিও আৰক্ষীলৈ বুলি আলফাৰ দলটোৱে প্ৰথমে গুলী চালনা কৰাত আৰক্ষীয়েও প্ৰত্যুত্তৰত গুলীচালনা কৰে। পিছত অভিযানকাৰী দলটোৱে ঘৰৰ ভিতৰত গুলীবিদ্ধ অৱস্থাত আলফা নেতা দ্বীপেন সাউদক উদ্ধাৰ কৰি বঙাইগাঁও অসামৰিক চিকিৎসালয়লৈ প্ৰেৰণ কৰে যদিও ইতিমধ্যে সদস্যজনৰ মৃত্যু হৈছিল ৷ 

আনহাতে আলফা নেতাজনৰ দেহৰক্ষী পদুম ৰায়ক আৰক্ষীয়ে কৰায়ত্ত কৰে ৷ দেহৰক্ষীজনে আৰক্ষীৰ ওচৰত আত্মসমৰ্পন কৰে বুলি জানিব পৰা গৈছে ৷ ঘটনাটো পুৱা ৫ মান বজাত সংঘটিত হয় বুলি জিলা আৰক্ষী অধীক্ষক সুবোধ কুমাৰ সোণোৱালে সংবাদ মাধ্যমৰ আগত প্ৰকাশ কৰে ৷ উল্লেখ্য যে নিহত আলফা নেতা দ্বীপেন সাউদৰ ঘৰ বৰপেটা জিলাৰ সৰভোগ আৰক্ষী থানাৰ অন্তৰ্গত দুৰামাৰী সাউদপাৰাত আৰু আলফা সদস্য পদুম ৰায়ৰ ঘৰ বাক্সা জিলাৰ তামুলপুৰত । আৰক্ষীয়ে ঘটনাস্থলীৰ পৰা দুটা পিষ্টল, এটা গ্ৰেনেড,কেইবা জাই গুলী, ২১ টা মোৱাইলৰ লগতে বহু কেইখন ছিম কাৰ্ড, টৰ্চলাইট, নগদ ধন আদি উদ্ধাৰ কৰে। আৰক্ষীয়ে  ধৃত পদুম ৰায়ৰ লগতে আলফা সদস্যই বাহৰ পাতি থকা ঘৰটোৰ গৰাকী কিশোৰ ৰায়ক আটক কৰি বিতং তথ্যৰ বাবে মাণিকপুৰ আৰক্ষী থানাত জেৰা অব্যাহত ৰাখিছে। আনহাতে আলফাৰ দলটোৱে বিভিন্নজনৰ পৰা ধন সংগ্ৰহৰ কৰাৰ উদ্দেশ্যৰে অঞ্চলটোত বাহৰ পাতি থকা বুলি সন্দেহ প্ৰকাশ কৰে ডি আই জি দিলীপ কুমাৰ দেই । উল্লেখ্য যে আলফা নেতাজন আৰক্ষীৰ গুলীত নিহত হ'ল নে আৰক্ষীৰ হাতত ধৰা দিয়াৰ সলনি নিজে আত্মহত্যা কৰিলে সেয়া ৰহস্যজনক  ৷ নিহত দ্বীপেন সাউদে নব্বৈ দশকতে আলফাত যোগদান কৰিছিল ৷ ইপিনে নিহত আলফা নেতাজনৰ মৃতদেহ মৰণোত্তৰ পৰীক্ষা সম্পন্ন হোৱাৰ পিছত আৰক্ষীয়ে মৃতদেহটো পৰিয়ালৰ লোকক চমজাই দিয়ে ৷