👉ভোটগ্ৰহণৰ বাবে সাজু বঙাইগাঁও জিলা প্ৰশাসন

👉ভোটগ্ৰহণৰ বাবে সাজু বঙাইগাঁও জিলা প্ৰশাসন

👉ইভিএমসহ যাৱতীয় সামগ্ৰীলৈ ভোটগ্ৰহণ কেন্দ্ৰলৈ ৰাওনা প'লিং- প্ৰিজাইডিং বিষয়াৰ দল  

👉মহিলাৰ দ্বাৰা পৰিচালিত হ'ব ২৪ টা ভোটগ্ৰহণ কেন্দ্ৰ 

বঙাইগাঁওঃ ৫ এপ্ৰিলঃ 

📝অসম বিধান সভা নিৰ্বাচনৰ কাইলৈ অনুষ্ঠিত হ'বলগীয়া  তৃতীয় পৰ্যায়ৰ নিৰ্বাচনৰ ভোটগ্ৰহণৰ বাবে বঙাইগাঁও জিলা প্ৰশাসন সাঁজু হৈ উঠিছে ৷ বঙাইগাঁও জিলা প্ৰশাসনে ৩২ নং বঙাইগাঁও বিধান সভা সমষ্টিত সুচাৰুৰূপে তথা শান্তি- শৃংখলা বৰ্তাই ৰাখি নিৰ্বাচন অনুষ্ঠিত কৰাৰ বাবে সকলো ব্যৱস্থা গ্ৰহণ কৰিছে ৷ ইতিমধ্যে ভোটগ্ৰহণৰ বাবে সমষ্টিটোৰ ভোট কেন্দ্ৰসমূহলৈ পুৱাৰে পৰা যাৱতীয় সা- সামগ্ৰীলৈ ভোটগ্ৰহণকাৰী দল ৰাওনা হৈছে ৷ সমষ্টিটোৰ নিৰ্বাচনী কাম-কাজ পৰিচালনা তথা নিৰ্বাচনী সা- সামগ্ৰীসমূহ বিতৰণৰ কাৰণে বঙাইগাঁও মহাবিদ্যালয়ত স্থাপন কৰা অস্থায়ী কাৰ্যালয়ৰ পৰা পুৱা ৭ বজাৰ পৰা ভোটগ্ৰহন কেন্দ্ৰত ব্যৱহাৰ হ'বলগীয়া ইলেক্ট্ৰনিক ভোটিং মেচিন, ভিভিপেটৰ লগতে বিভিন্ন সা-সামগ্ৰী সমূহ প'লিং , প্ৰিজাইডিং বিষয়া সকলৰ মাজত বিতৰণ কৰা হয় । ইয়াৰ বাবে ১৭ টা কাউন্টাৰ মুকলি কৰা হয় । ভোটগ্ৰহণকাৰী দলে সকলো সামগ্ৰী বুজি মেলি লৈ ৰাওনা হয় ভোট কেন্দ্ৰসমূহলৈ ৷ 

উল্লেখ্য যে এইবাৰ ক'ভিড- ১৯ ৰ বাবে ভোটাৰ সকলে মাস্ক আৰু হেণ্ড গ্লোপচ পৰিধান কৰিহে ভোটদান কৰিব লাগিব ৷ যাৰ বাবে ভোটগ্ৰহণ কেন্দ্ৰসমূহত জিলা প্ৰশাসনৰ পৰা মাস্ক, গ্লোপচ , চেনিটাইজাৰো যোগান ধৰা হৈছে ৷ সমষ্টিটোত এইবাৰ মুঠ ভোটগ্ৰহণ কেন্দ্ৰ ২৬০ টা । ইয়াৰ ভিতৰত ২৪ টা ভোটগ্ৰহণ কেন্দ্ৰ মহিলাৰ দ্বাৰা পৰিচালিত হ'ব ৷ তাৰে মাজত এটা আদৰ্শ ভোটগ্ৰহণ কেন্দ্ৰ হিচাপে চিহ্নিত কৰা হৈছে । এই আদৰ্শ ভোটগ্ৰহণ কেন্দ্ৰটো বঙাইগাঁও বীৰঝৰা উচ্চতৰ মাধ্যমিক বিদ্যালয়ত স্থাপন কৰা হৈছে । সমষ্টিটোত এইবাৰ মুঠ ভোটাৰৰ সংখ্যা হ'ল  ১,৭৫,৩২৯ গৰাকী । ইয়াৰে ৮৬,৯৭৬ গৰাকী পুৰুষ ভোটাৰ আৰু ৮৮,৩৫৩ গৰাকী মহিলা ভোটাৰ আছে ৷ সমষ্টিটোত এইবাৰ পুৰুষ ভোটাৰৰ তুলনাত মহিলা ভোটাৰৰ সংখ্যা ১,৩৭৭ গৰাকী অধিক ৷ ইপিনে জিলা ৰিটাৰ্নিং বিষয়া ডাঃ এম এছ লক্ষ্মীপ্ৰিয়াই সমষ্টিটোত ভোটগ্ৰহণৰ সকলো প্ৰস্তুতি সম্পন্ন কৰা বুলি প্ৰকাশ কৰি ৰাইজক শান্তিপূৰ্ণভাৱে  ভোটদান কৰি নিজৰ গণতান্ত্ৰিক অধিকাৰ সাব্যস্ত কৰিবলৈ আহ্বান জনাইছে ৷ 

উল্লেখ্য যে এইবাৰ বঙাইগাঁও বিধান সভা সমষ্টিত মুঠ ন গৰাকী প্ৰাৰ্থীয়ে প্ৰতিদ্বন্দ্বিতা আগবঢ়াইছে ৷ অগপৰ ফণীভূষণ চৌধুৰী, কংগ্ৰেছৰ শংকৰ প্ৰসাদ ৰায় আৰু অজাপৰ দীপু চৌধুৰীৰ উপৰিও সমষ্টিটোৰ পৰা  এন পি পি দলৰ প্ৰভাত বৈষ্ণৱ , ভাৰতীয় গণ পৰিষদৰ সুজিত কুমাৰ ৰায় , পলিটিকেল জাষ্টিচ পাৰ্টিৰ শান্তনু মুখাৰ্জী, ভোটাৰচ পাৰ্টি ইন্টাৰনেচনেলৰ সবেন্দ্ৰ বসুমতাৰী আৰু নিৰ্দলীয় হিচাপে ক্ৰমে কৈলাশ দাস আৰু গৌতম দত্তই প্ৰতিদ্বন্দ্বিতা আগবঢ়াইছে ৷🔯