👉শাৰী নপতাক কেন্দ্ৰ কৰি বঙাইগাঁৱত ভোটগ্ৰহণ কেন্দ্ৰত উত্তপ্ত পৰিস্থিতি

👉শাৰী নপতাক কেন্দ্ৰ কৰি বঙাইগাঁৱত ভোটগ্ৰহণ কেন্দ্ৰত উত্তপ্ত পৰিস্থিতি

👉নিৰাপত্তাৰক্ষীৰ লাঠিচালনা - আক্ৰমণ : আহত  - ৬

 

বঙাইগাঁওঃ ৬ এপ্ৰিলঃ 

📝আজি অনুষ্ঠিত তৃতীয় পৰ্যায়ৰ নিৰ্বাচনৰ ভোটগ্ৰহণৰ দিনা ৩২ নং বঙাইগাঁও বিধান সভা সমষ্টিৰ অন্তৰ্গত এটা ভোটগ্ৰহণ কেন্দ্ৰত পুৱাৰ ভাগত চৰম উত্তেজনাময় পৰিস্থিতিৰ সৃষ্টি হয় ৷ সমষ্টিটোৰ অন্যান্য ভোটগ্ৰহণ কেন্দ্ৰৰ লগতে ৬১৯ নং পশ্চিম ভাদ্ৰাগাঁও প্ৰাথমিক বিদ্যালয়ত স্থাপন কৰা ভোটগ্ৰহণ কেন্দ্ৰতো পুৱা ৭ বজাৰ পৰা ভোটগ্ৰহণ প্ৰক্ৰিয়া আৰম্ভ হয় ৷ কিন্তু কিছু সময় পিচতে কেন্দ্ৰটোত কাজিয়াৰ সূত্ৰপাত হয় ৷ প্ৰাপ্ত বাতৰি অনুসৰি উক্ত কেন্দ্ৰটোত প্ৰথম ঘটনাটো ঘটে পুৱা প্ৰায় ৮.৩০ বজাত ৷ এজন চাইকেল আৰোহীয়ে চাইকেল লৈ ভোটদান কৰিবলৈ আহি কেন্দ্ৰটোৰ চৌহদৰ ভিতৰত প্ৰৱেশ কৰিব বিচৰাক কেন্দ্ৰ কৰি নিৰাপত্তাৰ দায়িত্বত থকা অৰ্ধসামৰিক বাহিনীৰ লগত  এক কাজিয়াৰ সূত্ৰপাত ঘটে ৷ এই ঘটনাৰ শাম কটাৰ পিছত পুনৰ প্ৰায় ৯ টা বজাত সৃষ্টি হয় আন এক ঘটনাৰ ৷ ভোটদানৰ বাবে শাৰী নপতাক কেন্দ্ৰ কৰি বিবাদৰ সৃষ্টি হয় ভোটাৰ ৰাইজ আৰু অৰ্ধ সামৰিক বাহিনীৰ মাজত ৷ উল্লেখ্য যে দীঘলীয়া শাৰী হোৱাৰ বাবে কিছু ভোটাৰ বাহিৰত অপেক্ষা কৰি আছিল ৷ কিন্তু এই ভোটাৰ সকলক শাৰীত থিয় হোৱাৰ কাৰণে অৰ্ধসামৰিক বাহিনীৰ দলটোৱে হেঁচা প্ৰয়োগ কৰিছিল ৷ ইয়াকে কেন্দ্ৰ কৰি ভোটাৰ ৰাইজ উত্তেজিত হৈ পৰে ৷ পাছত অৰ্ধসামৰিক বাহিনীৰ দলটোৱে ভোটাৰ ৰাইজৰ মাজত লাঠিচালনা আৰম্ভ কৰে ৷ এনে অৱস্থাত কিছু ভোটাৰেও আক্ৰমণ চলায় অৰ্ধসামৰিক বাহিনীৰ দলটোৰ  জোৱানৰ ওপৰত ৷ এই ঘটনাত কাজিমুদ্দিন শেখ , ৰছুল হক ,  ইয়াকুব আলী শেখ , আনোৱাৰ হুছেইন মণ্ডল , নিতাই সূত্ৰধৰ নামৰ ভোটাৰৰ লগতে আন এগৰাকী চিআৰপিএফ জোৱানো আহত হোৱা বুলি জানিব পৰা গৈছে ৷ পাছত ঘটনাস্থলীত বঙাইগাঁও জিলা আৰক্ষী অধীক্ষক সুবোধ কুমাৰ সোনোৱাল আৰু জিলা প্ৰশাসনৰ উচ্চ পদস্থ বিষয়া সকল উপস্থিত হৈ পৰিস্থিতি নিয়ন্ত্ৰণলৈ আনে ৷ উল্লেখ্য যে এনে উত্তপ্ত পৰিস্থিতি চলি থকাত ভোটগ্ৰহণ কেন্দ্ৰটোত কিছু সময়ৰ বাবে ভোট গ্ৰহণ বন্ধ হৈ থাকে ৷  অৱশ্যে পিচত পৰিস্থিতি স্বাভাৱিক হোৱাত পুনৰ ভোটগ্ৰহণ আৰম্ভ হয় ৷  উল্লেখ্য যে ৰাইজে নিৰাপত্তা বাহিনীৰ জোৱানে প্ৰথমতে এজন লোকক প্ৰহাৰ কৰাৰ ফলত ৰাইজ উত্তেজিত হৈ পৰাত এই ঘটনাটো সংঘটিত হয় বুলি অভিযোগ কৰে ৷ অৱশ্যে এই ঘটনাটোক বাদ দি সমষ্টিটোত শান্তিপূৰ্ণভাৱে ভোটগ্ৰহণ হয় ৷🔯