👉বঙাইগাঁৱত স্বাস্থ্য বিভাগৰ কাণ্ড ঃ নিগেটিভ ফলাফলক প'জিটিভ ঘোষণা

👉বঙাইগাঁৱত স্বাস্থ্য বিভাগৰ কাণ্ড ঃ নিগেটিভ ফলাফলক প'জিটিভ ঘোষণা 

👉ভুল ফলাফলৰ বাবে ৰে'লৱে বিভাগৰ জ্যেষ্ঠ খণ্ড অভিযন্তা ভৰ্তি হ'ল হাস্পতালত ঃ পিছত মুকলি 

বঙাইগাঁওঃ ২২ এপ্ৰিলঃ 

📝ক'ৰোনাকলৈ এতিয়া সৰ্বত্ৰে আতংকময় পৰিৱেশ চলি থকাৰ মাজতে আজি বঙাইগাঁৱত স্বাস্থ্য বিভাগৰ ভুলৰ বাবে এজন ৰে'লৱে বিভাগৰ জ্যেষ্ঠ খণ্ড অভিযন্তাই ক'ভিডত আক্ৰান্ত নোহোৱা স্বত্বেও হাস্পতালত ভৰ্তি হ'বলগীয়া পৰিস্থিতিৰ সৃষ্টি হয় ৷ অৱশ্যে পিছত ভুলটো ধৰা পৰাত অভিযন্তাগৰাকীক হাস্পতালৰ পৰা মুকলি কৰি দিয়া হয় ৷ এই ঘটনাকলৈ তীব্ৰ প্ৰতিক্ৰিয়াৰ সৃষ্টি হোৱাৰ লগতে সৰ্বসাধাৰণ ৰাইজ আতংকিত হৈ পৰিছে ৷ এই ঘটনাটো সংঘটিত হয় বঙাইগাঁৱৰ পাগলাস্থানস্থিত বঙাইগাঁও ৰে'লৱে অভিযান্ত্ৰিক কাৰখানাত ৷ উল্লেখ্য যে বঙাইগাঁও জিলা প্ৰশাসনৰ নিৰ্দেশত  আজি স্বাস্থ্য বিভাগৰ এটা দলে কাৰখানত কৰ্মৰত ৰে'লৱে বিভাগৰ কৰ্মচাৰীসকলৰ ক'ভিড টেষ্ট কৰাৰ বাবে পুৱাৰ ভাগতে উপস্থিত হৈছিল ৷ স্বাস্থ্য বিভাগৰ দলটোৱে ৰে'লৱে কৰ্মচাৰীসকলৰ ৰেপিড এণ্টিজেন টেষ্ট কৰাৰ পিছত টেষ্টৰ ফলাফলসমূহ কৰ্মচাৰীসকলক মোবাইল বাৰ্তাযোগে প্ৰেৰণ কৰি আছিল ৷ কিন্তু ইয়াৰ মাজতে দুৰ্ভাগ্যজনকভাবে জ্যেষ্ঠ খণ্ড অভিযন্তা অমন মিট্টালে ( ২৯) নিজৰ ফলাফল প'জিটিভ বুলি বাৰ্তা লাভ কৰে ৷ এই বাৰ্তা পোৱাৰ পিছতে অভিযন্তাগৰাকীয়ে লগে লগে বিষয়টো কাৰখানাৰ অধীক্ষকক অৱগত কৰে ৷ পিছত তৎক্ষণাত জ্যেষ্ঠ খণ্ড অভিযন্তা অমন মিট্টালক চিকিৎসাৰ বাবে নিউ বঙাইগাঁও ৰে'লৱে হাস্পতাললৈ প্ৰেৰণ কৰা হয় ৷ ইপিনে এজনৰ দেহত ক'ভিড - ১৯ ধৰা পৰাত আৰু কিমানজনৰ ফলাফল প'জিটিভ ওলাইছে সেয়া স্বাস্থ্য বিভাগৰ দলটোৰ পৰা কাৰখানা কৰ্তৃপক্ষই জানিব বিচাৰাত এজনো ৰে'লৱে কৰ্মচাৰীৰ ক'ভিড টেষ্টৰ ফলাফল প'জিটিভ ওলোৱা নাই বুলি দায়িত্বৰত স্বাস্থ্য বিভাগৰ বিষয়াজনে জনায় ৷ তেতিয়া অমন মিট্টালৰ ক'ভিড টেষ্টৰ ফলাফল প'জিটিভ অহা বুলি জনোৱাত ভুল বাৰ্তা যোৱা বুলি কয় ৷ লগে লগে বিষয়টোকলৈ এক হুলুস্থুলীয়া পৰিৱেশৰ সৃষ্টি হয় ৷ পিছত লগে লগে কাৰখানা কৰ্তৃপক্ষই হাস্পতালত ভৰ্তি হোৱা অভিযন্তা অমন মিট্টাল আৰু হাস্পতাল কৰ্তৃপক্ষক বিষয়টো অৱগত কৰে ৷ কিন্তু হাস্পতাল কৰ্তৃপক্ষই পুনৰ অমন মিট্টালৰ ক'ভিড টেষ্ট কৰে আৰু টেষ্টৰ ফলাফল নিগেটিভ অহাত হাস্পতালৰ পৰা মুকলি কৰি দিয়ে ৷ ইপিনে স্বাস্থ্য বিভাগৰ এনে কাণ্ডত ভুক্তভোগী জ্যেষ্ঠ খণ্ড অভিযন্তাগৰাকীয়ে তীব্ৰ ক্ষোভ প্ৰকাশ কৰি কয় যে এই ফলাফলৰ ভিত্তিতে ৰে'লৱে হাস্পতালৰ চিকিৎসকে চিকিৎসা কৰাৰ লগতে ঔষধ দিয়াৰ বাবে প্ৰস্তুত হৈছিল ৷ যদি ঔষধ সেৱন কৰিলোহেতেন ,তেতিয়াহলে  হয়তো অসুস্থ হৈ পৰিলোহেতেন ৷ এয়া স্বাস্থ্য বিভাগৰ অৱহেলাৰ বাবে হৈছে ৷ উল্লেখ্য যে অভিযন্তাগৰাকীয়ে স্বাস্থ্য বিভাগৰ দলটোক কিয় এনে হ'বলৈ পালে বুলি প্ৰশ্ন কৰাত তেওঁলোকে কোনো গুৰুত্বই নিদিলে বুলিহে কয় ৷ জীৱন- মৰনৰ সৈতে জড়িত এনে এটা বিষয়ত কিদৰে ভুল হ'ব পাৰে সেয়া আশ্চৰ্যৰ কথা ৷ পিছত এগৰাকী কাৰ্যবাহী দণ্ডাধীশ কাৰখানাত উপস্থিত হৈ বিষয়টি নিস্পত্তি কৰে ৷🔯