👉বাঙালী ফেডাৰেছনৰ বিজেপি মিত্ৰজোঁটলৈ মুকলি সমৰ্থন

👉তৃতীয় পৰ্যায়ৰ নিৰ্বাচন 

👉বাঙালী ফেডাৰেছনৰ বিজেপি মিত্ৰজোঁটলৈ মুকলি সমৰ্থন 

বঙাইগাঁওঃ ৪ এপ্ৰিলঃ 

📝অসম বিধান নিৰ্বাচনৰ  তৃতীয় পৰ্যায়ৰ নিৰ্বাচনত সদৌ অসম বাঙালী যুৱ-ছাত্ৰ ফেডাৰেছনে বিজেপি মিত্ৰজোঁটক মুকলিসমৰ্থন আগবঢ়াইছে ৷ আজি বৃহত্তৰ  বঙাইগাঁও প্ৰেছ ক্লাবত অনুষ্ঠিত হোৱা এক সংবাদমেলত  সংগঠনটোৰ কেন্দ্ৰীয় সমিতিয়ে এই কথা ঘোষণা কৰে ৷ সংবাদমেলত সংগঠনটোৰ কেন্দ্ৰীয় সমিতিৰ সভাপতি মহানন্দ দত্ত সৰকাৰে এই সমৰ্থনৰ কথা ব্যক্ত কৰি কয় যে ৰাজ্যখনত বিগত সময়ছোৱাত হিন্দু বাঙালীসকলে নাগৰিকত্ব সমস্যা ,  ডি ভোটাৰ সমস্যা আৰু ডিটেনচন কেম্পত প্ৰেৰণৰ  নামত যথেষ্ট  হাৰাশাস্তি ভোগ কৰিব লগীয়া হৈছিল ৷ বিজেপি মিত্ৰজোঁটৰ চৰকাৰ হলে এই হাৰাশাস্তি বন্ধ কৰা হ'ব বুলি প্ৰতিশ্ৰুতি প্ৰদান কৰাত সদৌ অসম বাঙালী যুৱ - ছাত্ৰ ফেডাৰেছনে  তৃতীয় পৰ্যায়ৰ নিৰ্বাচনত বিজেপি নেতৃত্বাধীন  মিত্ৰজোঁটক সমৰ্থন জনোৱা বুলি সংবাদমেলত সভাপতি গৰাকীয়ে উল্লেখ কৰে ৷ অৱশ্যে বিজেপি মিত্ৰজোঁটক কেৱল এটা বছৰ সময় দিয়া বুলি কৈ কয় যে পূৰ্বে পাঁচ বছৰ চালে আৰু এটা বছৰ চাম ৷ যদিহে আমাৰ সমস্যাসমূহ সমাধান নকৰে ,তেতিয়াহলে বিজেপি চৰকাৰৰ বিৰুদ্ধাচৰণ কৰিম আৰু আন্দোলন গঢ়ি তুলিম ৷ লগতে প্ৰয়োজনত আগন্তুক দিনত ৰাজনৈতিক দল গঠন কৰিম  আৰু বিজেপিৰ বিৰুদ্ধে প্ৰাৰ্থীও ঠিয় কৰাম ৷ কিন্তু সেয়া সময়ত কম ৷ হিন্দু বাঙালীসকলৰ সামাজিক অৰ্থনৈতিক আৰু ৰাজনৈতিক স্বাৰ্থ সুৰক্ষিত কৰাৰ স্বাৰ্থতো বিজেপি নেতৃত্বাধীন মিত্ৰজোঁটক সমৰ্থন জনোৱা বুলি কয় ৷

ইপিনে প্ৰথম আৰু দ্বিতীয় পৰ্যায়ৰ  নিৰ্বাচনত  সংগঠনটোৱে নিৰপেক্ষ ভূমিকাত থকাৰ পিছত তৃতীয় পৰ্যায়ৰ নিৰ্বাচনৰ প্ৰাক মুহুৰ্তত কিয় এই ৰাজনৈতিক সিদ্ধান্ত লোৱা হল বুলি সাংবাদিকৰ প্ৰশ্নৰ উত্তৰত সভাপতি গৰাকীয়ে কয় যে তৃতীয় পৰ্যায়ৰ নিৰ্বাচনত অৱতীৰ্ণ হোৱা কংগ্ৰেছ নেতৃত্বাধীন মিত্ৰজোঁটৰ অন্যতম অংশীদাৰী চিপিআই(এম ) দলৰ সৰভোগ সমষ্টিৰ প্ৰাৰ্থী মনোৰঞ্জন তালুকদাৰে সমষ্টিটোত ২৫ হেজাৰ হিন্দু বাঙালী বিদেশী থকা বুলি কোৱাৰ কাৰণে সংগঠনটোৱে বাঙালী জাতিটোৰ নিৰাপত্তাক লৈ চিন্তিত হৈ পৰে ৷ যাৰ বাবে বিজেপি মিত্ৰজোঁটক সমৰ্থন জনোৱা বুলি সভাপতি গৰাকীয়ে উল্লেখ কৰে ৷ নেতাগৰাকীয়ে লগতে কয় যে এটা জাতিক এনে অপমান সূচক মন্তব্য কৰাৰ পাছতো কিন্তু কংগ্ৰেছ দলেও ইয়াৰ কোনো প্ৰতিক্ৰিয়া প্ৰকাশ কৰা নাই ৷ যাৰ বাবে সংগঠনটোৱে প্ৰথম বাৰৰ বাবে এনে ৰাজনৈতিক সিদ্ধান্ত গ্ৰহন কৰা বুলি সভাপতি গৰাকীয়ে কয় ৷ হিন্দু বাঙালীসকলক বিজেপিৰ লগতে মিত্ৰজোঁটৰ অংশীদাৰ অগপ, ইউপিপিএল, গনশক্তি , ৰাভা হাছং সংগ্ৰাম সমিতিৰ প্ৰাৰ্থী সকলক ভোটদান কৰাৰ বাবেও আহ্বান জনায় সংগঠনটোৰ সভাপতিগৰাকীয়ে ৷ আজিৰ এই সংবাদমেলত সংগঠনটোৰ কেন্দ্ৰীয় সমিতিৰ সাধাৰণ সম্পাদক সম্ৰাট ভাওয়ালে পূৰ্বৰ কংগ্ৰেছ চৰকাৰক দোষাৰোপ কৰি কয় যে কংগ্ৰেছৰ আমোলতে প্ৰথম হিন্দু বাঙালীসকলক ডি ভোটাৰ সজোৱা হৈছে ৷ বৰ্তমানেও বিদেশীৰ নামত যিবোৰ বিদেশী নাগৰিকৰ জাননী আহি আছে সেইবোৰ বেছিবোৰ গোচৰ পঞ্জীয়ন হৈছিল ২০০৬ চনৰ পৰা ২০১২ চনৰ ভিতৰত ৷ গতিকে কংগ্ৰেছ দলৰ আমোলতে হিন্দু বাঙালী সকল আটাইতকৈ লাঞ্ছনা বঞ্চনাৰ স্বীকাৰ হৈছে ৷ ইমানদিনে  হিন্দু বাঙালীসকলে কংগ্ৰেছক আকোঁৱালি লৈছিল  কিন্তু কংগ্ৰেছ দলৰ আমোলতে এই লাঞ্ছনা বঞ্চনাৰ স্বীকাৰ হৈ আহিছে ৷ গতিকে এনে পৰিস্থিতিত সদৌ অসম বাঙালী যুৱ - ছাত্ৰ ফেডাৰেছনে বিজেপি মিত্ৰজোটক সমৰ্থন জনাবলৈ বাধ্য হৈছে ৷ আজিৰ এই সংবাদমেলত সংগঠনটোৰ বিটিএডিৰ জ'নেল সমিতিৰ ভাৰপ্ৰাপ্ত সভাপতি জিৎ পাল ,  কেন্দ্ৰীয় সমিতিৰ উপ সভাপতি অৰূপ দে , সহকাৰী সম্পাদক উত্তম চক্ৰৱৰ্তী , চিৰাং জিলা সমিতিৰ সভাপতি মানিক কুমাৰ দত্ত , সাধাৰন সম্পাদক প্ৰসেনজিৎ সাহা , কোকৰাঝাৰ জিলা সমিতিৰ সভাপতি অখিল দেবনাথ , বঙাইগাঁও জিলা সমিতিৰ সাধাৰন সম্পাদক কমল ঘোষ , কামৰূপ জিলা সমিতিৰ সাধাৰণ সম্পাদক শুভজিৎ দেৱনাথ সহ আৰু কেবাজনো নেতৃবৃন্দ উপস্থিত থাকে ৷ 🔯