👉বৰপেটা জিলাৰ সকলো চহৰ-নগৰৰ দোকানী সকলৰ কোভিড পৰীক্ষাৰ ব্যাপক অভিযান আৰম্ভ*

👉বৰপেটা জিলাৰ সকলো চহৰ-নগৰৰ দোকানী সকলৰ কোভিড পৰীক্ষাৰ ব্যাপক অভিযান আৰম্ভ*                        

বৰপেটা, ৮ মে' : 

📝বৰপেটা জিলাতো ক্ৰমান্বয়ে কোভিড আক্ৰান্তৰ সংখ্যা বৃদ্ধি পাই অহাৰ প্ৰতি লক্ষ্য ৰাখি আজিৰে প্ৰায় সকলো চহৰ অঞ্চলৰ দোকানী-ব্যৱসায়ী সকলৰ ৰেপিড এন্টিজেন টেষ্টৰ ব্যৱস্থা কৰা হৈছে। স্থানীয় পৌৰ সভা সমূহৰ সহযোগত জিলা স্বাস্থ্য বিভাগৰ দ্বাৰা বৰপেটা, সৰভোগ, সৰ্থেবাৰী, বৰপেটা ৰোড আৰু  হাউলীৰ উপৰি কয়াকুছী বজাৰৰো দোকানী-ব্যৱসায়ী সকলৰ ঠাইতে কোভিড পৰীক্ষাৰ ব্যৱস্থা কৰা হয়। অতিৰিক্ত উপায়ুক্ত নৱজিৎ পাঠকে এই কথা প্ৰকাশ কৰি জনাইছে যে আজিৰে পৰা আৰম্ভ হোৱা এই ব্যৱস্থা সকলো দোকানী ব্যৱসায়ীক সামৰি নোলোৱা পৰ্যন্ত অব্যাহত থাকিব। বৰপেটা চহৰৰ ব্যৱসায়ী সকলৰ পৰীক্ষাৰ ব্যৱস্থা বৰপেটা পৌৰ সভাৰ কাৰ্যালয় চৌহদতে কৰা হৈছে। আজি প্ৰথম দিনা ইয়াত ১০৮ জনৰ কৰা পৰীক্ষাত চাৰিজনৰ পজিটিভ পোৱাত তেওঁলোকক উপযুক্ত চিকিৎসাৰ ব্যৱস্থা কৰা হৈছে। উল্লেখযোগ্য যে দোকান-বজাৰ সমূহ খোলা থকা হেতুকে আৰু তেওঁলোকে দৈনিক যথেষ্ট সংখ্যক ক্ৰেতাৰ সংস্পৰ্শলৈ অহাৰ পৰিপ্ৰেক্ষিতত বিক্ৰেতা সকলৰ কোভিড পৰীক্ষা অতি প্ৰয়োজনীয় বুলি বিবেচিত হৈছে। সেয়েহে সকলো দোকানী-বিক্ৰতাকে জিলা প্ৰশাসনে স্বাস্থ্য পৰীক্ষাৰ বাবে কৰা এই ব্যৱস্থাৰ প্ৰতি সঁহাৰি জনাবলৈ পাঠকে আহ্বান জনাইছে। তদুপৰি প্ৰতিখন দোকানী বা ব্যৱসায়িক প্ৰতিষ্ঠানত সামাজিক দূৰত্ব বৰ্তাই ৰখা, পৰ্যাপ্ত ছেনিটাইজাৰ আৰু হাত ধুৱাৰ ব্যৱস্থা ৰাখিবলৈ কঠোৰ ভাবে নিৰ্দেশ দিয়া হৈছে বুলি তেওঁ জানিবলৈ দিয়ে। অন্যথা সংশ্লিষ্ট দোকানৰ অনুজ্ঞা-পত্ৰ নাকচ কৰাৰ লগতে দুৰ্যোগ ব্যৱস্থাপনা আইনৰ অধীনতো ব্যৱস্থা গ্ৰহণ কৰা হব বুলি সকীয়াই দিছে। তেওঁ জনোৱা মতে পৰবৰ্তী পৰ্যায়ত জিলাখনৰ আন আন সৰু চহৰ সমূহতো অনুৰূপ ব্যৱস্থা কৰা হ'ব।🔯