👉অগপ বিধায়ক ফণীভুষণ চৌধুৰীক মন্ত্ৰীত্ব প্ৰদানৰ দাবী কমতাপুৰ পিপুলছ এছোছিয়েচনৰ

👉অগপ বিধায়ক ফণীভুষণ চৌধুৰীক মন্ত্ৰীত্ব প্ৰদানৰ দাবী কমতাপুৰ পিপুলছ এছোছিয়েচনৰ 

বঙাইগাঁওঃ ৭ মেঃ 

📝নতুনকৈ গঠন হ'বলগীয়া অসম মন্ত্ৰী সভাৰ মিত্ৰজোটৰ চৰকাৰত বঙাইগাঁও বিধান সভা সমষ্টিৰ পৰা একেৰাহে আঠবাৰকৈ নিৰ্বাচিত ফণীভূষণ চৌধুৰীক মন্ত্ৰীত্ব প্ৰদানৰ বাবে অগপ দলৰ নেতৃত্বৰ লগতে মিত্ৰজোটলৈ কমতাপুৰ পিপুলছ এছোছিয়েচনে আহ্বান জনাইছে ৷ শুকুৰবাৰে বৃহত্তৰ বঙাইগাঁও প্ৰেছ ক্লাবত আয়োজিত এখন সংবাদ মেলত সংগঠনটোৰ সভাপতি হৰমোহন মেধিয়ে মিত্ৰজোটলৈ এই আহ্বান জনাই কয় যে হৈ যোৱা বিধান সভা নিৰ্বাচনৰ ফলাফল অনুসৰি বঙাইগাঁও ,‌ ধুবুৰী, দক্ষিণ শালমাৰা আৰু গোৱালপাৰা জিলাৰ এটা অংশকলৈ যি কমতাপুৰ স্বায়ত্বশাসিত পৰিষদ চৰকাৰে ঘোষণা কৰি আইন গৃহীত কৰিছে এই স্বায়ত্বশাসিত পৰিষদ এলেকাৰ অন্তৰ্গত অঞ্চলত ১৩ টা বিধান সভা সমষ্টি আছে ৷ কিন্তু এই ১৩ টা সমষ্টিৰ ভিতৰত মিত্ৰজোটে কেৱল এটা সমষ্টিতহে জয়লাভ কৰিছে ৷ সেই সমষ্টিটো হৈছে বঙাগাঁও বিধান সভা সমষ্টি ৷ এই সমষ্টিটোৰ পৰা মিত্ৰজোটৰ অন্যতম সহযোগী দল অগপৰ ফণীভূষণ চৌধুৰী বিজয় হৈছে ৷ বিধায়ক হিচাপে তেওঁ সমষ্টিটোৰ পৰা একেৰাহে আঠবাৰকৈ বিজয় হৈছে ৷ মিত্ৰজোটৰ প্ৰাৰ্থী হিচাপে যিহেতু কমতাপুৰ স্বায়ত্বশাসিত এলেকাৰ পৰা একমাত্ৰ অগপৰ ফণীভূষণ চৌধুৰীয়ে বিজয়ী হৈছে, সেয়ে মিত্ৰজোটৰ নেতৃত্বৰ লগতে বিজেপি , অগপ আৰু ইউ পি পি এলৰ নেতৃবৃন্দক গঠন হ'বলগীয়া চৰকাৰত ফণীভূষণ চৌধুৰীক মন্ত্ৰীত্ব প্ৰদানৰ বাবে দাবী জনায় ৷ ফণীভূষণ চৌধুৰীক এজন অভিজ্ঞতাসম্পন্ন ব্যক্তি বুলি কৈ ১৯৮৫ চনৰ পৰা একেৰাহে বিজয়ী অহা চৌধুৰীয়ে এইবাৰ বিধান সভাত সকলোতকৈ জ্যেষ্ঠ বিধায়ক বুলিও কয় ৷ তাৰোপৰি কমতাপুৰ স্বায়ত্বশাসিত এলেকাৰ বৃহত্তৰ জনগোষ্ঠী হিচাপে কোচ ৰাজবংশী জনগোষ্ঠীৰ তেঁৱে একমাত্ৰ প্ৰতিনিধি হিচাপে নিৰ্বাচিত হৈছে ৷ সেয়ে কমতাপুৰ স্বায়ত্বশাসিত পৰিষদক প্ৰতিনিধিত্ব কৰাৰ স্বাৰ্থত তথা বঙাইগাঁও ,ধুবুৰী, দক্ষিণ শালমাৰা আৰু গোৱালপাৰাৰ ৰাইজৰ স্বাৰ্থত ফণীভূষণ চৌধুৰীক মন্ত্ৰীত্ব প্ৰদানৰ বাবে দাবী জনায় ৷ সংগঠনটোৰ সভাপতিগৰাকীয়ে লগতে কয় যে মিত্ৰজোটৰ চৰকাৰেই যিহেতু কমতাপুৰ স্বায়ত্বশাসিত পৰিষদ গঠন আইন গৃহীত কৰিছিল ,সেয়ে চৰকাৰ গঠনৰ তিনি মাহৰ পিছতে পৰিষদখন গঠনৰ যাৱতীয় ব্যৱস্থা গ্ৰহণ কৰিব বুলিও আশা প্ৰকাশ কৰে ৷ আনহাতে পশ্চিমবংগৰ ঘটনাক সংগঠনটোৱে গৰিহণা দি হত্যা- হিংসাৰ পৰিৱেশৰ অৱসান ঘটোৱাৰ বাবে ৰাজ্যখনৰ মুখ্যমন্ত্ৰী মমতা বেনাৰ্জীক আহ্বান জনায় ৷ লগতে ইতিমধ্যে ঘৰ- বাৰী এৰি অসমত আশ্ৰয় গ্ৰহণ কৰা লোকসকলোকো পুনৰ পূৰ্বৰ স্থানলৈ ওভোতাই নি সংস্থাপিৰ ব্যৱস্থা কৰিবলৈকো আহ্বান জনায় ৷ সংবাদ মেলত সংগঠনটোৰ সম্পাদক প্ৰফুল্ল কুমাৰ ৰায় , উপ সভাপতি সৰ্বেশ্বৰ বৰ্মন, উপদেষ্টা ধীৰাজ ৰায় , অনিল কুমাৰ সিংহ , সত্ৰসিং চৌধুৰী, বিত্ত সম্পাদক ব্ৰজেন ৰায় ,সদস্য অকণ সৰকাৰ আদি উপস্থিত আছিল ৷🔯