🔯চিৰাঙত ১৮ দিনত ৬৬ খন চুৰি বাইক উদ্ধাৰঃঃ গ্ৰেপ্তাৰ ২৩

🔯চিৰাঙত ১৮ দিনত ৬৬ খন চুৰি বাইক উদ্ধাৰঃঃ গ্ৰেপ্তাৰ ২৩

🔯চিৰাঙত বি টি আৰ আৰক্ষী মহাপৰিদৰ্শকৰ সংবাদমেল

🔯এন এল এফ বিৰ আক্ৰমণৰ লক্ষ্য হ'ব পাৰে আৰক্ষী-বন বিভাগ 

🔯নিৰাপত্তা কটকটীয়া বি টি আৰ আৰক্ষী প্ৰশাসনৰ

📝বঙাইগাঁওঃ ৯ জুলাইঃ প্ৰাক্তন এন ডি এফ বিৰ নেতা এম বাথাৰ নেতৃত্বত নতুনকৈ গঠন হোৱা উগ্ৰপন্থী সংগঠন নেচনেল লিবাৰেচন ফ্ৰণ্ট অৱ বড়োলেণ্ড চমুকৈ এন এল এফ বিৰ আক্ৰমণৰ লক্ষ্য হ'ব পাৰে আৰক্ষী তথা বনবিভাগ। বিশেষকৈ অস্ত্ৰ-শস্ত্ৰ লুটৰ বাবেই দুৰ্গম অঞ্চলত থকা বন বিভাগৰ শিবিৰত আক্ৰমণ কৰিব পাৰে উগ্ৰপন্থী সংগঠনটোৱে।এই সম্পৰ্কে বি টি আৰ আৰক্ষী প্ৰশাসনে গোপন তথ্য লাভ কৰিছে আৰু নিৰাপত্তা ব্যৱস্থা অধিক কটকটীয়া কৰি তুলিছে।এই তথ্য সদৰি কৰিছে অসম আৰক্ষীৰ বিশেষ শাখাৰ( টি এ পি) আৰক্ষী সঞ্চালক প্ৰধান তথা বি টি আৰৰ  আৰক্ষী মহাপৰিদৰ্শক ডঃ এল আৰ বিষ্ণোয়ে। চিৰাং জিলাত চুৰি বাইকৰ বিৰুদ্ধে চলি থকা ধাৰাবাহিক অভিযান সম্পৰ্কে তথ্য সদৰি কৰাৰ বাবে আয়োজন কৰা এক সংবাদমেলত সাংবাদিকৰ এক প্ৰশ্নৰ উত্তৰত এই কথা জানিবলৈ দিয়ে শীৰ্ষ আৰক্ষী বিষয়াগৰাকীয়ে। তেওঁ লগতে কয় যে বি টি আৰৰ চাৰিওখন জিলাৰ বন বিভাগৰ শিৱিৰসমূহৰ অস্ত্ৰ - শস্ত্ৰ, বনকৰ্মীকে ধৰি সামগ্ৰিক অৱস্থাৰ পৰ্যালোচনা কৰা হৈছে আৰু সেইমতে নিৰাপত্তা তথা সতৰ্কতামূলক ব্যৱস্থা গ্ৰহণ কৰা হৈছে। বৃহস্পতিবাৰে কোকৰাঝাৰ লোকসভা সমষ্টিৰ সাংসদ নৱ কুমাৰ শৰণীয়াই বাথাৰ নেতৃত্বত ভৈৰৱকুণ্ডৰ ওচৰত দুই সহস্ৰাধিক এন এল এফ বিৰ কেডাৰে অস্ত্ৰ-শস্ত্ৰৰ প্ৰশিক্ষণ লোৱা বুলি কৰা দাবীৰ সম্পৰ্কত শীৰ্ষ আৰক্ষী বিষয়াগৰাকীয়ে কয় যে- এন এল বিৰ বৰ্তমান কিমান সদস্য আছে সঠিক তথ্য আমাৰ হাতত নাই । কিন্তু গোপন তথ্য লাভ কৰা মাত্ৰকে আমি গ্ৰেপ্তাৰ কৰিবলৈ সক্ষম হৈছো। ইতিমধ্যে ওদালগুৰিত ৩৩ আৰু চিৰাং আৰু বাক্সা জিলাত ৩ জনকৈ কেডাৰক গ্ৰেপ্তাৰ কৰা হৈছে। 

আনহাতে চিৰাঙত চুৰি বাইকৰ বিৰুদ্ধে চলি থকা ধাৰাবাহিক অভিযান সম্পৰ্কে তেওঁ কয় যে, জিলাখনত আৰক্ষী অধীক্ষক গৌৰৱ উপাধ্যায়ৰ নেতৃত্বত তথা অতিৰিক্ত আৰক্ষী অধীক্ষক প্ৰকাশ মেধি, উপ আৰক্ষী অধীক্ষক লৱ কুমাৰ ডেকা, বিজনীৰ মহকুমা আৰক্ষী বিষয়া শেখৰ জ্যোতি ৰয় তথা সংশ্লিষ্ট থানাসমূহৰ ভাৰপ্ৰাপ্ত আৰক্ষী বিষয়াৰ সহযোগত চলোৱা অভিযানত বিগত ১৮ দিনত মুঠ ৬৬ খন চুৰি বাইক উদ্ধাৰ কৰিবলৈ আৰক্ষী সক্ষম হৈছে। বিগত ৮ টা দিনৰ অভিযানৰ সবিশেষ জানিবলৈ দি বিষয়গৰাকীয়ে কয় যে, ১ জুলাইৰ পৰা চলোৱা অভিযানত জিলাখনত মুঠ ৩০ খন চুৰি বাইক উদ্ধাৰ কৰা হৈছে। ইয়াৰ ভিতৰত ৰুণীখাটা থানা এলেকাত ২১ খন, পানবাৰী থানা এলেকাত ৭ খন আৰু ঢালিগাঁও থানা এলেকাত ২ খন চুৰি বাইক উদ্ধাৰ কৰা হৈছে। উদ্ধাৰকৃত বাইকসমূহৰ বজাৰ মূল্য ৮০ হাজাৰ টকাৰ পৰা ডেৰ লাখ টকালৈকে হ'ব। আৰক্ষীয়ে যোৱা ২০-৩০ জুনত চলোৱা অভিযানত মুঠ ৩৬ খন চুৰি বাইক উদ্ধাৰ কৰিবলৈ সক্ষম হৈছল।এই সংক্ৰান্তত ইতিমধ্যে ২২ জন বাইক চোৰ আৰু এজন গেৰেজৰ মালিকক গ্ৰেপ্তাৰ কৰিছে। ধৃত চোৰৰ আটাইকেইটা চিৰাং জিলাৰ বাসিন্দা আৰু বঙাইগাঁও, ঢালিগাঁও, বিজনী, কোকৰাঝাৰ , চেৰফাংগুৰী আদি বিভিন্ন ঠাইৰ পৰা বাইকসমূহ চুৰি কৰি ভাৰত- ভূটান সীমান্তবৰ্তী এলেকাৰ ভিতৰুৱা গাঁৱত ২০- ২৫ হাজাৰ টকাত বিক্ৰী কৰে। আৰক্ষীয়ে চোৰকেইটাৰ পৰা কেইপাট মান ' মাষ্টাৰ কি' ( key) উদ্ধাৰ কৰিছে।  চুৰি বাইকৰ কিছুসংখ্যক বৰ্তমানে জিলাখনত সক্ৰিয় হৈ থকা উগ্ৰপন্থী সংগঠনৰ হাতলৈ যায় বুলি সাংবাদিকক জানিবলৈ দিয়ে।ডঃ বিষ্ণোয়ে আনলোকৰ পৰা গাড়ী-মটৰ ক্ৰয় কৰাৰ আগতে আৰক্ষীৰ পৰা গাড়ীখনৰ সবিশেষ তথ্য জানি ল'বলৈ সংবাদ মাধ্যমৰ জৰিয়তে ৰাইজলৈ আহ্বান জনাইছে। চিৰাং জিলা আৰক্ষী অধীক্ষকৰ সভাকক্ষত অনুষ্ঠিত সংবাদমেলত ডঃ এল আৰ বিষ্ণোয়ৰ উপৰিও চিৰাং জিলা আৰক্ষী অধীক্ষক গৌৰৱ উপাধ্যায়, অতিৰিক্ত আৰক্ষী অধীক্ষক প্ৰকাশ মেধি, উপ আৰক্ষী অধীক্ষক লৱ কুমাৰ ডেকা উপস্থিত আছিল।🔯