🔯চিৰাঙৰ গৃহৰক্ষী জোৱানক কোনে হত্যা কৰিছিল? আৰক্ষী অধীক্ষকৰ সংবাদমেল

🔯চিৰাঙৰ গৃহৰক্ষী জোৱানক কোনে হত্যা কৰিছিল? আৰক্ষী অধীক্ষকৰ সংবাদমেল 

🔯আৰক্ষীৰ গুলীত নিহত মূল হত্যাকাৰী আব্দুল খালেক 

📝বঙাইগাঁওঃ ৮ জুলাই : চিৰাং জিলাৰ বিজনী থানাৰ অন্তৰ্গত কাছদহাত মঙলবাৰে নিশা গৃহৰক্ষী জোৱান ইয়াদ আলী(৪২)ৰ নৃসংশ হত্যাকাণ্ডত জড়িত তিন হত্যাকাৰীৰ ভিতৰত মূল হত‍্যাকাৰী আব্দুল খালেক আৰক্ষীৰ গুলীত নিহত হৈছে । কাজলগাঁওস্থিত চিৰাং জিলা আৰক্ষী অধীক্ষকৰ কাৰ্যালয়ত শুকুৰবাৰে এই হত্যাকাণ্ড সন্দৰ্ভত এক সংবাদমেল সম্বোধন কৰি আৰক্ষী অধীক্ষক গৌৰব উপাধ্যায়ে ইয়াৰ প্ৰকৃত তথ্য দাঙি ধৰে । বিজনী থানাত কৰ্মৰত গৃহৰক্ষী জোৱানজনে নিজ কৰ্তব্য সামৰি ঘৰলৈ গৈ থকা অৱস্থাত কাছদহাত মঙলবাৰে দুৰ্বৃত্তই নিশা দাৰে ঘপিয়াই হত‍্যা কৰিছিল । ঘটনাস্থলী চিৰাং আৰু বঙাইগাঁও জিলাৰ সীমামূৰীয়া হোৱা বাবে দুয়োখন জিলাৰ আৰক্ষী অধীক্ষককে ধৰি শীৰ্ষ আৰক্ষী বিষয়া ঘটনাস্থলীত উপস্থিত হৈ তদন্ত আৰম্ভ কৰে । প্ৰাথমিক তদন্তত আৰক্ষীয়ে ঘটনাটো পাৰিবাৰিক কন্দল তথা ব্যক্তিগত শত্ৰুতাৰ ফলত সংঘটিত হোৱা বুলি নিশ্চিত হয় । পিছত আৰক্ষীয়ে তৎপৰতাৰে প্ৰথমতে এই ঘটনাৰ মাষ্টৰমাইণ্ড বঙাইগাঁও জিলাৰ মানিকপুৰ থানাৰ অন্তৰ্গত ভাণ্ডাৰা বজাৰৰ ফাৰ্মাচিষ্ট খন্দকাৰ ছফিউৰ ৰহমানক (৩০)ক গ্ৰেপ্তাৰ কৰাৰ পিচতে প্ৰকৃত সত্য পোহৰলৈ আহে । খন্দকাৰ ছফিউৰে গৃহৰক্ষী জোৱান ইয়াদ আলীক হত‍্যা কৰিবলৈ ডেৰ লাখ টকাত দুজনকৈ প্ৰফেছনেল কিলাৰক দায়িত্ব দিছিল বুলি আৰক্ষীৰ আগত স্বীকাৰোক্তি দিয়ে । ধৃত ফাৰ্মাচিষ্ট ছফিউৰৰ স্বীকাৰোক্তিৰ ভিত্তিত দুই পেছাদাৰী হত‍্যাকাৰী ক্ৰমে - বঙাইগাঁও জিলাৰ মানিকপুৰ থানাৰ অন্তৰ্গত ১ নং ভাণ্ডাৰা গাঁৱৰ কৰিম ফকিৰৰ পুত্ৰ আব্দুল খালেক (২০) আৰু চিৰাং জিলাৰ বিজনী থানাৰ অন্তৰ্গত দক্ষিণ কাছদহা গাঁৱৰ কেৰামত আলীৰ পুত্ৰ আয়ুব আলী (১৮)ক গ্ৰেপ্তাৰ কৰি সোধ পোছ অব্যাহত ৰাখে । পিছত নিশা উল্লেখিত পেছাদাৰী হত্যাকাৰী দুটাক আৰক্ষীয়ে হত‍্যাকাণ্ডত ব্যবহৃত অস্ত্ৰ উদ্ধাৰৰ বাবে কাচদহালৈ নিয়ে । হত্যাকাৰী আয়ুব আলীৰ ঘৰৰ পিছফালে থকা খেৰৰ দোমত লুকুৱাই ৰখা হত্যাকাণ্ডত ব্যৱহাৰ হোৱা দা দুখন উদ্ধাৰ কৰে । কিন্তু কাছদহাৰ ধাননি পথাৰৰ কাষত হঠাতে পেছাদাৰী হত্যাকাৰী আব্দুল খালেকে বিজনী মহকুমা আৰক্ষী বিষয়া শেখৰ জ্যোতি ৰায়ৰ ছাৰ্ভিচ পিষ্টলটো কাঢ়ি আৰক্ষীলৈ উদ্দেশ্যি গুলীয়াবলৈ বিচাৰে । আৰক্ষীয়েও তৎপৰতাৰে অপৰাধীজনক উদ্দেশ্যি গুলীয়াবলৈ বাধ্য হয় । গুলীবিদ্ধ আব্দুলক আৰক্ষীয়ে ততালিকে ভেটাগাঁও স্বাস্থ্যকেন্দ্ৰলৈ নিয়ে যদিও চিকিৎসকে আব্দুলক মৃত বুলি ঘোষণা কৰে । 

উল্লেখ্য যে , হত‍্যাকাৰী আব্দুল খালেকে নিজৰ পত্নীৰ হত‍্যাকাণ্ডৰ গোচৰতো অভিযুক্ত হৈ জেললৈ গৈছিল । আব্দুল খালেকে অসমৰ বিভিন্ন ঠাইত ভাড়াতীয়া হত‍্যাকাৰী হিচাপে কাম কৰাৰো অভিযোগ আছে বুলি আৰক্ষী অধীক্ষক গৰাকীয়ে লগতে সদৰি কৰে । এই সংবাদমেলত অতিৰিক্ত আৰক্ষী অধিক্ষক প্ৰকাশ মেধিয়ো উপস্থিত থাকে । ইপিনে , অকাল মৃত্যুক আকোৱালি লোৱা গৃহৰক্ষী জোৱান ইয়াদ আলী(৪২)ৰ তিনি নাবালিকা সন্তানৰ প্ৰতিটোকে ১৫০০ টকাকৈ মুঠ ৪৫০০ টকা প্ৰতিমাহে প্ৰদান কৰা হ'ব বুলি অসম আৰক্ষীৰ সঞ্চালকপ্ৰধান ভাস্কৰজ্যোতি মহন্তই ঘোষণা কৰিছে । কেন্দ্ৰীয় চৰকাৰৰ গৃহ বিভাগৰ আঁচনি 'নেচনেল ফাউণ্ডেচন ফৰ কমিউনেল হাৰমনি'ৰ অধীনত প্ৰদান কৰিবলীয়া উক্ত ধনৰাশি গৃহৰক্ষী জোৱানৰ নাবালক সন্তান তিনিটাই সাবালক অৰ্থাৎ ১৮ বছৰ সম্পূৰ্ণ নোহোৱালৈ ক্ৰমাগতভাৱে পাই থাকিব বুলি এই সংবাদমেলতে আৰক্ষী অধীক্ষক গৰাকীয়ে লগতে সদৰি কৰে ।🔯