🔯বিশিষ্ট শিক্ষাবিদ, সমাজসেৱক, গৱেষক তথা বীৰঝৰা কন্যা মহাবিদ্যালয়ৰ প্ৰাক্তন অধ্যক্ষ কুমাৰ ৰাজেন্দ্ৰ নাৰায়ণ দেৱৰ দেহাৱসান

🔯বিশিষ্ট শিক্ষাবিদ, সমাজসেৱক, গৱেষক তথা বীৰঝৰা কন্যা মহাবিদ্যালয়ৰ প্ৰাক্তন অধ্যক্ষ কুমাৰ ৰাজেন্দ্ৰ নাৰায়ণ দেৱৰ দেহাৱসান

🔯বঙাইগাঁৱত শোকৰ ছাঁ 

📝বঙাইগাঁওঃ২৯ জুলাইঃ বঙাইগাঁৱৰ বিশিষ্ট শিক্ষাবিদ , সমাজ সেৱক , বীৰঝৰা উচ্চতৰ মাধ্যমিক বিদ্যালয়ৰ প্ৰাক্তন উপাধ্যক্ষ তথা  বীৰঝৰা কন্যা মহাবিদ্যালয়ৰ প্ৰাক্তন অধ্যক্ষ কুমাৰ ৰাজেন্দ্ৰ নাৰায়ণ দেৱৰ আজি পুৱতি নিশা পুৰণি বঙাইগাঁওস্থিত নিজ বাসভৱনত বাৰ্ধ্যজনিত কাৰণত দেহাৱসান ঘটে ৷ মৃত্যুৰ সময়ত তেওঁৰ বয়স প্ৰায় ৮৯ বছৰ হৈছিল ৷ উল্লেখ্য যে বঙাইগাঁৱৰ পুৰণি বঙাইগাঁৱত ১৯৩৩ চনৰ ২৪ ছেপ্তেম্বৰত জন্মগ্ৰহণ কৰা কুমাৰ ৰাজেন্দ্ৰ নাৰায়ণ দেৱৰ পিতৃৰ নাম আছিল স্বৰ্গীয় ভোগী নাৰায়ণ দেৱ আৰু মাতৃ  আছিল স্বাৰ্গীয়া লেচেৰী বালা দেৱী ৷ ৪৫ নং পুৰণি বঙাইগাঁও এল পি স্কুলৰ পৰা প্ৰাথমিক শিক্ষা গ্ৰহণ কৰা কুমাৰ ৰাজেন্দ্ৰ নাৰায়ণ দেৱে পিছত বীৰঝৰা উচ্চ মাধ্যমিক বিদ্যালয়ৰ পৰা ১৯৫৪ চনত হাইস্কুল শিক্ষান্ত পৰীক্ষাত উত্তীৰ্ণ হয় ৷ ইয়াৰ পিছতে তেওঁ নগাঁও কলেজৰ বিজ্ঞান শাখাত নামভৰ্তি কৰি আই এচ চি ডিগ্ৰী গ্ৰহণ কৰাৰ লগতে উক্ত কলেজৰ পৰাই কলা শাখাত বি এ  ডিগ্ৰী অৰ্জন কৰে ৷ তাৰ পিছত তেওঁ ১৯৬২ চনত গুৱাহাটী বিশ্ববিদ্যালয়ৰ ইংৰাজী বিভাগত নামভৰ্তি কৰি ভাষা বিজ্ঞান বিশেষ উপ বিভাগ হিচাপে গ্ৰহণ কৰি ১৯৬৪ চনত এম এ পাঠ্যক্ৰম সমাপ্ত কৰে  ৷ কুমাৰ ৰাজেন্দ্ৰ নাৰায়ণ দেৱে ১৯৬০ চনত বীৰঝৰা উচ্চ মাধ্যমিক বিদ্যালয়ত অস্থায়ী ইংৰাজী শিক্ষক হিচাপে যোগদান কৰি নিজৰ চাকৰি জীৱনৰ আৰম্ভ কৰিছিল ৷ তেওঁ ১৯৬০ চনত বিদ্যালয়খনত অস্থায়ী ইংৰাজী শিক্ষক পদত যোগদান কৰি দুবছৰ শিক্ষক হিচাপে সেৱা আগবঢ়োৱাৰ পিছত ১৯৬২ চনত চাকৰি এৰি দি গুৱাহাটী বিশ্ববিদ্যালয়লৈ শিক্ষা গ্ৰহণৰ বাবে যায় ৷ পিছত পুনৰ ১৯৬৪ চনত বিদ্যালয়খনত স্থায়ী সহকাৰী শিক্ষকৰ পদত যোগদান কৰি ১৯৯৩ চনৰ ৩১ মেলৈকে বিদ্যালয়খনত ( পিছলৈ বীৰঝৰা উচ্চতৰ মাধ্যমিক বিদ্যালয় )  শিক্ষকতা কৰি তথা উপাধ্যক্ষ পদত কাৰ্যনিৰ্বাহ কৰি অৱসৰ গ্ৰহণ কৰে ৷ 

উল্লেখ্য যে প্ৰয়াত কুমাৰ ৰাজেন্দ্ৰ নাৰায়ণ দেৱ এজন সমাজ সেৱী ব্যক্তি আছিল ৷ বিশেষকৈ বঙাইগাঁৱত শিক্ষাৰ পৰিৱেশ গঢ়ি তোলা আৰু আগবঢ়াই নিয়াৰ ক্ষেত্ৰত তেওঁৰ উল্লেখনীয় অৱদান আছে ৷ বঙাইগাঁও চহৰৰ মাজমজিয়াত অৱস্থিত মহিলা শিক্ষাৰ অগ্ৰণী শিক্ষানুষ্ঠান বীৰঝৰা কন্যা মহাবিদ্যালয় প্ৰতিষ্ঠাৰ ক্ষেত্ৰত কুমাৰ ৰাজেন্দ্ৰ নাৰায়ণ দেৱো আছিল এজন অগ্ৰণী ব্যক্তি ৷ ১৯৯৩ চনত প্ৰতিষ্ঠা হোৱা মহাবিদ্যালয়খনৰ সৈতে তেওঁ সক্ৰিয়ভাৱে জড়িত হৈ ইংৰাজী বিভাগত আৰম্ভণিৰ পৰা প্ৰায় আঠ বছৰ শিক্ষাৰ্থীসকলক  শিক্ষাদান কৰাৰ লগতে ১৯৯৭ চনৰ পৰা ২০০০ চনলৈ তেওঁ মহাবিদ্যালয়খনৰ ভাৰপ্ৰাপ্ত অধ্যক্ষ হিচাপে কাৰ্যনিৰ্বাহ কৰিছিল ৷ পিছত তেওঁ মহাবিদ্যালয় পৰিচালনা সমিতিৰ সভাপতি পদতো কাৰ্যনিৰ্বাহ কৰিছিল ৷ সেইদৰে বীৰঝৰা উচ্চতৰ মাধ্যমিক বিদ্যালয়ৰ পৰা অৱসৰ গ্ৰহণ কৰাৰ পিছত তেওঁ আন বহু শিক্ষানুষ্ঠানৰ লগতে বঙাইগাঁও বি এড কলেজৰ লগতো সক্ৰিয়ভাৱে জড়িত হৈ পৰিছিল ৷ ১৯৯০ চনত প্ৰতিষ্ঠা হোৱা বঙাইগাঁও বি এড কলেজ পৰিচালনা সমিতিৰ প্ৰতিষ্ঠাপক কাৰ্যকৰী সভাপতি হিচাপেও দায়িত্ব পালন কৰিছিল ৷ একেদৰে পুৰণি বঙাইগাঁও হাইস্কুল প্ৰতিষ্ঠাৰ ক্ষেত্ৰতো কুমাৰ ৰাজেন্দ্ৰ নাৰায়ণ দেৱৰ অৱদান আছিল ৷ তেওঁ পুৰণি বঙাইগাঁও হাইস্কুলৰ পৰিচালনা সমিতিৰ প্ৰতিষ্ঠাপক সাধাৰণ সম্পাদক আছিল ৷ একেদৰে তেওঁ ২০০২ চনৰ পৰা ২০০৮ চনলৈ বঙাইগাঁও জিলা কোচ ৰাজবংশী সন্মীলনীৰ সভাপতিৰ দায়িত্ব পালন কৰিছিল ৷ ইয়াৰ উপৰিও তেওঁ ২০১০ চনৰ আগষ্ট মাহৰ পৰা অবিভক্ত গোৱালপাৰা জিলাৰ কোচ ৰাজবংশী এম অ বি চি সমিতি গঠন আৰু কোচ ৰাজবংশী জনগোষ্ঠীটোক জনজাতিৰ মৰ্যদা দিয়া প্ৰক্ৰিয়াৰ প্ৰচেষ্টাটো অংশগ্ৰহণ কৰিছিল ৷ এইদৰে তেওঁ বিভিন্ন সামাজিক কৰ্মৰ সৈতে জড়িত হৈ পৰিছিল ৷ আনহাতে এগৰাকী বিশিষ্ট সাহিত্যতিক তথা গৱেষক হিচাপেও পৰিচিত প্ৰয়াত কুমাৰ ৰাজেন্দ্ৰ নাৰায়ণ দেৱ অসম সাহিত্য সভাৰ সৈতেও জড়িত আছিল ৷ তেওঁ ১৯৯৮ চনত বঙাইগাঁও শাখা সাহিত্য সভাৰ সভাপতি হিচাপেও দায়িত্ব গ্ৰহণ কৰিছিল ৷ সেইদৰে তেওঁ আছিল অসম সাহিত্য সভাৰ আজীৱন সদস্যও ৷ বিভিন্ন কাকত আলোচনীত বিভিন্ন প্ৰৱন্ধ পাতি তথা লিখনি প্ৰকাশ পোৱা কুমাৰ ৰাজেন্দ্ৰ নাৰায়ণ দেৱৰ ২০০৬ চনত প্ৰকাশিত 'SELECT VOCABLES OF THE KOCH RAJBANSHI LANGUAGE WITH SOURCES & ETYMOLOGY' শীৰ্ষক গ্ৰন্থখন এখন অতি মূল্যবান গ্ৰন্থ ৷ এই গ্ৰন্থখনৰ উপৰিও তেওঁৰ আন দুখনমান গ্ৰন্থও প্ৰকাশ পাইছে ৷ একেদৰে ২০১২ বৰ্ষত বঙাইগাঁও বীৰঝৰা মহাবিদ্যালয়ৰ স্মৃতিগ্ৰন্থ 'দিকবলয়’ত On Language and Vocables of western Assam শীৰ্ষক প্ৰবন্ধ এটা লিখি যথেষ্ট সমাদৃতি লাভ কৰিছিল ৷ লক্ষ্যণীয় যে প্ৰচাৰ বিমুখ কুমাৰ ৰাজেন্দ্ৰ নাৰায়ণ দেৱ ভাষা তত্বৰ এজন উচ্চ পৰ্যায়ৰ পণ্ডিত আছিল।কিন্ত পৰ্যাপ্ত সুযোগ-সুবিধাৰ অভাৱত তেখেতৰ এই পাণ্ডিত্য নিজৰ মাজতে আবদ্ধ থাকি গ’ল। প্ৰচাৰ মুখী হ’লে হয়তো সময়ত দেশৰ ভিতৰতে ভাষা তত্বৰ এজন নামজ্বলা পণ্ডিত ৰূপে স্বীকৃতি লাভ কৰিলেহেঁতেন। স্মৰ্তব্য, বহু বছৰ পূৰ্বে তেখেতে ভাষা-তত্বৰ এখন অভিধান প্ৰণয়নৰ কামো হাতত লৈছিল।

 উল্লেখ্য যে প্ৰয়াত ৰাজেন্দ্ৰ নাৰায়ণ দেৱৰ নেতৃত্বতে বঙাইগাঁও মাজগাঁৱত স্থাপন হৈছিল জৱাহৰ নৱদোয় বিদ্যালয় ৷ প্ৰয়াত কুমাৰ ৰাজেন্দ্ৰ নাৰায়ণ দেৱ ৰাজনীতিৰ ক্ষেত্ৰখনৰ সৈতেও জড়িত হৈ পৰিছিল ৷ অগপ দলৰ এগৰাকী সক্ৰিয় সমৰ্থক আছিল যদিও পিছত অগপ ত্যাগ কৰি বিজেপিৰ সৈতে জড়িত হৈছিল ৷ কিন্তু বিজেপিয়ে অগপৰ সৈতে মিত্ৰতা কৰাত তেওঁ অসম বিজেপিত যোগদান কৰি নিৰ্দলীয় প্ৰাৰ্থী হিচাপে ২০০১ চনত বঙাইগাঁও বিধান সভা সমষ্টিৰ পৰা নিৰ্বাচনত প্ৰতিদ্বন্দ্বিতা কৰি পৰাজিত হৈছিল৷ ইপিনে বিশিষ্ট শিক্ষাবিদ গৰাকীৰ মৃত্যুত বঙাইগাঁৱৰ বিভিন্ন অনুষ্ঠান প্ৰতিষ্ঠান, দল-সংগঠন আদিয়ে গভীৰ শোক প্ৰকাশ  কৰাৰ লগতে শোক সন্তপ্ত পৰিয়ালৈ বৰ্গলৈ সমবেদনা জ্ঞাপন কৰিছে৷ উল্লেখ্য যে বিশিষ্ট ব্যক্তিগৰাকীৰ মৃত্যুৰ বাতৰি বিয়পি পৰাত পুৰণি বঙাইগাঁওস্থিত বাসগৃহত পৱাৰে পৰা গুণমুগ্ধ উপস্থিত হৈ অন্তিম শ্ৰদ্ধা নিবেদন কৰে ৷ বঙাইগাঁৱৰ বিধায়ক তথা প্ৰাক্তন মন্ত্ৰী ফণীভূষণ চৌধুৰী , সমাজ সেৱক গিৰীশ বৰুৱা , সমাজ সেৱক প্ৰভাত বৈষ্ণৱ , অগপ নেতা শৈলেন সৰকাৰসহ কেবাজনো বিশিষ্ট ব্যক্তিৰ লগতে গ্ৰেটাৰ বঙাইগাঁও প্ৰেছ ক্লাব, পুৰণি বঙাইগাঁও হাইস্কুল, টুনীয়া সাহিত্য সাংস্কৃতিক মঞ্চ,  বঙাইগাঁও শাখা সাহিত্য সভা, বঙাইগাঁও জিলা কৰ্মচাৰী পৰিষদ,  কোচ ৰাজবংশী সাংস্কৃতিক প্ৰকল্প আদিৰ তৰফৰ পৰা মৃতদেহত শেষ শ্ৰদ্ধা জ্ঞাপন কৰেে ৷ ইয়াৰ উপৰিও  বিশিষ্ট ব্যক্তি গৰাকীৰ নশ্বৰ দেহ লৈ যোৱা হয় তেওঁৰ পূৰ্বৰ কৰ্মস্থলী তথা তেওঁ জড়িত থকা একাধিক শিক্ষাকেন্দ্ৰ তথা প্ৰতিষ্ঠান লৈ ৷ তেওঁৰ মৃতদেহত পুৰণি বঙাইগাঁও হাইস্কুল , বঙাইগাঁও বীৰঝৰা উচ্চতৰ মাধ্যমিক বিদ্যালয় , বীৰঝৰা কন্যা মহাবিদ্যালয় , বিএড কলেজ , পুৰণি বঙাইগাঁও হাইস্কুল, নিয়তি সংঘলৈ নি শেষ শ্ৰদ্ধা জ্ঞাপন কৰা হয় ৷ সেইদৰে বৰপাৰাস্থিত আক্ৰাছুৰ মুখ্য কাৰ্যালয়তো আক্ৰাছুৰ তৰফৰ পৰা মৃতদেহত শেষ শ্ৰদ্ধা নিবেদন কৰে ৷ ইয়াৰ পিছত তেওঁৰ নশ্বৰ দেহৰ হাতীমুতুৰাস্থিত ৰাজহুৱা শ্মশানলৈ নিয়া হয় আৰু তাতে শেষ কৃত্য সম্পন্ন কৰা হয় ৷ উল্লেখ্য যে প্ৰয়াত  ৰাজেন্দ্ৰ নাৰায়ণদেৱে বহুদিন পূৰ্বে পত্নী হাৰা হোৱাৰ লগতে একমাত্ৰ পুত্ৰকো হেৰুৱাইছিল  ৷ মৃত্যুৰ সময়ত তেওঁ বিবাহিতা জীয়ৰী ,বোৱাৰী , তিনিজন নাতি, জোঁৱাইসহ অনেক গুণমুগ্ধক ইহ সংসাৰত এৰি থৈ যায় ৷ কোচ-ৰাজবংশী জনগোষ্ঠীৰ এই বিদ্বান ব্যক্তিজনৰ মৃত্যুত গভীৰ শোক কোচ-ৰাজবংশী জাতীয় মহাসভাৰ সাধাৰণ সম্পাদক বিশ্বজিত ৰায়ে গভীৰ প্ৰকাশ কৰি শোক সন্তপ্ত পৰিয়াল বৰ্গলৈ সমবেদনা জ্ঞাপন কৰিছে ৷ বিশিষ্ট শিক্ষাবিদগৰাকীৰ মৃত্যুত বঙাইগাঁৱত শোকৰ ছাঁ পৰিছে ৷🔯