🔯পঞ্চায়ত নাগৰিকৰ চনদ সন্দৰ্ভত বঙাইগাঁও গাঁও পঞ্চায়তত গাঁওসভা

🔯পঞ্চায়ত নাগৰিকৰ চনদ সন্দৰ্ভত বঙাইগাঁও গাঁও পঞ্চায়তত গাঁওসভা

📝বঙাইগাঁওঃ ২৯জুলাইঃ কেন্দ্ৰীয় চৰকাৰৰ নিৰ্দেশমৰ্মে সমগ্ৰ ভাৰতৰ লগতে ৰাজ্যখনৰ গাঁও-পঞ্চায়তত পঞ্চায়তৰ নাগৰিক চনদ সম্পৰ্কত ব্যৱস্থা গ্ৰহণ কৰা হৈছে। বঙাইগাঁও গাঁও-পঞ্চায়ততো বৃহস্পতিবাৰে পঞ্চায়তৰ নাগৰিক চনদ বা অধিকাৰ পত্ৰ সম্পৰ্কত এখন গাঁও-সভাৰ আয়োজন কৰা হয়। সমাজ কল্যাণ,জনস্বাস্থ্য কাৰিকৰী, স্বাস্থ্য, শ্ৰম বিভাগ, বৈধ জোখ-মাখ বিজ্ঞান বিভাগ, পশুপালন বিভাগ, আইন সেৱা প্ৰাধিকাৰী, হস্ততাঁত আৰু বস্ত্ৰশিল্প বিভাগ আদি কৰি বঙাইগাঁও জিলাৰ সমূহ বিভাগৰ বিষয়াসকলে এই গাঁও সভাত বিভাগীয় সেৱাসমূহৰ বিষয়ে অৱগত কৰে। যেনেদৰে স্বাস্থ্য বিভাগে জন্ম-মৃত্যুৰ পঞ্জীয়ন আৰু বিশেষভাৱে সক্ষম লোকক প্ৰমাণ পত্ৰ দিয়ে আৰু এয়া সাধাৰণ ৰাইজলৈ স্বাস্থ্য বিভাগৰ সেৱা। নিৰ্দিষ্ট সময়ৰ ভিতৰত এই সেৱাসমূহ বিনামূলীয়া। সাধাৰণ ৰাইজে পাবলগীয়া এই সেৱাসমূহ গাঁও পঞ্চায়ত কাৰ্যালয়ত লিপিবদ্ধ থাকিব আৰু ৱেবচাইটতো আপলোড কৰা হ'ব। সেইদৰে সমাজ কল্যাণ বিভাগৰ প্ৰধান মন্ত্ৰী মাত্ৰু বন্দনা যোজনাৰ অধীনত প্ৰসূতী মাতৃসকলৰ পৰিপুষ্টিৰ অধিকাৰ সম্পৰ্কে উল্লেখ কৰে সমাজ কল্যাণ বিভাগৰ বিষয়াই। তেনেদৰে অন্যান্য বিভাগৰ বিষয়াসকলেও তেওঁলোকৰ বিভাগৰ অধীনত যি যি সেৱা সাধাৰণ ৰাইজে পাব লাগে সেয়া গাঁও সভাত ৰাইজক অৱগত কৰে। ৰাইজে নিজৰ প্ৰাপ্য সেৱাসমূহৰ প্ৰতি সজাগ হ'ব লাগিব। এই গাঁও সভাত সভাপতিত্ব কৰে বঙাইগাঁও গাঁও পঞ্চায়তৰ সভাপতি তিলক নাৰায়ণ দেৱে। গাঁও-সভাৰ উদ্দেশ্য সম্পৰ্কত পঞ্চায়তখনৰ সচিব আৰু ডাংতল উন্নয়ন খণ্ডৰ সহকাৰী খণ্ড উন্নয়ন বিষয়া মঞ্জুলা ঠাকুৰীয়াই ব্যাখ্যা কৰে। এয়া হৈছে কেন্দ্ৰীয় চৰকাৰৰ দ্বাৰা লোৱা এক বিশেষ পদক্ষেপ যাৰ জৰিয়তে পঞ্চায়তৰ নাগৰিকসকল উপকৃত হ'ব।🔯